EZEQUIEL 48 - Qullan Arunaka DC

Israel ayllunakar jaljat uraqi

1-7“Akapï Israelan ayllunakapan sutinakapaxa: Uraqix jupanakaruw lakintatäni, amsta tuqi qurpat qalltasa, Mediterráneo sat jach'a qutat qalltanki, ukatsti Hetlón, Hamat, Hazar-enán markanak chiqa sarakipki, Damasco, Hamat sata markanakan aynach tuqi uraqinaka; sapa aylluw mä uraqi katuqani inti jalsu tuqi qurpata, inti jalanta qurpakama, akhamarjama:

Dan

Aser

Neftalí

Manasés

Efraín

Rubén

Judá.

8“Ukxarusti kawkïr uraqitix yaqhachatäki ukarak tupt'apxäta, uka uraqisti inti jalanta tuqita inti jalsu tuqikamaw purini. Uka uraqisti iramarux pä tupu chikatanïniwa, sayt'urusti kawkïr uraqinakatix inti jalsu tuqita, inti jalanta tuqikam tupt'askixa uka pachpa tupunïniwa. Tatitun utapax uka taypinkaniwa.

Tatitur katuyat uraqi(Ez 45.1-6)

9“Uka uraqita, Tatitutak yaqhachata t'aqa uraqisti sayt'urux pä tupu chikatanïniwa, iramarusti pä tupurakïniwa.

10Uka uraqi taypinsti mä t'aqa uraqiw utjarakini sacerdotenakatak yaqhachat uraqi; uka uraqisti amsta tuqitsa aynach tuqitsa pä tupu chikatanïniwa, inti jalanta, inti jalsu tuqitsa mä tupurakïniwa. Tatitun utapax uka taypinkaniwa.

11Uka uraqisti, Tatituru katuyatäpki uka sacerdotenakatakïniwa, jupanakasti Sadoc chachan wawanakapawa, nayar taqi chuyma luqtirinaka, janirakiw mayni israelitanakjam nayar apanukusin yaqha thakhinakanjam sarnaqapkiti, kunjämatix levitanakax israelitanakampi chika sarapxäna ukhama.

12Ukatpï sacerdotenakax levitanakampi chika mä yaqha uraqinakanïpxanixa, Tatitutak sat yaqhachatäki uka taypina, uka uraqisti aski qullanapunïniwa.

13Levitanakasti, sacerdotenakampi chika uraqinakanïpxaniwa, uka uraqisti sayt'urux pä tupu chikatanïniwa, iramarusti mä tupurakïniwa. Kawkïr uraqitix Tatitur luqtatäki ukasti sayt'urux pä tupu chikatanïniwa, iramarusti pä tupunirakïniwa.

14Uka uraqisti markpachan taqi uraqinakat sipansa suma uraqipunïniwa. Uka uraqisti janipuniw aljaskaniti, kunampis turkatäkaniti, janirakiw yaqharus churatäkaniti, jan ukasti Tatitutak luqtatapunïniwa.

15“Ukat jilt'ki ukasti kunatix sayt'urux pä tupu chikatanïki, iramarusti chikat tupükaraki uka uraqix janiw maya uraqjam qullanäkaniti. Ukan jaqinakax jakasipkaspawa, uywa awatisiñ chiqanakas ukankarakiniwa. Markasti uka uraqi taypinkarakiniwa,

16uka markasti taqi tuqit pä waranqa pä pataka phisqa tunkani metronïniwa.

17Uka marka thiyanakansti uywa awatisiñanakaw utjani, puspach tuqirusti iramarux pataka phisqa tunkani metronïniwa.

18Uka marka thiyanakansti mä uraqiw jilt'atäski, uka uraqisti Tatitur luqtatäki uka uraqi thiyankiwa, inti jalsu tuqiru, inti jalanta tuqirusa sayt'urux mä tupunkamawa. Aka uraqisti yapuchañatakïniwa, ukan achur juyranakasti markankir jaqinakan manq'añapatakïniwa.

19Markan irnaqirinakasti, israelitanakat kawkïr ayllunkirïpasaya, uka uraqxa yapuchasipxarakiniwa.

20Taqi uka yaqhachat uraqisti kunatix Tatitur luqtata satäki, kunatix markankkaraki uka uraqinakax pusi tuqit pä tupu chikatankamäniwa.

Marka apnaqirin uraqinakapa(Ez 45.7-8)

21-22“Marka apnaqirirusti, Judá, Benjamín ayllunakan uraqip taypinkki uka uraqinakat wakt'ani; kawkïr uraqitix Tatitur katuyat uraqi jak'ankki, markan uraqip jak'ankki uka uraqinaka. Iramarusti uka uraqix pä tupu chikatanïniwa, ukasti inti jalsu tuqinkkis uka qurpakamaw purini, inti jalanta tuqirusti jach'a qutakamaw purirakini. Tatitutak satäki uka uraqix taypiruw qhiparani, Tatitun utapamp chika, levitanakar churatäki uka uraqimpi, markan uraqinakapampi.

Yaqha ayllunakan uraqinakapa

23-27“Yaqha ayllunakan uraqinakapasti aynach tuqinkiwa. Sapa aylluw uraqinakap katuqani inti jalsu tuqinkir qurpata inti jalanta qurpakama, akhamarjama:

Benjamín

Simeón

Isacar

Zabulón

Gad taqi ukanaka.

28“Gad sata uka uraqit aynacha tuqirusti, qurpax Tamar sata ukatpachäniwa, Meribá-cadés sata uka uraqi chiqa sarakipasa, Egipto jawiranjama, Mediterráneo sat jach'a qutar puriñkama.

29“Israelan ayllunakapax uka tuti uraqinak katuqapxani, jumanakasti ukham uka uraqinak jalanuqapxarakïta. Naya, Tatituw uk arsta.

Jerusalén markan punkunakapa

30-34“Uka markasti mä pirqampi muytayatäniwa, uka pirqasti sapa pusi tuqipatpach pä waranqa pä pataka phisqa tunkan metronïniwa. Uka pirqanakansti sapa thiyanxa kimsa punkunakaw utjani, sapa maya punkusti Israelan ayllunakapan sutipanïniwa, akhamarjama: Amstäxankir punkunakax Rubén, Judá, Leví sutini punkunaka; inti jalsu tuqinkir punkunakasti: José, Benjamín, Dan sutini punkunaka; aynach tuqinkir punkunakasti: Simeón, Isacar, Zabulón sutini punkunaka; inti jalanta tuqinkir punkunakasti: Gad, Aser, Neftalí sutini punkunaka.

35Marka muyta pirqasti taqpachax sayt'urux llätunka waranqa metronïniwa, akat uksarusti uka markan sutipax: ‘Tatitun Utapa’ satäniwa.”