JEREMÍAS 13 - Qullan Arunaka DC

Israelan jan wali sarnaqatapat amuyt'ayäwi

1Tatitux sarakituwa: “Saram, ukatsti linot lurat mä wak'a alasinim, ukampi thixnimar wak'antasim, ukampis janiw umampix jurichjätati” sasa.

2Nayasti, kunjämtix Tatitux siskitu ukham mä wak'a alasta, ukatsti ukampirakiw wak'antasta.

3Ukatsti Tatitux wasitat parlarakitu:

4“Kawkïr wak'tix jumax alaskta, ukampi wak'antatäkarakta ukxa, Éufrates jawirar sarasin mä qarqa p'iyar imantanim” sasa.

5Nayasti, kunjämtix Tatitux siskitu ukhamarjamaw Éufrates jawirar imantanta.

6Walja urunak qhipatsti, Tatitux sarakituwa: “Éufrates jawirar saram, ukatsti imantayanksma uka wak'a aptanxam” sasa.

7Nayasti Éufrates jawirar sarasin uka wak'a kawkharutix imantkäyäta ukkhat apsuniwayta, ukampis uka wak'ax q'ala ñusantatänwa, janiw kunatakis walïkxänti.

8Ukat Tatitux wasitat nayar situ:

9“Akhampï Judá uraqina, Jerusalén markan jach'a jach'a tukutap t'unjäxa.

10Aka ñanqha markax nayan arunakaxarux janiw ist'añ munkiti, ukatsti jan kuna amuyasisaw chuymapan kuna jan wali amtatanakapatix utjki ukanakaru arki. Yaqha diosanakan qhipap sarxi, yupaychañataki, luqtañataki. Ukatpï uka markax jan kunatak ñusantat wak'jamäxixa.

11Kunjämatix mä wak'ampi wal jiyantas wak'antastanxa, ukhamarakiw Israel markasa, Judá markas nayan jak'axan mayakïpxañapa, ukhamat nayan markaxäñapataki, sutixsa yatiyapxañapataki, jach'a kankañaxsa, jach'ar aptapxañapataki. Ukampis janiw ist'apkituti. Naya, Tatituw uk arsta.

Jutir mutuyäwit yaqha amuyt'äwi

12“Ukhamasti Jeremías, markaxarux sarakim: ‘Israelan Tatitu Diosapax siwa: Kawkïr sañurus vino phuqhantaksnawa’ sasa. Israelitanakasti ukxarux sapxarakïtamwa: ‘¿Janit nanakasti yatipktsti kawkïr sañurus vino phuqhantatakïspa ukxa?’ sasa.

13Jumasti ukxarux sarakïtawa: ‘Tatitux siwa: Taqi aka markan utjirinakaru, Davidan reyi qunuñapan qunt'asiri reyinakaru, sacerdotenakaru, profetanakaru, Jerusalén markan jakirinakaruw vinompi machjayä.

14Ukatsti sañunakjam p'akirpayä, maynix maynimpi, awkix yuqapampi ukham jupanakkam tukjasipxani. Janiw jupanakat khuyapt'ayaskäti, jan ukasti, q'alpun t'unjä. Naya, Tatituw uk arsta’ ” sasa.

Israel markar amuyt'ayäwi

15Israelitanaka, Tatitux siwa:

Jan jach'a jach'a tukupxamti,

sum ist'apxam.

16Tatitu Diosamar jach'añchapxam,

jupax ch'amaka janïra puriyankipana,

ch'amak qullunakan jumanakan janïr liwirtkipana;

kawkïr qhantix jumanakax suyapkäyäta uk

jupax ch'amakar janïr tukuykipana.

17Jumanakatix jan ist'asipkätaxa,

jach'a jach'a tukupxatamat jamasan jachä;

nayranakaxatsti jachanakaw warasinini,

Tatitun tamapar katuntat apasxatap layku.

Reyitaki Diosan arunakapa

18“Reyirusa, reyin taykaparus sarakim:

‘Uka reyin qunuñapat saraqanipxam,

uraqir qunt'asipxam,

jumanakan p'iqimat suma k'achachir pillusti jalaqtxiwa.’

19Néguev tuqinkir markanakasti

uñisirin muyuntatawa;

janiw khitis uka chiq sarakipkaspati.

Taqi Judá tuqinkirinakasti,

katuntat apatäpxiwa.

20Uñatatapxam,

kunjämtix uñisirinakax amsta tuqit jutantki uka.

¿Kawkinkis nayax katuyksma uka tamaxa,

kawkïr tamattix jumax jach'a jach'a tukkäyäta ukaxa?

Israelan jayar apatäñapat yatiyäwi

21“¿Kamsätas Jerusalén,

kunapachatix juma pachpan yatichat jaqinakampi

apnaqatäkäta ukapachaxa?

Wawachasir warmin usunakapjamaw jutarakïtam.

22Ukattix jiskt'asisma, ¿kunas kamachitu? sasa,

jumax yatiñamawa,

uka jach'a juchanak luratamat

taqi ukanakax ukham lurasiski;

¡ukat jichhax q'alalsuyapxtam,

warmt'asisaw p'inqachjapxaraktam!

23Mä ch'iyar jaqix janiw janq'u jaqir tukkaspati,

janirakiw leopardos allqap mayjt'aykaspati;

ukhamarakipï jumanakasa,

ñanqha lurañar yatintatäxasinxa,

janirakiw askinak lurapkasmati.

24Ukatpï jumanakarux ananukupxämaxa,

kunjämtix wasar thayax

wichhurux q'al willitatki ukhama.

25Israel, ukaw jichhax juman tukuyamaxa,

ukarak nayat katuqañ muntaxa.

Naya, Tatituw uk arsta.

Nayatsti armasxistawa,

k'ari diosanakaruw iyawsaraktaxa.

26Nayasti jumarux q'alalsuyarakïmawa,

mä p'inqa irpnaqarakïma.

27Jan wali amtatam uñjtwa,

wachuqa jucha luratamsa uñjtwa,

mä p'inqa yaqhanakampi sarnaqatamsa,

qullu patanakana, pampanakana

axtaskañ luräwinak luratamsa uñjaraktwa.

¡Ay Jerusalén, kunakïkan jumatxa!

¿Kunapachkamarak ukham sarnaqätasti?”