2 SAMUEL 12 - Qullan Arunaka DC

Natán profetax Davidaruw tuqinuqi

1Tatitux Natán profetaruw Davidan ukar khithäna. Natanasti Davidan nayraqatapar uñstasin jupar sänwa:

—Mä markan pani jaqiw utjäna, maynix qamirïnwa, maynisti jan utjirini jaqïnwa.

2Qamirix walja ovejanakani, walja vacanakanïnwa,

3ukampis jan utjirin jaqinxa mä sapa jisk'a ovejapakiw utjäna, uksti alasitaynawa. Jupa kipkaw uka oveja uywasïna, uka jisk'a ovejasti jupampi, wawanakapamp chikaw jilasïna; jupan manq'ap manq'asïna, umañapat umasïna, jupampi chikaw ikisirakïna. ¡Uka jaqisti jisk'a ovejaparux mä imill wawaparjamaw munasïna!

4Mä urusti, thakhi sarir jaqiw uka qamir jaqin utapar sart'äna; qamir jaqisti janiw ovejapsa, vacapsa kharst'añ munkänti, jan ukasti, jan utjirini jaqin jisk'a ovejap aparanïna, ukatsti uka jisk'a oveja kharsusin manq'a wakichayäna sarir jaqir waxt'añataki —sasa.

5Uk ist'asasti, Davidax walpun uka qamir jaqitak phiñasïna, ukat Natanar sarakïna:

—¡Diosan sutipxaruw arsta, khiti jaqitix ukham lurki ukax jiwañapawa!

6¡Uka jisk'a oveja jiwayatapatsti pusi ukkhampi kuttayxañapawa, jan akch'a khuyapt'ayasiñanïtap layku! —sasa.

7Ukat Natanax jupar sarakïna:

—¡Jumätaw uka jaqixa! Jichhasti Israelan Tatitu Diosapax akham qhanañchi: ‘Nayaw jumarux Israelan reyipat ajllissma, Saúl reyin amparapat qhispiyaraksma;

8uywiriman jach'a utapampi, ukan utjir warminakapampi chursma, ukhamarus Israelana, Judá markan apnaqäwipampi churaraksma. Ukax juk'akïchisapän ukasti, juk'amp yänak yapt'iriskasamäna.

9¿Kunatarak arunakaxar jisk'achta, ukatsti kunatix nayatak jan walïki uk luraraktasti? Amonita jaqinakampiw Urías hitita jaqirux jiwayaytaxa, warmipsa katuntasiraktawa.

10Jichhasti, nayar jisk'achatamata, ukatsti Urías hitita jaqir warmip irparatamatsa, janipuniw utamat jan walt'añanakax jayarst'kaniti.

11Naya, Tatituw arsta: Jumatakisti jan walt'añanak pachpa utamat sartayä, juman uñjkataw warminakamarux pachpa utamankirit maynir katuyarakï, jupasti uru qhanan uka warminakampix ikintarakini.

12Jumax jamasan ukanak lurtaxa, ukampis nayax uruwa, qhanan lurä, taqpach Israel nayraqatana’ —sasa.

13Davidasti Natán nayraqatan juchanïtap uñt'asïna, sarakïnwa:

—Nayax Tatit nayraqatan jucha lurta —sasa.

Natanasti ukxaruw sarakïna:

—Tatitux janiw juchamat mutuykätamti, janiw jiwkarakïtasa.

14Ukampis uka luratamampi Tatitur jan walpun chuymap ust'ayatam laykuw, yurki uka yuqall wawamax jiwani —sasa.

15Uka arunak sasin Natán profetax utapar kuttawayxäna. Tatitusti Uriasan warmipax Davidatak wawacharapkatayna uka wawar niya jiwt'irpachjam usuntayäna.

16Ukapachaw Davidax wawatak Tatitur achikt'asïna, janiw kuns manq'känti, arumanakasti uraqir jipt'ataw qhantatïna.

17Reyi utapan jakir jilïr jaqinakasti, Davidarux uraqit sartxañapatakiw achikt'apxäna, ukampis jupax janiw sartañ munkänti, janirakiw jupanakamp chikas manq'añ munkänti.

18Paqallq uru saraqatarusti uka wawax jiwxänwa, Davidan jaqinakapasti wawan jiwatap jupar yatiyañ axsarapxänwa, chuymanakapan sapxarakïnwa: “Wawax jakaskipansa parlxayatas janiw ist'kistänti, jichhasti, ¿kunjämarak sañäni wawan jiwxatapatsti? ¡Kunsa lurakispawa!” sasa.

19Ukampis Davidax jaqinakapan jupanakkam parlasitap uñjasaw yuqall wawan jiwxatap amuyxäna; ukat jupanakar jiskt'äna:

—¿Wawax jiwxiti? —sasa.

Jupanakasti:

—Jïsa, jiwxiwa —sapxarakïnwa.

20Ukspachaw Davidax uraqit sartäna, jariqasisinsti, suma q'apkir qullampiw jawsusïna, yaqha isimpiw uchasirakïna. Ukatsti Tatitun utapar mantasin jupat mayisïna. Utapar kuttasinsti manq'a mayïna ukat manq'arakïna.

21Jilïr jaqinakapasti jupar jiskt'apxänwa:

—¿Jach'a rey, kunatarak ukham lurtasti? Wawax jakkäna ukkhasti, jumax janiw manq'käyätati, uka wawamat jacharakïyätawa; jichhasti wawa jiwxipan ¡sartasin manq'añaruw uchastaxa! —sasa.

22Davidasti jupanakar sarakïnwa:

—Wawax jakaskän ukapachax nayax ayuno luräyäta, jacharakïyätwa: “Inach Tatitux nayat khuyapt'ayasitaspa, ukat wawaxar qullarapitaspa” sasa.

23Jichhasti jiwatäxiwa, ¿kunatakirak manq'atjam t'aqhisïsti, nayati wawar jaktayiristxa? ¡Nayax jupamp jikisiriw sarxä, ukampis jupax janiw mayampsa nayan ukar jutkaniti! —sasa.

Salomonan yuritapa

24Ukatsti Davidax Betsabé warmipar chuymacharakïnwa, jupar tumpt'ir sarasinsti, jupampiw ikintäna. Mä qawqha pachatsti, Betsabé warmix mä yuqall wawa wawachasïna, uka wawarusti Davidax Salomón sasaw sutiyäna. Tatitusti uka wawarux munasïnwa,

25Natán profeta tuqiw Davidar uk yatiyarakïna. Ukatsti Davidax Tatitur ist'asaw uka wawar Jedidías sasa sutichäna.

Davidax Rabá marka katunti(1 Cr 20.1-3)

26Ukchañkamasti Joab chachax amonitanakan Rabá sat markaparuw soldadonakapamp nuwantaskäna, uka reyin markapsti niya katuntirjamäskänwa,

27ukat Davidar aka iwxa apayäna: “Rabá markaruw nuwantasipkta, ukatsti kawkïr jisk'a markatix umañ umxa jark'xäski uka markxa katuntxaraktwa.

28Jichhasti, juma jach'a reyix mayni soldadonakar tantacht'asin uka marka katuntir jutam; jan nayan katuntaskañaxataki ukat sutixa uka markar uskuskañataki” sasa.

29Davidasti taqpach soldadonakapar tantacht'asin Rabá markaruw sarantäna, nuwantasinsti, uka marka katuntarakïna.

30Ukatsti reyipan p'iqipat quri pillup apaqanïna, uka pillusti suma k'ajkir qalanakamp uchatänwa, kimsa tunka kimsani kilonïnwa, ukatsti uka pillumpix Davidaruw asxatapxäna. Ukhamarus Davidax uka markat jila alani yänak waljpun apsunïna,

31uka markan qhiparir jaqinakarusti, ananukusin wali ch'ama lurañanakan jupanakar irnaqayäna, serruchonakampi, piconakampi, hierro hachanakampi, ukatsti ladrillo lurañ hornonakan jupanakar irnaqayäna. Uka pachparak taqi amonita markanakarux luräna, ukatsti taqi soldadonakapampiw Jerusalén markarux kuttanxäna.