1 1 (2) Tatay, mayisitaxarux ist'akimaya,
¡arnaqasitaxax jak'amkam purinikpanaya!
2 2 (3) Janikiy llaki urun nayatak maysa uñtamti;
¡nayar ist'añatakix jank'akïmaya!,
¡art'asinsma ukapachax ist'akitaya!
3 3 (4) Jakañaxax jiwq'ir uñtataw tukusiski,
ch'akhanakaxasti nina sank'jamaw nakhantaski,
4 4 (5) chuymaxax aynacht'atawa,
qurar uñtataw wañsuski;
¡janiw manq'as munaskituti!
5 5 (6) Jachkäwi sarnaqataxatxa
janchixas ch'akhanakaruw lip'katxi.
6 6 (7) Wasarankir ch'usiqar uñtatätwa,
laqayanakan jakir jukjamätwa.
7 7 (8) Janiw ikis purkituti,
uta patxankir saparst'at jamach'jamätwa.
8 8 (9) Timasirinakaxax jan inakt'asaw tuqitu,
sutix aytasisaw ñanqhachapxitu.
9 9 (10) T'ant'a lantix qhillak manq'ta;
umañaxasti jachaxampiw kituntasi,
10 10 (11) q'apisiñam layku, phiñasiñam layku,
jumaw sayt'ayista, uka qhipat tinkuyarakista.
11 11 (12) Jakañ urunakaxax ch'iwir uñtataw sarakipi,
qurar uñtataw wañsuskarakta.
12 12 (13) Jumasti, Tatay, wiñayapuniw jaktaxa,
¡sutimax wiñayapuniw amtatäni!
13 13 (14) Sartasimaya, Sión markat khuyapt'ayasim,
t'aqhisiñ urunakax phuqhasxiwa;
¡pampachxañam urux purinxiwa!
14 14 (15) Uywatanakamax markapan qalanakaparuw munasipxi,
t'unjat pirqanakapat jachapxi.
15 15 (16) Taqpach markanakaw
Tatitun qhapaq sutip waqaychapxani,
akapach reyinakasa,
aytat kankañamatakiw axsarthapipxani,
16 16 (17) Tatitux Sión markar wasitat utachkani ukapacha,
qhapaq kankañapan uñstkan ukapacha,
17 17 (18) apanukut jaqin mayisitap ist'kan ukapacha,
achikt'asitanakapar jayskan ukapacha.
18 18 (19) Akax jutir mita jaqinakatak qillqatäpan,
machaqat utt'ayat markan
Tatitur jach'añchañapataki.
19 19 (20) Tatitux qullan utjäwipatpach uñtanïna,
alaxpachatpach uraqirux uñtanïna,
20 20 (21) katuntatanakan ayqutanakap ist'añataki,
jiwañatak juchañchatanakar qhispiyañataki;
21 21 (22) Tatitun sutipat Jerusalén markan yatiyañataki,
Tatitun aytat kankañap Jerusalenan jach'achañataki;
22 22 (23) jaqinakax Tatitur yupaychañatak
taqi markanakat mayachasipkan ukapacha.
23 23 (24) Jupaw chika thakhin ch'amaxar thayjtayi,
jakañ urunakax juk'aptayaraki.
24 24 (25) Nayasti juparux sistwa: “Diosaxay,
janikiy jakäwix chikatpach apaqistati” sasa.
¡Maranakamax janiw tukuyanïkiti!
25 25 (26) Uraqirux qalltatpach sum utt'aytaxa;
alaxpachasti amparamamp luratawa.
26 26 (27) Taqi ukanakax tukusxakiniwa,
jumasti pachpakïsktawa.
Ukanakax isir uñtataw mirq'isini;
wariraptir isir uñtataw tukusini.
27 27 (28) Jumasti pachpakïsktawa,
jakañ maranakamax janiw tukuskaniti.
28 28 (29) Uywatanakaman wawanakapax
suma uñjataw jakapxani;
nayraqataman wiñayaw jakapxani.
Who We AreWhat We EelieveWhat We Do
2025 by iamachristian.org,Inc All rights reserved.
