1¿Kunatarak markanakasti Diosar saykatasipxisti?
¿Kunatarak ñanqha amtanak amtasipkisti?
2Akapach reyinakax mayacht'asipxiwa,
jilïr jaqinakax mä amtañaruw puripxi,
Tatitumpiru, ajllit reyipampir qallkatañataki.
3Jupanakax jach'at arsupxi:
“¡Chinuntatäpktan ukanak t'aqanukupxañäni!
¡Ñach'antatäpktan ukanakat jararasipxañäni!” sasa.
4Ukampis alaxpachan jakir Tatitux
jupanakat larusiwa;
5q'apisiñampiw jupanakar mulljanti,
tipusiñampiw saraki:
6“Naya pachpaw reyixarux ajllista,
Sión, qullan qullux patxaruw utt'ayta” sasa.
7Tatitun arsutap yatiyä:
Jupax situwa: “Jumaw nayan wawaxätaxa:
jichhüruw jumarux jakañ chursma.
8Jumax nayat mayiskakita:
katuqäwimjam markanak katuyxäma,
uraq tukuskam apnaqañamatakiw churxarakïma.
9Hierro thujrumpiw jupanakarux apnaqäta,
¡ñiq'i phukhunakarjamaw t'unjarakïta!” sasa.
10Aka uraqinkir reyinaka, amuyt'asipxam,
¡aka yatichäwinak sum yatiqapxam!
11-12Tatiturux axsart'añampi yupaychapxam;
jupan nayraqatapan khathatiñampi alt'asipxam,
q'apisini ukapachasti,
jiwarataw uñjasipxasma,
Tatitun jank'aki q'apisirïtap layku.
¡Jupampi arxatayasirinakax kusisiñanïpxiwa!
Who We AreWhat We EelieveWhat We Do
2025 by iamachristian.org,Inc All rights reserved.
