2 SAMUEL 17 - Qullan Arunaka DC

Husai chachax Ahitófel jaqin amtatap t'unji

1Uka qhipatsti Ahitofelax Absalonaruw säna:

—Nayar tunka payan waranqa jaqinak ajllisiyita, ukatsti jichha arumpachaw Davidar arktañatak mistuwayä.

2Ukatsti jupax ch'ama thayjtata, qaritaraki jikxatasiskani ukapachaw nayax jupar jalxatä, walpun axsarayä, jaqinakapasti jaltxapxaniwa, nayax reyirukiw jiwayä,

3ukatsti jank'akiw markpachar jumamp sumankthapiyä, kamisatix jichhaki jaqichasir warmix chachapamp sumankthapki ukhama. Jumax mä jaqin jiwañapak thaqhasktaxa; ukatsti taqpach markaw sumankxapxani —sasa.

4Uka amtäwisti, Absalonatakisa, Israelan amuyt'ayirinakapatakis walikïnwa.

5Ukampis Absalonax Husai arquita jaqiruw jawsayanirakïna, jupan amuyt'äwip yatiñataki.

6Husai jaqisti purinïnwa, ukat Absalonax jupar säna:

—Davidar jichhpach arktapxam sasaw Ahitofelax iwxt'apxitu. ¿Wakisispati uk lurañaxa? ¿Kamstas jumaxa? —sasa.

7Husai chachasti sarakïnwa:

—Ahitofelan amtatapax jichha kutix janiw walïkiti.

8Jumax askiw yattaxa, awkimampi, jaqinakapampix jan axsarir chachanakätapa, jichhasti wali q'apisitäsipkpachawa, kamisatix mä osax qallunakap apaqatax wal qhuruchaski ukhama. Ukhamarus awkimax nuwasiñ yatir jaqiwa, janiw arumax mayni jaqinakap taypin qhantatkaspati.

9Jichhas yaqha chiqan mä putun imantatäskpachawa. Ukhamaraki juman soldadonakaman nayrïr nuwasïwin mä qawqhani jiwaqatapatix ist'asini ukapachasti, yaqhipanakax juman arkirinakaman q'ala tukjatäpkaspas ukham amuyxapxani;

10uk ist'asasti, jan axsariri, leonar uñtat wali ch'amanïki ukasa, q'alaw mayjt'asxarakini; Israel markansti taqiniw yati, awkimampi arkirinakapampix jan kunsa axsarir jaqinakäpxatapa.

11Nayasti jichhax amuyt'ayirismawa: israelitanakax taqpachani jumamp tantacht'asipxpan, Dan chiqata, Beerseba chiqakam utjiri israelitanaka; uka jaqinakax quta iranankir ch'allar uñtasita jan jakt'kayarakiwa, ukatsti nuwasïwin juma kipkaw jupanakar sarayäta.

12Ukat awkimarux kawki chiqankkanitix ukan katuntañäni. Juparusti kamisatix sullax uraqir purxatki ukhamaw purxatañäni; janiw jupasa, jaqinakapat maynisa, qhispkaniti.

13Jupatix mä markar imantasispa ukaxa, taqpach israelita jaqinakaw phalanak apasiñäni, ukatsti, mayat mayat qalanakapsa jawirarkam uka marka qatatiñäni, ukansti janiw mä qalas inak qhiparkaniti —sasa.

14Absalonampi, taqpach israelitanakampisti sapxänwa: “Husai arquita chachan amuyt'atapax, Ahitófel jaqin amtäwipat sipan juk'amp sumawa” sasa. (Tatituw Ahitófel jaqin amtäwinakap t'unjatäñap munatayna, ukhamat Absalonan jan walt'añan uñjasiñapataki.)

15Uka qhipat Husai jaqix Sadoc, Abiatar sacerdotenakar yatiyäna, kuntix Ahitofelax Absalonampiru, jilïr jaqinakampir iwxkatayna ukxata; kuna amuyt'äwi arunaktix jupa pachpas iwxt'karakitayna ukampita,

16ukhamat Davidar jank'ak yatiyapxañapataki, uka arumax jan wasar pampankaskañapataki, jan ukasti Jordán jawirat khurkatar makhatxañapataki, ukhamat Davidasa, jaqinakapasa jan jiwarayat uñjasipxañapataki.

17Ukchañkamasti, Jonatán, Ahimaas sacerdotenakax Roguel uma jalsu chiqan suyasipkäna, jupanakax janiw khitimpis markar mantir uñjayasiñ munapkänti, mä uywat tawaquw jupanakar yatiyir saratayna, ukatsti jupanakax jank'akiw David reyir yatiyir mistupxarakïna.

18Ukampis mä q'axu waynaw jupanakar uñjatayna, ukat uka waynax Absalonar yatiyir saräna. Jonatanampi, Ahimaasampisti jank'akiw jaltxapxäna Bahurim sat markan jakir mayni jaqin utaparu, ukar purisinsti, uta anqäxan utjkatayna uka phuch'uruw imantasipxäna.

19Ukatsti uka utanin warmipax mä qhuphiñampiw phuch'ur imxatäna, uka patxarusti jawq'at trigo willitatarakïna. Ukhamat jan khitis ukawjan phuch'u utjatap amuykänti.

20Absalonan arkirinakapax uka utaru purinipxipansti, warmiruw jiskt'apxäna:

—¿Kawkinkapxis Ahimaas jaqimpi Jonatanampixa? —sasa.

Warmisti ukxaruw sarakïna:

—Aka chiqa sarakipawayasin, jawir tuqiruw sarapxi —sasa.

Absalonan arkirinakapasti jank'akiw jupanakar thaqtir sarapxäna, ukampisa jan jikxatxasax, Jerusalenaruw kuttawayxapxäna.

21Absalonan jaqinakapan sarxatapatsti, Ahimaasampi, Jonatanampix uma phuch'ut mistxapxäna, ukatsti jank'akiw David reyir yatiyir jalapxäna; juparusti sapxarakïnwa: “Jank'ak sartasim, jawir khurkatar makhatxam, Ahitófel jaqix jumanakar katuntañatakiw Absalonar amuyt'ayatayna” sasa.

22Ukhamasti Davidampi, jupamp chikt'atapkän uka jaqinakampix sartasin jank'akiw Jordán jawir khurkatar makhatxapxäna. Qhipärmanthi willjtasti taqiniw makhatxatayna, janiw maynis qhiparkataynati.

23Ahitófel jaqisti jupan amtataparjam jan lurapxatap uñjasax, asnop wakicht'asisin yurïwi markapan utjir utaparuw sarxäna; ukatsti wila masinakapan jan walt'añanakap taqi kun sumar askicht'xasinsti, jaychkatasïnwa. Ukhamaw jupax jiwxäna, ukatsti awkipan amay imäwipar imt'atäxänwa.

Davidax Mahanaim chiqankiwa

24Davidax Mahanaim chiqaruw purïna, ukchañkamasti Absalonax taqpach israelita jaqinakampiw Jordán jawira makhataskäna.

25Absalonax Amasá jaqiruw ejerciton jilïripat Joab lanti uskutayna. Amasá jaqix Itrá sat mä ismaelita jaqin yuqapänwa, jupasti Abigail warmimpiw jakäna, uka warmisti Nahas sat jaqin phuchhapänwa, Seruiá jaqin kullakapa, Joab chachan taykapa.

26Absalonasti israelita jaqinakampix Galaad uraqin utjnuqtäna;

27ukchañkamasti, Davidax Mahanaim chiqaruw purïna, jupar katuqiristi: Sobí sat Nahas jaqin yuqapampi, Amielampin, Barzilai warmimpin Maquir sat yuqapampiw mistunipxäna. Sobí jaqix Rebá sat amonita markankirïnwa, Maquir jaqisti Lodebar markankirïnwa; Barzilai warmisti, Galaad uraqinkir Roguelim markankirirakïnwa.

28Jupanakasti Davidatakix ikiñanaka, chuwanaka, ñiq'i phukhunak aparapipxäna; ukhamarak trigo, cebada, jak'u, grano jamp'ita, habas, lentejas,

29misk'i, vaca lechet lurat queso, oveja lechet lurat queso, Davidampi, jupa chik sarir jaqinakampi manq'asiñapataki; wasar tuqit jutasin manq'at wali awtjata, umatsa pharjat jikxatasipxatap amuyasina.