1 SAMUEL 26 - Qullan Arunaka DC

Davidax Saúl reyir janiw jiwaykiti

1Zif chiqan utjir jaqinakasti Guibeá chiqar Saúl reyir uñjiriw sarapxäna, ukat sapxarakïna: “Davidax wasar uñkatasin Haquilá qullun imantasitäskiwa” sasa.

2Ukatsti Saúl reyix, kimsa waranqa chhijllt'ata israelita soldadonakapampiw Zif siski uksa wasara tuqir Davidar thaqhir saräna.

3Ukatsti Haquilá siski uka qulluruw utjnuqtäna, kawkïritix thakhi jak'ankki uka wasar uñkatasina. Ukampis Davidax wasarankkasinxa, Saúl reyin jupar arktanitap amuyasïna,

4ukhamasti Davidax uñaqirinak khithäna, Saúl reyin purinitap yatiñataki.

5Uka qhipatsti Davidax kawkharutix Saúl reyix purkatayna ukkhakamaw purïna, ukatsti kawkhantix Saúl reyimpi Abner jaqimpix ikipkäna uk wali sum uñaqäna. Abnerasti Ner sat jaqin yuqapänwa, Saúl reyin ejercitopan jach'a jilïriparakïnwa. Ukatsti Saúl reyix campamento taypin jaqinakapan muyuntataw ikiskäna.

6Ukat Davidax Ahimélec hitita jaqimpi, Joab sata Abisai jilapampi, Seruiá jaqin yuqapäki ukanakampi parläna, jupanakarusti jiskt'arakïnwa:

—¿Khitis nayamp chika Saúl reyin campamentopar sarañ muni? —sasa.

Abisai jaqisti sänwa:

—Nayaw jumamp chika sarä —sasa.

7Uka arumpachaw Davidampi Abisai jaqimpix campamentor sarapxäna. Saúl reyisti ukan ikiskäna, ch'ijmañap tuqinsti lanzapax uraqir chhuqt'atäskänwa. Abnerampi soldadonakampisti, Saúl reyir muyuntataw ikisipkäna.

8Ukat Abisai jaqix Davidarux säna:

—Tatituw jichhürux uñisirimar amparamar katuytam. Jichhax nayar jaytita uka pachpa lanzapampi chhuqhuntasin jiwayañataki. May chhuqhuntasakiw jiwt'ayä —sasa.

9Ukampisa Davidax sänwa:

—Jan jiwaykamti, khititix Tatitun chhijllat reyir jiwayañ munki ukax mutuyatapunïniwa.

10Nayax Tatitun sutipxaruw juramentompi arsta, pachpa Tatituw jakañap apaqani, jiwañapäki ukkhasa, jan ukax nuwasïwin jiwañapäki ukkhasa.

11Tatitux jupan chhijllat reyir jiwayañat imitpan. Ukhamasti ch'ijmañapankki uka lanzapa, ukhamarak umañ wakullapsa apxarum, ukat sarxañäni —sasa.

12Ukhamat Davidax Saúl reyin ch'ijmañapankki uka lanzampi, ukhamarak uma wakullap apxarusisin sarxapxäna. Janiw khitis jupanakarux uñjkänti, ist'känsa; janirakiw khitis p'arxtkänti. Tatitux mä jach'a ikimpiw jupanakarux taqinir ikirayäna.

13Ukatsti Davidax qhirwa khurkataru makhatasin mä qullu pataruw mistsüna. Jupanakat jaypachankänwa.

14Ukatsti Davidax Abnerampiru, soldadonakapampirux jach'at art'anïna:

—¡Abner, ist'itaya! —sasa.

Abnerasti sänwa:

—¿Khitïtas jumax reyir ukham arnaqañatakixa? —sasa.

15Davidasti sarakïnwa:

—¿Janit jumasti Israelan mayni soldadonakapat sipan juk'amp jach'äktasti? ¿Kunatarak juman reyimarusti jan sum uñjtasti? Mayni markachiriw reyir jiwayir mantani.

16Juman luratamax janiw walïkiti. Nayasti Tatitun sutipxaruw juramentompi arsta, jumanakax Tatitun chhijllat reyiru jan suma uñjapxatam laykux jiwarayatäpxañamaw wakisi. ¡Jichhax reyin ch'ijmapänkkän uka lanzampi, uma wakullapampi thaqtam, inach jikxatäta! —sasa.

17Saúl reyisti Davidan arupätap amuyasinxa, jach'at arsüna:

—¡David, nayan wawaxa, jumarakis parlaskatätaxä! —sasa.

Davidasti sarakïnwa:

—Jïsa, munañan rey, nayapunïsktwa.

18Ukampisa, ¿kunatarak jumasti munañan rey aka luqtirimar arkanaqtasti? ¿Kunaraki nayasti lurtsti? ¿Kunas juchaxaxa?

19Jach'a munañan rey, aka luqtirimar ist'añamatakiw achikt'assma: Tatitutix juma reyir nayar jan walt'ayañatak utt'aychi ukaxa, inach mä waxt'äwi katuqitaspa; ukampis jaqin amtäwipakïchi ukasti, Tatitux uka jaqinakar ñanqhachpan. Jichhasti Tatitun uraqipat jaqunukupxitu, ukham lurasax yaqha diosanakar luqtañaxatakiw nukt'apxitu.

20Janiw nayan wilaxax Tatitun nayraqatapat jayan wartatäñap munkiristti, ukampis juma jach'a munañan reyix nayar jiwayañatakix mä jisk'a k'utirjama, qullunakankir mä p'isaqarjamaw arknaqista —sasa.

21Ukat Saúl reyix säna:

—¡David, wawaxa, nayaw juchanïtxa! ¡Mä pisi chuyman jaqjamaw sarnaqtxa, luräwixansa pantjasiraktwa! Ukampis kuttanxam, janiw jichhax kuna ñanqhsa lurkxämati, jichhüruw jumax jakañaxar jan kuna ñanqhsa lurañ munatam uñacht'ayista —sasa.

22Davidasti sänwa:

—Jach'a munañan rey, akax juman lanzamaxa. Mayni uywatamay jutpan apxañapataki,

23Tatitusti sapa maynirus chuymaparjam uñjpan. Tatitux amparaxaruw jumarux katuyitu, ukampis nayax Tatitun ajllit reyirux janiw jan wal lurañ munkäyätti.

24Kunjämatix nayax jichhür juma reyin jakañap askir uñjtxa, ukhamarakiy Tatitux nayan jakañaxa uñjitpan, taqi llakisiñatsa qhispiyarakitpan —sasa.

25Ukatsti Saúl reyix jach'at arsüna:

—¡David wawaxa, qullanäman! ¡Jumasti jach'a luräwinak lurätaxa, taqi kunansa walt'askakipunïtawa! —sasa.

Uka qhipatsti Saúl reyix utaparuw kutt'awayxäna. Davidasti sarañapäki ukanjam sarxarakïna.