2 REYES 11 - Qullan Arunaka DC

Atalía warmin Judá markan reyipätapa(2 Cr 22.10—23.21)

1Ocozías reyin Atalía sat taykapax yuqapan jiwxatap yatisinxa, reyin wila masinakaparuw jiwarayäna.

2Ukampis Joram reyin Joseba phuchhapax, Ocozías reyin kullakapäkän ukaxa, Ocoziasan Joás sat wawaparuw uywiripamp chik imantäna, reyin maynïr wawanakapar jiwarayasipkän ukapacha, ukatsti ikiñ utaruw jupanak irpantäna. Ukhamat Joás wawax jiwañat qhispïna,

3Joás wawasti suxta maraw uywiripamp chika Tatitun utapan imantatäskäna. Ukchañkamasti Atalía warmiw marka apnaqäna.

4Paqallqu maräxipansti, Joiadá sacerdotex reyir uñjirinakan capitananakapampiru, reyi uta uñjirinakan jilïrinakapampiruw jawsayanïna, ukatsti jupanakamp parlañatakix Tatitun utaparuw jupanakar mantayarakïna. Ukansti Joiadá sacerdotex juramento lurayasaw mä arust'äwi jupanakamp luräna, ukat jupanakar reyin Joás yuqapar uñacht'ayäna,

5ukatsti jupanakar sarakïnwa: “Akanak jumanakax lurapxäta: Jumanakat mä tamax, sábado urux reyin utapa uñjapxäta;

6yaqha tamasti Sur sat punkunkapxaniwa; ukxaru kimsïr tamasti, uñjirinakan cuartelapat qhipäx punkunkapxarakiniwa. Ukhamat jumanakax reyin utapa sum uñjapxäta.

7Jichhasti, kawkïr pä tamatix sábado urun inäpkäta ukanakaxa, Tatitun utap uñch'ukiyapxäta.

8Jumanakax reyiru muyuntasin sum uñjapxäta, sapa maynis nuwasiñ yänakap katt'atkama, khititix jumanak taypir mantañ munkani ukaxa, jiwaniwa. Jumanakaw reyimp chik sarapxäta, kawkharutix jupax sarkani ukkharu” sasa.

9Ukatsti capitananakax kuntix Joiadá sacerdotex siskatayna taqi ukanak lurapxäna. Sapa mayniw jaqinakapar sarayäna, sábado urun uñch'ukiri mantirinakaru, misturinakarusa, ukatsti Joiadá sacerdoten ukaruw uñstapxäna.

10Ukasti sacerdotex David reyinkkatayna uka lanzanakampi, jark'aqasiñampi capitananakar churäna, uka yänakasti Tatitun utapankänwa.

11Uñch'ukirinakasti nuwasiñ yänakas apt'atkamakiw altarampiru, templompir muyuntapxäna, aynach tuqit qalltasina, alay tuqikama, ukhamat reyiru jark'aqañataki.

12Ukapachaw Joiadá sacerdotex reyin Joás wawapar irpsunïna, ukat jupan p'iqiparux reyi pillu uchäna, ukatsti marka apnaqañ yatichäwi qillqatanak churarakïna, p'iqipar aceite warxatasinsti reyit utt'ayäna. Ukxarusti taqiniw amparanakap t'axllirasipxäna, jach'at art'asipxarakïna: “¡Jallalla rey!” sasa.

13Atalía reinax uñjirinakana, jaqinakana arnaqasitanakap ist'asax, Tatitun utapan tantachata jaqinak jak'aruw saräna.

14Ukansti Joás reyiruw uñjäna, templon sayirinakap jak'an sayt'atäskiri, kunjamäkäntix sarapax ukhamarjama. Jupa jak'ansti capitananakampi, musiconakampiw ukankapxäna; jaqinakasti wali kusisitaw trompetanaka phust'apxäna. Ukham uñjasinsti Atalía reinax isip ch'iyanuqasïna, jach'at art'arakïna: —¡Sallqjapxituwa! ¡Sallqjapxituwa! —sasa.

15Ukampis Joiadá sacerdotex ejerciton jilïr capitananakaparux sänwa:

—¡Uka warmir akat irpsupxam, anqan jiwayanipxam, jan Tatitun utapan jupar jiwayapxamti, jupat arxatasirirusti jiwayapxarakim! —sasa.

Sacerdotex Tatitun utapan jan jiwayapxañapatakiw satayna,

16ukat warmir katuntasin, caballerian mantañap tuqi irpsusin, reyi utar irpapxäna, ukan juparux jiwayapxäna.

17Ukatsti Joiadá sacerdotex reyimpiru, markampirux, jupanak pura yanapt'asipxañapatakiw mayïna, ukhamaraki Tatitut jan saraqtasa sayt'asipxañapataki.

18Ukxarusti taqiniw Baal diosan templopar sarasin q'al tukjanipxäna, altaranakaparu, idolonakaparu taq t'unjasa. Baal diosan Matán sat sacerdoteparusti, uka altaranakap nayraqatan p'iqip khariqapxäna. Ukatsti Joiadá sacerdotex uñjirinak Tatitun utapar uchäna;

19ukatsti jupax capitananakaru, quereteonakaru, uñjirinakaru, ukhamaraki jaqinakaru irpxarusinxa, taqiniw reyimp chikax Tatitun utapata, reyin utapkama sarapxäna, uñjirinakan punkup chiqa mantawayasa. Joasasti reyi qunuñan qunt'asïna,

20ukatxa taqpach markachirinakaw wal kusisipxäna.

Atalía reinan jiwatap qhipatsti, markax samarataw jakasïna.

Joás reyin Judá marka apnaqatapa(2 Cr 24.1-27)

21 21 (1) Joás reyix Judá marka apnaqañ qalltkän ukapachaxa, paqallqu maranïnwa.