JEREMÍAS 11 - Qullan Arunaka DC

Arust'äwiru jan phuqhasitapa

1Tatitux naya Jeremiasaruw parlxayitu, ukatsti sarakituwa:

2“Israelitanakax aka arust'äwin arunakapar ist'apxpan, Judá uraqinkir jaqinakaru, Jerusalenankirinakarusa, parlxayam,

3ukatsti sarakim, naya Tatitu, Israelan Diosapaw sista: Kawkïr jaqitix aka arust'äwir jan phuqkani ukax ñanqhachatäniwa.

4Uka arust'äwsti, nayra awkinakapampiw lurta, kunapachatix Egiptot irpsunkäyät ukapacha, uka markasti jupanakatakix hierro umatatayañ hornjamänwa. Sarakïyätwa: Nayar ist'apxita, kuntix nayax sapkäma taqi ukanak phuqhapxam, ukhamat jumanakax nayan markaxäpxäta, nayasti jumanakan Diosamarakïyäwa.

5Jumanakatix nayar ist'apxitätaxa, nayax kuntix nayra awkinakamar juramentompi arskta uk phuqhapunïwa, mä suma uraqi churapxäma, kawkhantix walja suma manq'añanakax utjki uka uraqi. Uka uraqisti kawkhankapktatix jichhax uka uraqiwa.”

Nayasti saraktwa: “Ukhamapunïpanay Tata” sasa.

6Ukatsti Tatitux sarakituwa: “Taqi aka arunaksti Judá uraqinkir markanakana, Jerusalén markan thakhinakapan yatiyam. Jaqinakarusti sarakim: ‘Ist'apxam kawkïris aka arust'äwin arunakapax ukanaka, ukatsti phuqhapxarakim.

7Kunapachatix nayax awkinakamar Egiptot irpsunkäyäta ukapachax, nayaruk jaysapxita sarakïyätwa, ukatpacha jichhakamas uk saskakipuntwa.

8Ukampis janiw nayarux jaysapkituti, janirakiw ist'apkitusa, jan ukasti chuymanakapan jan wali amtatanakaparukiw arkxapxi. Janiw nayan arsut arunakar phuqhañ munapkänti, ukatpï jupanakxarux kuntix arust'äwin yatiykäyäta uka mutuyäwi apayantxa.’ ”

9Tatitusti saskakituwa: “Judá uraqinkir jaqinakampi, Jerusalén markankir jaqinakampix nayatak jan walinak amtapxi.

10Kuna juchanaktix nayra awkinakapax lurkäna uka pachpa jucha lurañanakaruw kuttapxi, uka awkinakapasti janiw nayarux ist'añ munapkitänti, ukatsti yaqha diosanakaruw arkxapxäna yupaychapxarakïna. Israel markasa, Judá markasa kuna arust'äwtix nayax nayra awkinakapampi lurkäyät ukanak t'unjapxi.

11Uka laykuw jichhax mä jach'a jan walt'añ jupanakarux apayanï, uka jan walt'añatsti janiw kawksarus jaltapkaniti. Yanap mayisas arnaqasisipkpan, janiw nayax jupanakar ist'käti. Naya, Tatituw uk arsta.

12Ukapachaw Judá uraqinkir jaqinakaxa, Jerusalén markan utjir jaqinakasa uka yaqha diosanakar yanap mayisir sarapxani, kawkïrinakarutix incienso luqtasipki ukanakaru, ukampis uka jach'a t'aqhisiñax purinkani ukapachaxa, uka diosanakax janiw qhispiyañatakix ch'amanïpkaniti.

13Judá markax walja diosanakaniwa, qawqhäkitix markanakapax ukkha, Jerusalenankir jaqinakasti Baal diosatakix walja altaranak sayt'ayapxi, qawqhäkitix markan thakhinakapax ukkharaki.

14Ukhamasti jumax Jeremías, jan nayarux aka markataki mayistati; jupanakarusti janiw ist'käti kunapachatix jan walt'añanak taypinkkasin yanap mayipkitani ukapachaxa.

15“Taqi uka jan walinak lurasinxa,

¿Israel munataxax kunsa nayan utaxan thaqhi?

¿Lik'i, aycha wilañcha luqtasati

uka jan walt'añ jumat jayarst'ayani?

¿Ukhamatcha uka jach'a t'aqhisiñat jaltxäta?”

16Naya, Tatitux juparux säyätwa:

“Suma ch'uxña olivo quqa,

suma achunakan phuqhantata” sasa.

Ukampis jichhax ninampiw laphinakap phichhantä,

¡mä jach'a arnaqasïwi taypinjam

alinakapsa q'al nakhantayä!

17“Naya taqi ch'aman Tatituw Israel markaru, Judá markarus aka uraqirux mä quqarjam ayruntta. Ukampis ñanqhanak lurapxatapata, Baal diosar yupaychapxatapat uka jan walt'añanak jupanakatak sartayta, ukham luratanakapampisti walpin phiñasiyapxitu.”

Jeremías profetan uñisirinakapax jupar jiwayañ munapxi

18Tatitux kuna jan walinaktix uñisirinakaxax amtapkäna ukanakat yatiyitu. Jupaw nayan amuyasiñaxatak nayranakaxsa uñatatayarakitu.

19Nayax mä khariñ ovejar uñtata aliqakiw ukankaskäyäta, janirakiw nayatak jan walinak amtapxatapsa yatkäyätti. Jupanakax sapxänwa: “Jichhax mä quqarjam tinkuyañäni, achunakapsa q'al tukjañäni; aka uraqin jakirinak taypitsa jik'inukuñäni, ukhamat khitis jupat jan mayampi amtasxañapataki” sasa.

20Ukampis jichhax taqi ch'aman Tatitu,

jumax chiqapa uñjirïtawa;

jumax jaqin amtatanakapsa yattawa.

Kunjämtix uka jaqinakar mutuykäta uk uñjayarakita,

nayasti amparamaruw taqi akanak katuyaraksma.

21Anatot chiqan jakir jaqinakarusti, kawkïrinakatix nayar jiwayañ amtapkäna ukanakax sapxarakitänwa: “Tatitun sutipxar jan juk'ampi parlkxamti, ukhamatsti janiw jiwayapkämäti” sasa.

22Taqi ch'aman Tatitux jupanakarux siwa: “Jumanakampix parlaskañäniwa. Yuqall wawanakamax nuwasïwin jiwarapxani, imill wawanakamasti manq'atjamaw jiwarapxarakini.

23Janirakiw jupanakat maynis qhiparkxaniti, Anatot chiqan utjir jaqinaka, jumanakar mutuyañ urux jutaskiwa, jumanakxarusti jach'a t'aqhisiñ apayanï.”