1Israelitanaka, arunakax ist'apxitaya;
jumanak tuqi arsuta llakisiñ arunaka:
2Suma q'uma Israel markax tinkxiwa;
jan mayampi sartkiriw liwisxi.
Pachpa uraqipxar liwitattataw qhipari,
janiw khiti waytiris utjkiti.
3Tatit Diosax israelitanakar akham siwa:
“Mä markatix waranqa chachanaka nuwasiñar khithanixa,
patakanikiw kutt'anxani;
mä markatix patak chachanaka khithanixa,
tunkanikiw kutt'anxarakini.”
4Tatitux israelitanakar akham siwa:
“Nayar thaqhapxita, ukatsti jakasipkätawa.
5Betel markar jan thaqhapxamti,
Guilgal markarus jan sarapxamti,
janirak Beerseba marka chiqsa sarakipapxamti,
Guilgal markasti katuntat apatäniwa,
Betel markasti q'ala t'unjatarakïniwa”.
6Tatitur thaqhapxam, ukatsti jakasipkätawa;
jan ukham lurapkäta ukasti,
jupax Israel markarux nina apayanini,
janirakiw uk jiwayirix khitis Betel markan utjkaniti.
7¡Ay kunakïkan jumanakatakixa,
chiqa kankañsa k'allk'uruw tukuyapxtaxa,
aski kankañarusa takichasipxaraktawa!
8-9Tatituw jan jakt'kay warawaranak luri,
jupaw ch'amak arumar qhanjtayi,
uru qhansti ch'amak arumar tukuyaraki;
qutankir umanaksa qinayanak tuqiw
waña uraqir warxati;
jupaw ch'aman jaqinakarux atipji,
markan jach'a pirqanakapsa allinuku.
Sutipasti, Tatitu Diosawa.
10¡Ay kunakïkan jumanakatakixa, chiqap uñjirirux uñisipxtawa,
chiq qhanañchañatak sayt'irirus ñanqhachapxtawa!
11Janiw qalat lurasipkta uka suma utanakan jakapkätati,
janirakiw uka suma uva yapunak yapuchasipkta ukatsa vino umapkätati,
wajchanakar jisk'achapxatamata,
trigotsa impuestonak apsupxatamata.
12Nayax ñanqha luratanakam yattwa,
walja juchanakamsa uñt'araktwa:
aski jaqirux qullqi chilltayasisaw t'aqhisiyapxtaxa,
taripañ utanakansti wajchanakan aynacht'añap thaqhapxtaxa.
13Urunakan jan walïxatapatxa,
yatiñan jaqinakax janiw parlañ munkxapxiti.
14Kunatix askïki uk thaqhapxam,
jan walïki uksti apanukupxam,
ukhamat jakapxañamataki.
“Taqi ch'aman Tatitux jiwasampïskiwa” sasa parlapxatamas ukhamat chiqarakïni.
15¡Jan walïki uk uñisipxam!
¡Sumäki uksti munapxam!
Taripañ utanakan chiqapar uñjañax utjpan;
inach taqi ch'amani Tatitux Israel markat jilt'irinakarux khuyapt'ayasispa.
16Taqi ch'aman Tatitux akham siwa:
“Taqi plazanakan jachañax utjani,
marka thakhinakansti warariñanakaw utjani,
pampan utjasirinakarusti llakisiñat jachiritakiw jawsapxani,
jachañatak jawsatanakasti juk'ampiw jachapxani.
17Kunapachatix nayax mutuyir jutkä ukkhaxa,
taqi uva yapunakan jachapxani.”
Ukham siw Tatituxa.
18¡Ay kunakïkan Tatitun urup puriniñap munirinakatakixa!
¿Kunjämäkanitix jumanakatak uka urux uk yatipxtati?
Uka urux ch'amakäniwa, janiw qhanäkaniti.
19Kunjämatix mä jaqix leonan nayraqatapat jaltkasax mä osompirak jalthapki ukhamäniwa,
jan ukax, maynix utapar mantasin amparap pirqar aykatasa katarimpi mich'intayaski ukhamäniwa.
20Jïsa, Tatitun urupax ch'amakäniwa; janiw qhanäkaniti;
laxa ch'amakaruw tukuni, janiw akch'a qhanas utjkaniti.
21“Nayax jumanakan uruyañ urunakam uñistwa, janiw yäqkaraktsa,
jach'a tantachasïwinakamas janiw kusisiykituti.
22Nayar jach'añchasa wilañchanak luqtäwinakam janiw munkti,
janirakiw granonakat waxt'anak luqtapkista ukanak munkti;
janiw katuqkäti lik'i vaca qallunak sumankthapiñ wilañcha luqtatanakamsa.
23¡Q'uchutanakaman uxutap nayat jithiqayapxita!
¡Janiw arpa jat'itanakamsa ist'añ munkti!
24Ukat sipana, chiqapar uñjäwix walja umanakjam jalpan,
askin sarnaqañasti
jalsur umjam jan tukuskirïpan.
25“Israelitanaka, jumanakax pusi tunka mara wasaran sarnaqkasaxa, janipuniw waxt'äwinaksa, wilañchanaksa luqtapkistati.
26Ukampis jichhax Sicut, Quiiún, jumanakan lurat uka diosanakam apasxapxañamäniwa.
27Jumanakarux Damasco markatsa juk'amp jayaruw jaqunukupxäma.” Taqi ch'aman Tatitux ukham siwa. Ukarakiw sutipaxa.
Who We AreWhat We EelieveWhat We Do
2025 by iamachristian.org,Inc All rights reserved.
