NÚMEROS 16 - Qullan Arunaka DC

Coré chachan Moisesar kutkatasitapampi, mutuyäwipampi

1Mä levita chachaw utjäna Quehat chachan saraqiripata, Coré sutini, Ishar chachan yuqapa. Coré chachax kimsa masinakanïnwa, uka masinakapasti Rubén ayllunkirinakänwa: Datán, Abiram sutinakanix Eliab chachan yuqanakapänwa, On sat masipasti Pélet chachan yuqapänwa.

2Uka chachanakasti Moisesatakiw sayt'asipxäna, jupanakarusti pä patak phisqa tunkan israelitanakaw jaqkattapxäna, uka jaqinakasti markanxa taqininsa wali uñt'at jilïr chachanakänwa, amuyt'ayir jaqinak taypinkirinakänwa.

3Taqpachaniw jupanakax tantachasisin Moisesampiru, Aaronampir saykatapxäna, akham sasa:

—¡Jumanakakiw taqi kunsa munasipktaxa! Taqpach markaw Diosar katuyata, Tatitusti taqi jiwasanakampïskiwa. ¿Kunatarak jumanakasti Tatitun markapxar mä jach'a munañanïpkasmas ukham sartapxtasti? —sasa.

4Moisesasti uk ist'asinxa uraqir ajanup puriyañkamaw alt'äna,

5ukatsti Coré jaqimpiru, arkirinakapampirux sänwa:

—Arumanthiw Tatitux yatiyani khitis jupanki, khitis jupar katuyata, khitirakis jupar waxt'anak luqtaspa ukanaka. Jupax khitirutix ajlliskan ukakiw waxt'anak luqtani.

6Akham lurapxam: Coré chachampina, arkirinakapampin incienso q'aphichañanakap apanipxam,

7ukarusti nina sank'anak uchapxam, incienso willxatapxarakim, ukatsti arumanthix Tatitun nayraqataparuw uk uchanipxäta. Khitinakarutix Tatitux qullan carpapan luqtañapatak ajlliskani, jupanakakiw uk lurapxani. ¡Levitanaka, jichhax jan juk'amp arusipxamti!

8Ukatsti Moisesax Coré chacharuw säna:

—Levita jaqinaka, ist'apxita:

9¿Amuyatanakamat juk'akiti Diosan jumanakar israelitanak taypit Tatitump Jikisiñ Carpan jupar luqtapxañamatak ajllitapasti?

10Tatitux jupa jak'ankapxañamatakiw jumanakar ajllisipxtam. Jichhasti, ¿kunatarak sacerdotëñ munapxaraktasti?

11Chiqpachansa janiw jumanakax Aaronatak arusipktati, jan ukasti, Tatituruw jumasa, masinakamas saykatapxtaxa —sasa.

12Ukatsti Moisesax Datán, Abiram uka chachanakaruw jawsayanïna, ukampis jupanakax sapxänwa:

—Janiw sarapkiristti.

13¿Amuyatamatsti juk'akiti kawkha uraqintix lechesa, misk'is umjam jalaski uka uraqit nanakar irpsunitamasti, ukat wasaran nanakar jiwarayiri, ukhamarus munañamar nanakar apnaqañ munatamasti?

14Janiw jumax lechempi, misk'impi jalaski uka uraqir irpapkistati, janirakiw jumax mä uraqsa churapkistati, uva yapunaksa churapkistati. ¿Juykhur uñtatti, taqinin irpayasiñap muntasti? Janiw jumar uñjañsa, jumamp parlañsa munapkti —sasa.

15Moisesasti wali q'apisitaw Tatitur säna:

—¡Jupanakan waxt'anakap jan katuqamti! Janiw nayax jupanakan mä asnopaksa mayirïkti, janirakiw jupanakat maynirusa jan walinak lurkti —sasa.

16Ukatsti Moisesax Coré chacharuw säna:

—Jumampi, jaqinakamampix Tatit nayraqatan qharür uñstapxam. Aaronasti ukankarakiniwa.

17Sapa mayni incienso q'aphichañap apaspan, incienso ucharakpan. Jumampi, Aaronampix, incienso q'aphichañanakam apasipxarakïta, ukatsti Tatitu nayraqatan uk uchapxäta, yaqha pä patak phisqa tunka incienso q'aphichañanakamp chika.

18Qhipärmanthisti, sapa mayniw incienso q'aphichañap apxarusïna, aqaskir k'illimampi, inciensompi ucharakïna, ukatsti Moisesampi, Aaronampi chikaw Tatitump Jikisiñ Carpa nayraqatan sayt'asipxäna.

19Coré chachasti niyaw Jikisiñ Carpa uñkatasin taqpach jaqinakapar tantachatayna, Moisesampiru, Aaronampir saykatañataki. Ukapachasti Tatitux jach'a qhapaq kankañapampiw jupanakar uñstäna,

20ukatsti Moisesampiru, Aaronampiruw säna:

21—¡Aka jaqinakat jithiqtapxam, nayaw taqpachanir tukjä! —sasa.

22Moisesampi, Aaronampisti ajanup uraqir puriñkamaw alt'apxäna, Tatiturux sapxarakïnwa:

—Tatit Diosay, jumaw taqi jaqinakarus jakañ churtaxa, ¿mä sapa jaqin juchap laykukiti taqpach markatak q'apisïtasti? —sasa.

23Tatitusti Moisesarux akham sarakïna:

24—Taqpach israelitanakar sanim, Coré, Datán, Abiram, chachanakan chhujllanakapat jithiqtapxpan —sasa.

25Moisesasti sayt'asisin Datán, Abiram jaqinakan ukaruw saräna, jupamp chikasti Israelan jilïrinakapaw sararakïna.

26Ukapachaw markar säna:

—Uka ñanqha jaqinakan chhujllanakapat jithiqtapxam, kunatix jupanakankki ukanak janiw llamkt'apxätati, jumanakax juchanakap layku jan jiwasipkañamataki —sasa.

27Ukatsti taqpach jaqiw Coré, Datán, Abiram jaqinakan chhujllanakapat jithiqtxapxäna. Datán, Abiram uka chachanakasti chhujllanakap mantañaruw mistsunipxatayna, ukawjan jupanakax warminakapampi, taqpach wawanakapamp chika sayt'atäsipkäna.

28Moisesasti saskakïnwa:

—Tatituw taqi akanak lurañaxatak nayar khithanitu, janiw nayax chuymaxatjam kuns lurkti, jichhaw jumanakax uk uñjapxäta.

29Aka jaqinakatix mayni jaqinakjam jiwañap jiwaskani ukaxa, Tatitun nayar jan khithanitap yatiyani;

30ukampis Tatitutix mä jach'a muspharkañ lurani, ukatsti uraqis jist'artasin jupanakar taqi yänakapamp chika manq'antani, jakaskirpach p'amp'antat uñjasipxani ukkhasti, jumanakax aka chachanakan Tatitur saykatapxatap yatipxäta —sasa.

31Moisesax parlañ tukuyxän ukapachaw uraqix jist'artäna,

32ukatsti Coré chachar jaqkattapkatayna taqi uka chachanakaruw manq'antäna, wila masinakapampiru, yänakapampiru.

33Jupanakax jakaskirpachaw manqha pachar jalantapxäna, taqi yänakapamppacha, ukatsti uraqix jist'antasxänwa. Ukhamaw taqi uka jaqinakax israelitanak taypit chhaqtayatäxäna.

34Uka jaqinakar wararir ist'asasti, uka thiyanakan jikxatasir israelitanakax, taqpachaniw jaltxapxäna akham sasa: “¡Jaltxañäni, jiwasamppacharurak uraqisti manq'antistaspa!” sasa.

35Ukxarusti, Tatitux mä nina apayanïna, uka ninasti incienso luqtapkatayna uka pä patak phisqa tunkan levita jaqinakaruw nakhantas jiwarayäna.

36 36 (1)

Tatitusti Moisesarux sänwa:

37 37 (2) “Aarón chachan Eleazar yuqapar khitham, uka nina nakhantat taypinakat incienso q'aphichañanak apsunpan, nina sank'anak utjaskchi uksti jayar jaqtanpan.

38 38 (3) Jucha luratapat uka jaqinakax jiwaraski, jupanakan incienso q'aphichañanakapax, qullanañchatäxiwa, naya nayraqataxan incienso luqtañatak apnaqasitap layku. Altarar apakipañatak uka metalanak sillp'ar tukuyapxam, ukanakasti israelitanakan amtasiñapatak uchatäpan” sasa.

39 39 (4) Ukatsti Eleazar sacerdotex uka jaqinakan broncet lurat incienso q'aphichañanakap apthapisin altarar muyuntayañatakiw sillp'ar tukuyayxäna.

40 40 (5) Ukasti israelitanakan amtasiñapatakïnwa, uka qhipat Aarón sacerdoten saraqirinakapat jan khiti jaqis altarar incienso luqtir jak'achasiskañapataki; kamisatix Coré chachampi, masinakapampix jiwarapki ukham jan jiwarasipkañapataki. Ukhamaw taqi ukanakax phuqhasïna, kunjämtix Tatitux Moisés tuqi Eleazarar siskatayna ukhamarjama.

41 41 (6) Qhipärmanthisti Israel markpachaw Moisesampitaki, Aaronampitak parlañ qalltapxäna akham sasa:

—¡Jumanakax Tatitun markaparuw jiwayasipktaxa! —sasa.

42 24 (7) Taqpachaniw Moisesampiru, Aaronampir muyuntapxäna; ukampis jupanakax Tatitump Jikisiñ Carpäkis uksaruw sartawayxapxäna. Ukapachaw qinayax ukar imxattäna, Tatitun qhapaq kankañapas uñstarakïnwa.

43 43 (8) Ukhamasti Moisesampi, Aaronampix Jikisiñ Carpan uñkatasiparuw sayt'apxäna,

44 44 (9) Tatitusti Moisesarux sänwa:

45 45 (10) —Uka jaqinakat jithiqtapxam, jichhpachaw jupanakar t'unjä —sasa.

Moisesampi, Aaronampisti p'iqinakap uraqir puriyañkamaw alt'asipxäna,

46 46 (11) Moisesasti Aaronar sänwa:

—Incienso q'aphichañam aptanim, ukarusti altarat apaqasin nina sank'a uchäta, inciensompiw ukar warxatarakïta; ukatsti jank'akiw israelitanak thiyar saräta, Tatitut jupanakatak pampachäwi mayirapïta, Tatitux wali q'apisitawa, jaqinakaruw mutuyaski —sasa.

47 47 (12) Aaronasti Moisesan arsutaparjamaw luräna, ukatsti markax tantachatäkän ukkharux jalakamaw saräna. Tatitun apayanit mutuyäwix jaqinakarux markan q'al tukjaskäna, ukat Aaronax incienso uskusin luqtäna, markpachatakiw Tatitut pampachäwi mayirakïna.

48 48 (13) Ukxarusti Aaronax jaqi jiwatanak taypina, jakaskirinak taypin sayt'asïna, ukat Tatitun mutuyäwipax t'akurxäna.

49 49 (14) Ukürusti tunka pusin waranqa paqallqu patakan jaqinakaw jiwaräna, Coré chachamp chika jiwarapkatayna uka jaqinakar jan jakhusa.

50 50 (15) Jaqi jiwarañ sayt'xipansti, Aaronax Tatitump Jikisiñ Carparuw Moisesamp jikisiñatak kuttawayxäna.