APOCALIPSIS QALLTA ARUNAKA - Qullan Arunaka DC

QALLTA ARUNAKAAka qillqatan sutipax “Kunatix jamasankki uk qhanstayaña” sañ muni. Juan apostolun qillqatawa, jupax Jesucristo Tatitun luqtiripawa, khitinakatix Cristor iyawsapki ukanakan jilaparakiwa (1.1-2). Juan apostolux Patmos quta wat'an katuntat jikxatasitap qhanañchi, ukatsti kuntix Jesucristo pachpa jupar uñachaykatayna ukanak ukkhampach qillqatap qhanañcharaki (1.9-10).Aka qillqatax, Jesucriston yuritap qhipat qillqasïna (81-96 d.C.), uka maranakana, Domiciano sat reyin urunakapana, uka romano reyisti wali qhuru chuymampiw ukürunakanxa Cristor iyawsirinakar arknaqäna. Uka arknaqäwi utjipan Juan apostolux kunayman uñtasïwinak tuqi qillqäna. Uka qillqatapasti romano marka apnaqäwin ñanqha luratanakapat juchañchañatakiwa.Aka qillqatax kimsar jaljatawa (1.1—3.22; 4.1—20.15; 21.1—22.21). Nayrïr kimsa jaljanakax, Asia uraqin romano suyunkir paqallqu iglesianakar Jesucriston yatiyäwip apayat uñacht'ayi (1.11), uka arunakasti “taqpach iglesianakataki, kawkhantix jikxatasipki” ukanakatakïspawa. (4.1—20.15) uka jaljanakansti “kharinukutäkän” uka Corderot parli, “jupan munañanïñ kankañampi, qamir kankañampi, yatiñ kankañampi, ch'aman kankañampi, jach'añchäwimpi, yupaychäwimpi katuqañapas askïtapa” (5.12). Qhipa pä jaljanakansti, luraskani uka machaq alaxpachampita, machaq uraqimpita, machaq Jerusalén markampit parli, kawkintix Diosax markapankirinakampi jakkani uka markata (21.3).Kunayman amuyunak aka qillqatat sapxi, juk'ampi arsuñasti utjarakispawa. Ukampisa, aka qillqatan suma qhanstiri yatiyäwix akawa: Diosan pachpa yatiyäwipax Jesucristowa (19.13), uka Diosasti “jakiwa, jakapunïnwa, jichhax jutañampïskiwa” (1.8), “taqi akapachan wali ch'amani reyirakiwa” (19.16). Ukat iglesiaparux Dios chuymäpxañapat iwxt'i, akapachan utjir munañaninakax ch'amampi sartkchi ukasa, qhiparusti Cristow atipjani, iglesiapas atipjarakiniwa.