JEREMÍAS 5 - Qullan Arunaka DC

Jerusalén markan juchapa

1Tatitux siwa:

“Jerusalén markan thakhinakap muytanipxam,

sum uñatatanipxam, plazanakan thaqtanipxam,

inach maynirus chiqap lurir jaqi jikxatapxäta,

inach chiqa chuymani jaqi jikxatapxarakïta.

Uktix jikxatapxät ukapachasti,

Jerusalén markarux juchanakap pampachäwa.

2Yaqhipanakax Tatitun sutipxaruw juramento lurasipki,

ukampis uka juramento luratanakaparux

janiw phuqhapkiti” sasa.

3Tatay, jumax chiqa chuyman jaqinak thaqtaxa.

Mutuytawa, ukampis janiw usuyasipkiti;

aynacht'aytawa, ukampis janiw yatiqañ munapkiti.

Chuymanakapsa qalat sipan juk'ampi qalarayasipxi,

janirakiw chiqa thakhir kuttaniñsa munapkiti.

4Nayasti amuyayätwa:

T'aqhin jakasir jaqinakakiw pisi chuyman jaqjam sarnaqapxi,

jupanakax janiw amuyt'apkiti kuntix Tatitux munki ukxa,

janirakiw kuntix Diosapax arski uksa amuyt'apkiti.

5Jilïr jaqinakan ukaruw sarä,

jupanakarusti sarakïwa.

Jupanakax kuntix Tatitux munki uk yatipxani,

kuntix Diosax arski uksa yatipxarakiniwa.

Ukampis taqiniw Tatitutak sayt'asipxatayna,

janirakiw jupar jaysañsa munapkataynati.

6Ukat jichhax leonanakax ch'umit mistunisin jiwarayapxani,

wasarankir qamaqinakaw jisk'a jisk'a tukjapxani,

markat mistusinkirinakarusti jisk'a jisk'a tukjarakini,

walja jach'a juchanak lurapxatap layku,

mayninakarus aljantapxatap layku.

7Tatitux siwa:

“¿Kunjämsa jichhax taqi ukanak pampachäma?

Wawanakamax nayar apanukupxituwa,

ukatsti jan chiqa diosäpki ukanakxaruw juramento lurapxi.

Jupanakarux jilarkir manq'añ churta,

ukampis taqpachaniw

yaqha diosanakar yupaychapxaraki.

8Urqu caballonakar uñtataw

jaqi masipan warmip munasax wararipxi.

9¿Janit uka luratanakapat mutuykästi?

¿Janit ukham sarnaqir jaqinakar juchap uñt'asiykästi?

10¡Jichhax uñisirinakapax mantanpan,

ukatsti uva yapunakap tukjpan,

janis taqpach tukjapkchini ukasa!

¡Layminakap qhaqharapxpan,

janiw jichhax uva yapuxäkxiti!

11¡Israelampi, Judämpix nayar sallqjapxituwa!

Naya, Tatituw uk arsta” sasa.

Mutuyäwin jutatap yatiyäwi

12Israel markampi, Judá markampix

Tatitur jan uñt'iriw tukupxi;

sapxarakiwa: “Janiw Diosax utjkiti.

Janiw kuna jan walis jiwasxarux jutkaniti,

janirakiw nuwasiñasa, mach'as utjkaniti” sasa.

13-14Profetanakax thayampi sasikiwa,

Tatitun arunakapan jan jupanakampïtap layku.

Ukhamasti walikiwa,

taqi ch'amani Tatitux ak situ:

“Jupanakan ukham sapxatapatsti,

akanakaw jichhax jupanakxar jutani:

Arunakaxax lakaman mä ninjamäniwa,

jaqinakasti lawäpkaspas ukhamaw tukupxani,

uka ninaw jupanakar nakhantani.”

15Tatitux siwa:

“Israelitanaka, jayat jutir marka jumanakatak apayanï,

wali ch'aman marka, nayratpach utjir marka.

Jumanakax parlap janiw yatipktati,

kuntix sapki uksa janiw amuyt'apkaraktati.

16Jupanakax jan axsarir nuwasir jaqinakawa,

mich'inakap antutt'apxi ukkhasti,

maynirus jiwayapxapuniwa.

17Jumanakax alkatasipkta

uka jach'a pirqan markanaksa, q'al t'unjapxani.

Yapunakamsa, manq'anakamsa, q'al manq'antapxani,

imilla, yuqall wawanakamarusa, q'al jiwarayapxani,

ovejanakamsa, vacanakamsa, q'al manq'antapxani,

uva yapunakamsa, higo yapunakamsa,

q'al tukjapxarakini.”

18Tatitusti saskakiwa: “Ukampis uka urunakan janiw taqpach t'unjkäti.

19‘¿Kunatarak Tatitu Diosasasti taqi akanak luristusti?’ sasa, ukxat jiskt'apkätam ukapachasti: jumax jupanakar sarakïtawa: ‘Kunjämatix jumanakax Tatitur apanukusin yaqha diosanakar aka pachpa uraqipan yupaychapxtaxa, ukhamarakiw jichhax jaya jaqin uraqipan yaqha markankir jaqinakar luqtas t'aqhisipxäta’ sasa.

Israel markar amuyt'ayäwi

20“Israel markar yatiyapxam,

Judá uraqirusti sapxarakim:

21‘Jan amuyt'an t'axmar marka, aka arunak ist'am,

nayranïskiwa, ukampis janiw uñjkiti,

jinchunïskiwa, ukampis janiw ist'kiti.

22Naya, Tatituw jiskt'apxsma:

¿Janit jumanakax nayar axsarapkista?

¿Janit naya nayraqatan khathatipkta?

Nayaw quta thiy uskta,

jach'a qutatakix qurpapäkaspas ukhama,

uka qurpsti janiw jach'a qutax llumikipankaspati.

Mathapinakapas inamayakiw ukan sartaski,

qhuthutiskaraki, ukampis janiw umax jilarankaspati.

23Jumanakax qhuru jan ist'asir chuymanïpxtawa,

nayar apanukuwayasaw sarxapxaraktaxa.

24Janiw amuythapisipktati,

janirakiw sapktasa:

‘Tatitu Diosasarux axsartañäni,

jupaw qhipa, nayra jallsa wakisitapar apayanistu,

pachaparuw achunak apthapiyarakistu’ sasa.

25Ukampis jucha luratanakamaw taqi ukanak mayjt'ayxi,

jichhasti janiw juk'ampi uka askinak katuqkxapxätati.

26Markaxanxa ñanqha jaqinakaw utji,

jupanakasti sipitanak uskuntapxi,

ukax janiw jamach'inak katurañatakïkiti,

jan ukasti, jaqinak katurañatakiwa.

27Utanakapasti lunthatat yänakampi phuqhantatawa,

kunjämatix jaulanakarux jamach'inakax phuqhantatäki ukhama.

Ukhamat jupanakax wali qamiri, munañani tukupxaraki,

28wali lik'intatäpxiwa, jach'a jach'aw tukupxaraki.

Ñanqha luratanakapasti waljapuniwa.

Janiw wajcharux chiqapar uñjapkiti,

janirakiw t'aqhin jakir jaqinakarus chiqapar uñjapkiti.

29¿Janit ukanakat mutuykästi?

¿Janit ukham jaqinakar juchap uñt'aykästi?

Naya, Tatituw uk arsta.

30“ ‘Mä axsarkaña, sustjaskañaw

aka markan lurasiski.

31Profetanakax k'arikamak yatiyapxi,

sacerdotenakasti kuntix munapki uk yatichapxi,

amuyatax markaxax ukanakampi k'uchikjamakiwa.

Ukampis uka jan walt'añax purinkani ukkhasti,

janiw khitis yanapt'kaniti.’ ”