JEREMÍAS 24 - Qullan Arunaka DC

Higo canastanakat unañchäwi

1Babiloniankir Nabucodonosor reyix, Judá uraqinkiri Joacín reyin Joaquín yuqaparu, ukhamarak taqi jilïrinakaru, irnaqirinakaru, herreronakar katuntat apasxatapatsti, Tatitux pä higo canastanak Tatitun utap nayräxan waynuqat uñjayitu.

2Maynïr canastanxa wali suma higonakaw utjäna, nayrïr achuqir higonaka, maynïr canastansti, ñusantat higonakakiw utjäna, uka higonakasti ukham ñusantatätapatxa, janiw manq'añjamäkänti.

3Tatitusti ukat jiskt'itu: “Jeremías, ¿kunsa uñjta?” sasa. Nayasti saraktwa: “Higonak uñjta, kawkïrinakatix walïki ukanakax sinti sumanakapuniwa, ukampis jan walïki ukanakasti sinti jan walinakawa, janirakiw manq'añjamäkisa” sasa.

4Tatitusti sarakituwa:

5“Naya, Israelan Dios Tatitupaw arsta: Judá markarux suma higo achunakarjamaw uñjä, jupanak Babilonia uraqir katuntat apanukkäyäta ukata. Jupanakarusti sumpun uñjä,

6nayaw jupanakarux imaskä, ukatsti uraqiparuw kuttayanxä; ukan jupanakarux wali sum jakayarakï, janiw mayampis jupanakarux t'unjkxäti; janirakiw jupanakarux yaqha markar katuntat apaykxäti.

7Jupanakarusti nayan Tatitütax yatipxañapatakiw mä suma amuy churarakï; jupanakasti markaxäniwa, nayasti jupanakan Diosaparakïyäwa, nayar taqi chuymampi kuttanxapxatapata.

8“Ukampis Judá uraqin Sedequías reyiparusa, jilïrinakaparusa, Jerusalén markan qhiparirinakarusa, jan ukax Egiptor sarasin suman utjasxapxi ukanakarusa, uka jan wali higonakarjamaw uñjarakï, ukham jan walïpxatapatxa, janiw manq'añatakis sumäpkiti.

9Jupanakarusti yaqha markanakatakis axtaskañ tukuyä, jisk'achjata, apanukuta, ñanqhachjata ukhamaw kawki markanakarutix nayax ananukkä uka markanakan sarnaqapxani.

10Jupanakxarusti nuwasiñanakampi, mach'anakampi, kunayman usunakampi apayanï, ukhamat kawkïr uraqtix jupanakaru nayra awkinakaparusa churkta uka uraqit q'al chhaqtayarakï.”