EZEQUIEL 21 - Qullan Arunaka DC

Diosax Jerusalén markaruw mutuyi

1 1 (6) Tatitusti ukat sarakituwa:

2 2 (7) “Ezequiel, Jerusalén marka tuqir uñtam, ukatsti ukankir templotak arunakam arsum. Nayan sutixar Israel markatak arsum

3 3 (8) akham sasa: ‘Tatitux akham siwa: Nayax jumanakan uñisirimaruw tukta. Espadaxampiw aski jaqirusa, ñanqha jaqirus jiwarayä.

4 4 (9) Jïsa, nayax espadax apsusisin taqinirus jiwarayä, juchanirusa jan juchanirusa, amstat qalltasa, aynach tuqir tukuyasa.

5 5 (10) Taqi jaqinakaw yatipxani, naya Tatitux espada apsuskta ukkhax, jan walt'aña utjatapa.’

6 6 (11) “Jumasti Ezequiel, jichhax walpun jacham, chuymamax q'ala chhaqtatäkaspas ukhama; taqi jaqinak nayraqatan jacham.

7 7 (12) Ukattix jumaru jiskt'apxätam ¿kunatsa jachta sasaxa? Jupanakarux sarakim: Mä jan wali lurasïwin puriniñap yatta, taqi jaqinakasti jan ch'amanjamaw uñjasipxani, jan kunsa lurirjama, taqpachanin chuymapax llakthaptani; taqinis axsarañat khathatipxani. Ukasti niyaw purisinki, phuqhasiñapasti niya jak'ankxiwa, sasa. Naya, Tatituw uk arsta.”

8 8 (13) Tatitusti sarakituwa:

9 9 (14) “Jumasti Ezequiel, nayan sutixar parlam, naya Tatitun jumar uk parlañamatak mayitax yatiyarakim akham sasa:

“ ‘¡Espada, espada!

Suma ariptayatawa, llijkirirakiwa.

10 10 (15) Jiwarayañatak ariptayatawa,

lliju llijunak sarayañatak suma llijkir tukuyatawa;

11 11 (16) maynin apxaruñapatak ukham llijkir tukuyatawa.

Espadasti ariptayatawa,

suma llijkir tukuyatawa,

jaqi jiwayirin amparapar katuyañataki.

12 12 (17) Jumasti, ¡arnaqasim, wararirakim,

ukasti markaxar jiwarayañatak uchatawa,

Israel markan taqi irpirinakapar jiwarayañataki!

Jupanakasti markaxampi chika

jiwarañatak juchañchatäpxiwa,

ukhamax uka ayquñat chuymam liq'isim.

13 13 (18) Naya, Tatituw uk arsta.’

14 14 (19) Jumasti Ezequiel,

nayan sutixar parlam:

“¡Espadax jiwaraypan!

¡Mayampi mayampsa jiwarayaskakpan!

¡Taqinis axsarañat khathatipxpan!

¡Taqpachaniw katuntatäpxi!

15 15 (20) Taqi utanakaparuw

uka jiwarayir espada uskurakta;

lliju llijunak sarayañataki,

suma llijkir tukuyat espadawa,

jiwarayañatak ariptayat espadawa.

16 16 (21) Ukham ariptayata munsma,

ch'iqarusa, kupirusa,

uksarusa, aksarusa kharinuqaskiri.

17 17 (22) Uka espadax jiwarayaskakpan,

q'apisiñaxan samarañapkama.

Naya, Tatituw uk arsta”.

18 18 (23) Tatitusti sarakituwa:

19 19 (24) “Pä thakhi lurt'am Babiloniankir reyin espadapampi sarakipañapataki. Uka pä thakhisti pachpa markat mistuniñapa, thakhi qalltarusti mä chimpu uskurakïta, kawkirutix uka thakhix sarki uk yatiyañataki.

20 20 (25) Mayïr chimpusti amonitanakan Rabá sat marka tuqiruw chiqañchani, payïr chimpusti Jerusalén marka tuqiruw chiqañcharakini, Judá uraqinkir suma uyuchrantat markaru.

21 21 (26) Babiloniankir reyisti kawkhantix pä thakhix qalltki uka chiqaruw sayt'asi, ukatsti suerte tuqiw uñakipi: mich'inakapsa walpun uksat aksat uñakipi, diosanakaparuw jiskt'asi, uywanakan k'iwchanakap uñxataraki.

22 22 (27) Kupi amparaparuw Jerusalén marka tuqiru uñtat mich'ix misturaki, ukasti Jerusalén markar nuwasiñ yänakampi nuwantañataki, jiwarayañatak arsuñataki, nuwasïwi utjatapa art'asiñataki, punkunakap k'upsuñataki, pirqanakap jak'ar makhatañanak sayt'ayañataki, taqi tuqit markar muyuntañataki sañ muni.

23 23 (28) Ukampis Jerusalén markan jakir jaqinakatakix uka arunakax mä k'ari profecía arunakäkaspas ukhamawa, arust'äwinak lurapxatap layku. Ukampis aka arunakax juchanak lurapxatapat arsüwi arunakawa, kunjämatix jupanakax katuratäpkani uka yatiyäwi arunakarakiwa.

24 24 (29) Ukatpï naya, Tatitux sistxa: ‘Jumanakan ñanqha luratanakamampi, jaqi jiwayatanakamampix taqi chiqan qhan uñsti; uka jucha luratanakamasti qhanakiw uñstaski. Ukatpï jichhax katurat uñjasipxätaxa.’

25 25 (30) Jumarusti, Israel markan reyipa, jaqi jiwayir ñanqha rey, qhipa mutuyäwi katuqañam urux jumatak niyaw purinxi.

26 26 (31) Naya, Tatituw arsta: ‘P'iqi ch'uqasiñam apaqapxätam, pillumsa aparapxätamwa; taqi kunas mayjt'atäniwa. ¡Kunatix jichhürux alayankki ukax, qharürux aynachankaniwa, aynachankiristi qharürux alayankaniwa!

27 27 (32) Aka markarux q'al t'unjä, t'una qullükaspas ukham mayjar t'unthapit tukuyarakï. Taqi akanakasti Babiloniankir reyix jutkani ukkhaw ukham lurasini. Juparuw ukham lurañapatak mayirakta.’Diosax amonitanakaruw mutuyani

28 28 (33) “Jumasti Ezequiel, nayan sutixar Israel markar jisk'achiri amonita jaqinakar sarakim: ‘Espadax jumanakar jiwarayañatakix niya wakicht'atawa, lliju llijunak sarayañatak suma llijkir qaqsutawa, taqi kun t'unjañatak wakicht'atawa.

29 29 (34) Unañchäwi uñjatanakamasa, qhipa urunakan luraskani ukanakxat parlatanakamas k'arikamakiwa. Espadasti ñanqha luriri jaqi jiwayir jaqinakxaruw purini, p'iqinakap khuchhuqani. Mutuyäwi katuqañ pachapasti niya jak'ankxiwa.’

30 30 (35) “¡Babilonia, uka espadam imasxam! Nayaw jumarux pachpa markaman taripäma.

31 31 (36) Jumxaruw phiñasiñaxa mä nakhantir ninjam warxatanï; ukatsti jan khuyapayasiñan qhuru jaqinakan amparaparuw katuyäma.

32 32 (37) Nakhantata, t'unjataw uñjasïta; wilamasti taqi uka uraqpachan jalani, janirakiw khitis jumat mayampsa amtaskxaniti. Naya, Tatituw uk arsta.”