DEUTERONOMIO 14 - Qullan Arunaka DC

1“Jumanakax Tatit Diosaman wawanakapäpxtawa. Maynitix jiwani ukkhaxa, jan jumanakax janchinakam kharintasipxamti, janirak ñik'utanakamsa mururasipxamti.

2Jumanakax Tatit Diosamatak yaqhachat markäpxtawa; jupaw aka uraqin utjir taqi markanak taypit jumanakar ajllisipxtam, jupan markapäpxañamataki.

Manq'añ animalanakampita, jan manq'añ animalanakampita(Lv 11.1-47)

3Moisesasti saskakïnwa: “Jan jumanakax kuna q'añunaksa manq'apxamti.

4“Aka uywanak jumanakax manq'asipkasma: Urqu vacanaka, urqu ovejanaka, cabritonaka,

5tarujanaka, gacelanaka, gamos sat animalanaka, qullun jakir cabritonaka, kunayman antílope sat animalanaka.

6Jumanakasti ch'uxñanak khisthuri, sillunakapas payar jaljtatäki uka animalanakan aychap manq'asipkasmawa.

7Ukampisa janiw camello, wank'u, tejón uka animalanak manq'apxätati, ch'uxñanak manq'irïskpansa, sillunakapax jaljtatäskpansa. Uka animalanakarusti q'añut uñt'apxäta.

8“Janirakiw khuchhi manq'apxätati, kayunakapan sillunakapax jaljtayatäkchi ukasa, janiw ch'uxñanak manq'asin khisthupkiti uka layku. Q'añu animalat uñt'apxäta. Janiw uka animalan aychap manq'apxätati, janirakiw jiwat janchipsa llamkt'apxätati.

9“Uma manqhin jakir animalanakatsti kawkïrinakatix jisk'a chhiqhanakanïki, k'ilinïki ukanak manq'apxäta,

10ukampis jan chhiqhanïki, janirak k'ilinïki uka animalanak janiw manq'apxätati; ukarusti q'añut uñt'apxäta.

11“Ukatsti chhiqhani q'uma animalanak manq'asipkasmawa.

12Ukampis janiw chhiqhani animalanakat akïrinak manq'apxätati: pakalinaka, ch'akhanak p'akintir satäki uka pakalinaka, uman sarnaqir pakalinaka,

13aycha manq'ir

14kunayman jamach'inaka,

15avestruz sat jach'a jamach'i, arum sarnaqir ch'usiqa, qillwanaka, gavilán sat jamach'inaka,

16arum sarnaqir juku, ibis sat jach'a surun jamach'inaka, cisne sat jach'a kunkan jamach'i,

17ukatsti pelícano, siwiq'ara, cormorán sat uman sarnaqir jamach'i,

18cigüeña sat uman jakir jamach'i, abubilla sat laq'unak manq'ir jamach'i, chiñi, taqi ukanaka.

19“Chhiqhani laq'unakxa q'añut uñt'apxäta janirakiw ukanak manq'apxätati.

20Ukampis q'umat uñt'atäki uka jamach'inakak manq'apxäta.

21“Janiw jumanakax jupapach jiwat animalanakan aychap manq'apxätati, jumanakax Diosatak yaqhachat markäpxtawa; ukampis ukanakxa yaqha markat jutiri, jumanak taypin jakir jaqirux churasipkasmawa; jupax manq'askaspawa; jan ukax markam chiqa sarakipir jaya jaqiruw uk aljasipkarakisma.

“Janiw cabritonakan aychapxa taykapan lechepar phayapxätati.

Sapa tunkat maya churañxat yatichäwinaka

22“Sapa maraw jumanakax jan armasisa taqpach grano achunakamat sapa tunkat maya yaqhachapxäta.

23Sapa tunkat mayäkis uka trigo, vino, aceite yaqhachatxa, ukhamarak vacanakamana, ovejanakamana nayrïr wawachat qallunakapatxa, jumanakax Tatit Diosaman nayraqatapan manq'apxäta, kawkha chiqarutix Tatit Diosamax utjäwipatak ajlliskani uka chiqana, ukhamat Diosar yupaychañ yatiqapxäta.

24Ukampisa Diosatix jumanakar waxt'äwinakap churapxstam, ukatsti sapa tunkat maya churañäki ukanak jan apirjamäpksta, Diosax jupan utjäwipatak ajlliski uka chiqan wali jayätap layku,

25ukapachasti jumanakax uka sapa tunkat mayxa aljxapxätawa, uka aljat qullqinaksti Tatit Diosamax jakañatak ajlliski uka chiqaruw apapxarakïta.

26Uka qullqimpisti kuntix munapkäta ukanak ukawjan alasipxäta: vacanaka, ovejanaka, vino, p'usqtata umañanaka; taqi kuntix jumanakax munapkäta ukanaka, ukatsti uka pachpan manq'apxäta Tatit Diosaman nayraqatapana, wila masinakamamp chikaw k'uchirt'asipxarakïta.

27“Markanakaman jakir levitanakarusti janipuniw apanukupxätati, jupanakasti janiw uraqinak jumanakjam katuqapkiti.

28“Sapa kimsa maraw jumanakax taqi achunakamat sapa tunkat maya apaqapxäta, uka juyranaksti markanakamaruw imapxarakïta.

29Ukhamat jan uraqini levitanakasa, jumanak taypin jakapki uka jayat jutir jaqinakasa, wajchanakasa, ijma warminakasa sist'asiñkam manq'apxañapataki. Aka yatichäwinaktix jaysapxätaxa, Tatit Diosamax taqi luratanakaman aski waxt'äwip churapxätam.