1 CRÓNICAS 5 - Qullan Arunaka DC

Rubén chachat saraqirinaka

1-3Israel chachan Rubén sat jilïr yuqapan wawanakapa: Hanoc, Falú, Hesrón, Carmí. Chiqpachansa Rubén chachaw jilïr yuqapänxa, ukampis awkipan warmipamp sarnaqasaw jilïr kankañap apt'asïna, jupan jilïr kankañapax Josean wawanakapar churatäxänwa, Joseasti Israel chachan maynïr wawaparakïnwa. Ukatsipana, Judá chachax jilanakapat sipan juk'amp munañaniw tukxäna, jupatarak mä jilïris mistüna; ukampis jilïr kankañapax Josear churatänwa.

4-6Joel chachat saraqir wawanakapa: Semaías, Gog, Simí, Micaías, Reaías, Baal, Beerá, rubenitanakan jilïripa, jupax Tiglat-piléser sat Asiriankir reyin katuntat irpatänwa.

7Beerá chachan jilanakapat wila masinakaparjam qillqatanaka: Jeiel, jilïr irpiripa, Zacarías,

8Bela, Azaz chachan wawapa, Sema chachan allchhipa Joel chachan yuqapa. Bela chachax Aroer chiqan jakäna, uraqipax Nebo, Baal-megón chiqakamänwa.

9Inti jalsu tuqirusti, Éufrates jawir chiqata wasarax qalltaski ukakama, uywanakapasti Galaad chiqan walipuniw mirantäna.

10Saulux reyïkan ukkhaxa, rubenitanakax agarenonakampiw nuwasiñankäna, ukampis rubenitanakaw atipjäna, ukatsti Galaad chiqat inti jalsu tuqiruw utjantasipxäna.Gad chachat saraqirinaka

11Gad chachan wawanakapax khitinakatix Basán chiqan Salcá markakama, rubenitanak uñkatasin jakapkän ukanakax akanakänwa:

12Joel, wali aytat jaqi, jupxarusti Safán, Jaanai, ukhamarak Safat.

13Jupanakan wila masinakaparjam qillqatax Micael, Mesulam, Sebá, Jorai, Jacán, Zía, Éber, ukanakänwa, taqpachanix paqallqunïnwa.

14Jupanakaw Abihail chachan wawanakapänxa, jupax Hurí chachan yuqapänwa, Jaróah chachan yuqapa, Galaad chachan yuqapa, Micael chachan yuqapa, Jesisai chachan yuqapa, Jahdó chachan yuqapa, Buz chachan yuqaparaki.

15Ahí, Abdiel chachan yuqapa, Guní chachan allchhipa, jupaw jupanakan masinakapat p'iqt'irïna.

16Taqi jupanakaw Galaad, Basán, jisk'a markanakapana, Sarón chiqan uywa awatiñ uraqin qurpanakapkamäki ukan jakapxäna.

17Taqi jupanakaw Judá markankir Jotam reyina, Israelankir Jeroboam reyin urunakapan wila masitkam qillqantatäpxäna.

Pä ayllu chikatani jaqinakan sarnaqäwipa

18Rubén, Gad, uka ayllunakat saraqirinakapampi, Manasés ayllunkir chikat jaqinakapampix jan axsarir soldadonakänwa, jark'aqasiñampi, espadampi, mich'inak antutt'añampi wakicht'atäpxänwa, nuwasiñatakis suma yatichsutäpxarakïnwa. Jupanakasti pusi tunka pusin waranqa paqallqu patak suxta tunkan chachanakänwa.

19Ukatsti agareno, Jetur, Nafís, Nodab uka jaqinakampiw nuwasipxäna;

20ukampis Diosaw jupanakarux yanapt'äna, agarenonakasa, jupanakar jaqkattatanakas atipjataw uñjasipxäna, jupanakax nuwasïwinkasin Diosaruw mayisipxäna jupanakar yanapt'añapataki. Diosasti jupanakarux yanapänwa, jupar jaysapxatap layku.

21Ukatsti uñisirinakapan uywanakapxa, phisqa tunkan waranqa camellonaka, pä pataka phisqa tunkan waranqa ovejanaka, pä waranqa asnonak apasipxäna. Ukatsti patak waranqa jaqinak katurapxäna.

22Uñisirinakapasti waljaniw jiwarapxäna, uka nuwasïwix Diosat jutatap layku. Jupanakasti uka uraqin jakañatakiw qhiparapxäna jaya markar apanukut uñjasipkäna uka urunakkama.

23Manasés ayllut chikat saraqir wawanakapax waljanïtap laykux Basán chiqata, Baal-hermón uraqin jakasipxäna, Senir, Hermón sat qullukama.

24Wila masinakapan jilïrinakapax akanakänwa: Éfer, Isí, Eliel, Azriel, Jeremías, Hodavías, Jahdiel. Taqi jupanakax jan axsarir soldadonakänwa, wali uñt'at jaqinaka, wila masinakan jilïrinakaparakïnwa.

25Ukampis jupanakax nayra awkinakapan Diosapatakiw sayt'asipxäna, ukatsti kawkïr markanakarutix Diosax t'unjkatayna uka markanakan diosanakaparuw yupaychapxäna.

26Ukat Israelan Diosapax Asiriankir Pul sat reyiru, jan ukax Tiglat-piléser sat reyir amtayäna, jupaw rubenitanakaru, gaditanakaru, Manasés ayllunkir chikat jaqiparux alisnuküna; ukatsti jupanakarux Halah, Habor, Hará, Gozán jawiraruw anakiyäna, ukat jichhürkam ukan jakasipki.