1 REYES 11 - Qullan Arunaka DC

Salomón reyix yaqha diosanakar yupaychiriw tukxi

1Salomón reyix faraonan phuchhapat, yaqha markankir walja warminakaruw munarakïna: moabita, amonita, edomita, sidonia, hitita, warminakaru;

2Diosasti israelitanakarux uka markanakankir warminakat sataynawa: “Janiw jupanakamp jaqichasipxätati, jupanakas janirakiw jumanakampi jaqichasiñapäkiti, chuymanakam yaqha diosanakar arkañatak jan saranukuyaskañapataki” sasa. Ukampis Salomonax uka warminakar munasin, jupanakampi mayachasïna.

3Jupasti paqallq pataka warminïnwa, reyinakat saraqiri warminaka, uñt'at warminakapasti kimsa patakänwa, uka warminakaw chuymap mayjt'ayäna.

4Salomonax ch'ama qarit awkïxäna ukkhasti, warminakapax chuymap yaqha diosanak tuqiruw uñtayäna, Salomonax janiw Tatit Diosaparux David awkipjama taqi chuyma luqtaskataynati.

5Salomonax sidonionakan Astarté sat diosapampiru, amonitanakan Milcom sat axtkañ diosapampiruw yupaychäna.

6Salomonasti Tatit nayraqatan jan walinak luräna, jupasti janiw kunjämtix David awkipax lurkatayna ukham chiqpach chuymampi Tatitur arkkänti.

7Khä urunakansti Salomonax Jerusalenat inti jalsu tuqinkki uka qullun, mä yupaychäwi chiqa Quemós sat Moab markan axtkañ idolopatak luräna, ukhamaraki amonitanakan Moloc sat axtkañ idolopatakisa.

8Uka pachparak lurarapïna jaya markankir warminakapataki, jupanakasti diosanakaparuw inciensompi, wilañchanakampi luqtapxirïna.

9Israelan Tatit Diosapasti Salomonatakix q'apisïnwa, jupa Diosar munañ chuymapax jan utjxatapata, pä kuti jupar uñstkatayna ukasa,

10yaqha diosanakar jan yupaychañapataki siskatayna ukasa. Ukampis jupax janiw ist'känti kuntix Tatitux siskatayna ukxa.

11Ukat Tatitux Salomonar säna: “Jumax jan walpun sarnaqtaxa, janirakiw suma arust'äwi luratarusa, churksma uka kamachinakarjamas phuqktati, ukat jichhax marka apnaqäwi apaqxäma, ukatsti mayni uywatamaruw katuyxä.

12Ukampisa, David awkimaru khuyapayasitax laykux, janiw juman jakañamkamax lurkäti; ukampis wawamat apaqä.

13Janis taqpacha marka apnaqäwi apaqkä ukkhaxa, mä aylluki jaytarapï awkimaru khuyapayasitax layku, Jerusalén marka ajllisitax laykuraki” sasa.

14Ukatsti Tatitux mä uñisirip Salomón reyitakix sartayäna: Edom markan reyinakapat saraqiri, Hadad sata edomita jaqiru.

15Kunapachatix Davidax Edom markaru atipjkäna, ukatsti ejerciton Joab sat jilïripax nuwasïwin jiwaririnakar imt'ir sarkatayna ukkhaxa, jupax Edom markankir taqi chachanakaruw jiwarayanïna;

16suxta phaxsiw taqpach israelita jaqinakampi ukankäna, Edom markankir taqpach chachanakar jiwarayañkama.

17Uka urunakan, Hadad chachax wawäskänwa, jupasti Egipto markaruw jaltxäna, awkipar luqtiri mä qawqha edomita masinakapampi.

18Madián chiqat mistusinsti, Param chiqaruw puripxäna, uka chiqankirinakat yaqhip jaqinakax jupanakar chikachasisin Egipto markar puriñ yanapt'apxäna. Egiptor purisin faraón reyin nayraqataparuw uñstapxäna, faraonasti jupanakarux utampi, manq'añamp churäna, uraqinak waxt'arakïna.

19Hadad chachasti faraonatakix chuymapar purt'kirïnwa, ukatsti faraonax jupar Tahpenés sat reinan kullakaparuw warmipäñapatakix churxäna.

20Tahpenés reinan kullakapasti Hadad chachapatakix mä yuqall wawanïnwa, Guenubat sutini, uka wawarusti Tahpenés reinax faraonan reyi utapan jupan wawanakapamp chik uywäna.

21Ukatsti kunapachatix Egipton Hadad chachax Davidampina, ejerciton jilïripa Joab chachampin jiwxatap yatïna ukkhaxa, jupax faraonar sänwa:

—Uraqixaruw kutt'xañ munta —sasa.

22Faraonasti ukxaruw säna:

—¿Kunatakirak uraqimar kutt'añ muntasti? ¿Kunarak naya jak'an pist'tamsti? —sasa.

Hadad chachasti sänwa:

—Janiw kunas pist'kituti, ukampis sarañpun munta —sasa.

23Ukhamarusa, Diosax Rezón sat chacharuw Salomón reyin uñisiripat sayt'ayarakïna. Rezón chachax Eliadá chachan yuqapänwa, jupax Sobá chiqankir Hadad-ézer reyin uywiripat jaltxatayna.

24Jupasti mä qawqha chachanak tantachatayna, ukatsti mä tama lunthatanakan p'iqichiripänwa. Davidax uka lunthat jaqinakar jiwaraykäna ukkhaxa, Rezón chachax Damasco markaruw sarxäna, ukansti reyit utt'asïna.

25Jupasti Salomonan jakañapkamax Israelan uñisiripänwa; Hadad chachamp chikasti jan walinakpun Salomonarux luräna, Israel markar uñisitap layku. Ukhamat Rezón chachax Siria markan reyipar tukuwayäna.

26Nabat chachan Jeroboam yuqapasti reyitakix sayt'asirakïnwa. Jeroboam chachax Salomonan yanapiripänwa, jupasti Efraín ayllunkir Seredá markankirïnwa. Taykapasti Serúa sutin mä ijma warmïnwa.

27Jeroboam chachan reyitak sayt'asitapax akanakat utjäna: Salomonax laq'ampiw markar makhatañ phuqhantaskäna, ukatsti awkipan David Markapa pirqanakapan utjir k'ajllanak pirqantaskarakïna.

28Jeroboam chachax wali ch'amani, mä amtañani chachänwa; Salomonasti aka waynan wali q'aphätap uñjasaxa, kuna ch'ama lurañanaktix Joseat saraqir jaqinakax lurapkäna ukanak uñjañapatakiw uchäna.

29Mä urusti, Jeroboam chachax Jerusalén markat mistuskasaw Siló chiqankir Ahías profetamp thakhin jikisïna, jupasti mä machaq isimpi janxatataw saraskäna. Panipakiw pampan jikxatasipxäna,

30Ahías profetasti patxar uchasiñ machaq isip katusin tunka payaniruw ch'iyjäna,

31ukat Jeroboam chachar säna: “Aka tunka ch'iyaqat wariranakax jumatakiwa, Israelan Tatit Diosapax sistamwa: ‘Marka apnaqañxa Salomonat apaqäwa, ukatsti jumaruw tunka ayllunak churäma.

32Salomonarux mä aylluki jaytä, David uywataxampiru, Jerusalenampir khuyapayasitax layku, uka marka israelan taqpach ayllunakap taypit chhijllasitax layku.

33Salomonax nayar apanukutuwa, sidonionakan Astarté sat diosaparuw yupaychxi; moabitanakan Quemós sat diosaparu; amonitanakan Milcom sat diosaparuw yupaycharaki. Jupan luratanakapasti nayan nayraqataxan janiw sumäkiti, janirakiw kamachinakaxsa, arsüwinakaxsa phuqkiti, kunjämtix David awkipax lurkän ukhama.

34Ukampisa, janiw taqpach marka apnaqäwi apaqkäti, jan ukasti jakañapkamax marka apnaqayaskakïwa, David luqtirixar khuyapayasitax layku, Davidarux nayaw ajllista, jupasti kamachi arunakaxaru, arsüwinakaxarus phuqhiwa.

35Ukampis yuqapatxa marka apnaqañ apaqäwa, ukatsti jumaruw tunka ayllunak katuyäma.

36Yuqapatakisti mä aylluki jaytä, David luqtirixan qhanapax Jerusalén markan naya nayraqatan nakhaskakiñapataki, nayaw uka marka ajllista sutixan ukankañapataki.

37Nayasti jumaruw apnaqañamatak churäma, kuntix jumax munkta ukanakxaru, ukhamarak Israelan reyipäñamataki.

38Jumatix ist'itäta kunanaktix luram siskäma ukanakaru, luräwinakamas naya nayraqatan chiqapäni, ukatsti kamachinakaxsa, kamachi arunakaxsa phuqharakïta, kunjämtix David luqtirixax lurkäna ukhamxa, nayax jumampïyäwa, jumat saraqir reyinakarusti ch'aman sayt'ayä, kunjämatix Davidan saraqirinakapar ch'aman sayt'aykta ukhama; Israel marksti jumaruw katuyäma.

39Davidan saraqirinakaparusti ukham luratanakapat mutuyäwa, ukampis janiw ukax wiñayatakïkaniti.’ ”

40Ukhamïpan Salomonax Jeroboam chacharux jiwayañ munäna; ukampis Jeroboam chachax Egiptoruw jaltxäna, uka urunakasti Sisac sat faraonaw uka marka apnaqaskäna; Jeroboam chachax Salomonan jiwañapkamaw ukankäna.

Salomón reyin jiwxatapa(2 Cr 9.29-31)

41Salomonan sarnaqäwipata, yatiñ kankañapatsa, taqi luratanakapatsa Salomonan luratanakapa sat qillqatankiwa.

42Salomonasti pusi tunka kimsan maraw Israel marka apnaqawayäna, uka pachasti jupax Jerusalén markan utjasïna.

43Jiwxipansti, David awkipan markaparuw imt'xapxäna. Jupa lantisti Roboam sat yuqapaw reyit utt'asxäna.