SALMOS 9 - Qullan Arunaka DC

SALMO 9Diosan aski kankañapar jach'añchaña 1 Davidan q'uchupa.

1 1 (2) Tatay,

taqpach chuymaxampiw yupaychsma

muspharkañ luratanakamat yatiyasa.

2 2 (3) Alaxpachankir Diosay,

jumïpan kusisiñat arnaqasiñ munta;

sutimaruw q'uchunak q'uchuñ munta.

3 3 (4) Uñisirinakaxax juman nayraqatamat jaltxapxiwa;

tinkurapxiwa, jiwarapxarakiwa.

4 4 (5) Jumätaw chiqap taripirixa:

qunuñamar qunt'asaw nayarux chiqapar uñjista.

5 5 (6) Jumar jan yupaychir markanakarux tuqinuqtawa,

ñanqha lurir jaqinakarux t'unjtawa,

sutipsti jan mayampitakiw chhaqtaytaxa.

6 6 (7) Uñisirix jiwatäxiwa,

jupamp chikaw markanakapax t'unjataraki,

sutipasti wiñayatak chhaqtayatawa.

7 7 (8) Ukampis Tatitux wiñayatakiw reyit qunt'asi;

taripañatakiw qunuñap sum utt'ayasi:

8 8 (9) aski kankañampiw akapacharux taripani,

markanakarusti chiqaparuw uñjani.

9 9 (10) T'aqhisiyat jaqinakarux Tatituw arxataski,

jupaw llakisiñ pachanakan imaski.

10 10 (11) Tatay,

jumar uñt'irinakax jumaruw katuyasipxtam,

jumar thaqhirinakarus janipuniw apanukktati.

11 11 (12) Sión qullun jakir Tatitur q'uchupxam;

muspharkañ luratanakap markanakar yatiyapxam.

12 12 (13) Tatitux t'aqhisirinakat amtasipuniwa,

jachatanakapatsa janiw armaskiti,

jupanakar t'aqhisiyirinakarux mutuyiwa.

13 13 (14) Tatay, nayat khuyapt'ayasita,

uñisirinakaxan nayar t'aqhisiyatap uñtanim,

¡jiwañ punkutsa wayst'asita!

14 14 (15) Ukhamat Jerusalén punkunakanxa,

taqi jaqinakar Tatitur yupaychapxam sä,

nayar qhispiyatamat kusisitaxsa yatiyarakï.

15 1 (2) Jumar jan uñt'ir jaqinakax

jupanakan wakichat sipitaruw jalt'apxi;

kayunakapax jupanakan imantat

pachpa sipitapan simpantatawa.

16 16 (17) Tatitux chiqapar uñjirïtap uñt'ayasi:

ñanqha lurir jaqisti

pachpa sipitaparuw jalt'i.

17 17 (18) Ñanqha lurir jaqinakampi,

Tatitur jan uñt'irinakampi,

jupat armasirinakampix

jiwañ mik'ayan jiwarapxani.

18 18 (19) T'aqhin jakir jaqinakax janipuniw armatäpkaniti,

janirakiw suyt'añapas wiñayatak tukuskaniti.

19 19 (20) Tatay, sartasikimaya;

janikiy jaqin jach'a jach'a tukuñaparux walikiw samti;

¡jumar jan uñt'irinakarux nayraqataman taripam!

20 20 (21) Tatay, axsarañ chuymay jupanakarux churam,

¡jupanakax jaqikïpxatap yatipxpan.