RUT 2 - Qullan Arunaka DC

Rut warmix Booz chachan yapupan irnaqi

1Noemí maman Elimélec chachap tuqit mä wila masipaw utjäna, Booz sutini, jupasti wali qamirïnwa, taqinin uñt'ataraki.

2Mä urusti, Rut warmix Noemí taykch'iparuw säna:

—Pampar sarä, inach khitis “cebada puyanak apthapis qhipax arkanita” sitani —sasa.

Ukatsti taykch'ipax: —Saramay wawa —sarakïnwa.

3Ukhamaw Rut warmix pampar saräna; yawthapirinakax jalaqtayapkäna uka cebada puyanak apthapisaw arkäna. Uka yapusti Booz chachankänwa, jupax Elimélec chachan wila masiparakïnwa.

4Ukürusti Booz chachax Belén markat yapup uñjiriw purïna, yawthapirinakarusti aruntarakïnwa:

—Tatitux jumanakampïpan —sasa.

Jupanakasti:

—Tatitux askinakap jumar churpan —sasaw aruntapxarakïna.

5Ukatsti, Booz chachax cebada yawthapirinakan jilïriparuw jiskt'äna, akham sasa:

—¿Khitin wila masipas uka tawaquxa? —sasa.

6Yawthapirinakan jilïripasti sänwa:

—Uka tawaqux Moab markankiriwa, Noemí mamamp chikaw purini.

7Nayaruw jikxatasin achikt'asitu, cebada yawirinakan qhipap puyanak apthapisa saraskañataki, jupax jan samart'asaw jichhärmanthitpach apthapiski, jichhakiw samart'asiski —sasa.

8Ukat Booz chachax Rut warmir säna:

—Wawaxay, ist'ita, jan yaqha yapunakar cebada puyanak pallasir saramti, uywatanakaxamp chik akankaskam,

9kawkhantix cebada yawir jaqinakax yawthapipkani uka chiqar saraskakim, nayaw uywatanakaxar iwxta, jan khitis jumar kamsañapataki. Umat pharjkätam ukkhasti, uywatanakax wakullanakar uma apsusipki ukat umt'askakïtawa —sasa.

10Rut warmisti llamp'u chuymampi p'iqip uraqkam alt'asin, Booz chachar jiskt'arakïna:

—¿Kunatarak nayar uñjasin khuyapt'ayasistasti? Nayax yaqha markankirikïtwa —sasa.

11Booz chachasti juparux sänwa:

—Chachaman jiwatapat kunanaktix taykch'imatak jumax lurkta ukanak nayar yatiyapxitu, awkimaru, taykamaru, markamar apanukunitamsa yatiraktwa, aka markan jumatak jan uñt'at jaqinakamp chik jakañataki.

12¡Diosaw luratamat jumar kuttayxätam! ¡Israelan Tatitupat churäwi katuqasxäta, jupar alkatatam layku, jupar thaqhatam laykuraki! —sasa.

13Rut warmisti Booz chacharux sarakïnwa:

—Tata, jumax wali suma jaqipunïtawa, arunakamasti chuymachituwa. Jan uywatamäkta ukasa, nayarux munasiñ arumpiw parlxt'ayista —sasa.

14Manq'añatakisti, Booz chachax Rut warmir jawsänwa, akham sasa:

—Akar jutam, manq'asim; t'ant'am vinagrer chilltasim —sasa.

Rut warmisti cebada yawthapir jaqinakamp chikaw qunt'asïna, Booz chachax cebada jamp'i waxt'äna, Rut warmisti sist'asiñkamaw manqt'asïna, taykch'ipar waxt'añatakis jilt'ayasirakïnwa.

15Ukatsti wasitat cebada puyanak apthapir kutt'käna ukkhasti, Booz chachax uywatanakapar akham sänwa:

—Cebada pichunakat apaqasiskpan, jan jark'apxamti.

16Jupan juk'amp apthapisiñapatakisti cebada pichunakamat yaqhip puyanak jalaqtayawayapxam. ¡Janiw kuns kamsapxätati! —sasa.

17Rut warmisti arumt'añkamaw cebada puyanak Booz chachan yapupan apthapïna. Jupan apthapitapax pä chhiyaw liq'stäna.

18Ukatsti, jupax cebada q'ipt'ataw markarux kutt'xäna, qawqhtix ukürun apthapkatayna uk Noemí taykch'ipar uñacht'ayäna. Ukatxa manq'a jilt'a imaskäna uk apsusin jupar churarakïna.

19Noemí mamasti Rut warmir jiskt'änwa:

—¿Kawkinarak jichhür irnaqantasti? ¿Kawkhatarak ukataq cebada apthapintasti? ¡Jumar yanapt'irix Tatitun waxt'äwip katuqpan! —sasa.

Rut warmisti taykch'ipar sänwa:

—Booz chachan cebada yapupan jichhürux irnaqt'anta —sasa.

20Noemí mamasti yuxch'aparux sarakïnwa:

—¡Uka chachax Tatitun aski waxt'äwip katuqpan! Jupasti jichhax jiwasar khuyapayistuwa, kunjämtix nayrapachax jiwir wila masinakasar khuyapt'ayirïkän ukhama. Uka jaqix jiwasan jak'a wila masisawa, jupaw wila masinak taypit jiwasar khuyapt'ayasistaspa —sasa.

21Rut warmix ukxar sänwa:

—Jupasti nayarux sarakituwa: “uywatanakaxamp chik irnaqaskakim yapu apthapiñ tukusiñapkama” —sasa.

22Noemí mamasti Rut yuxch'apar sänwa:

—Wawaxay, ukax walikïskiwa, uywatanakapamp chik ukankaskakim, janis yaqha yapunakar sarkam, jan wal jumar uñjasipkiristam —sasa.

23Ukatsti Rut warmix Booz chachan uywatanakapampiw cebada puyanak pallaskäna, cebadampi, trigompi apthapi tukusiñapkama. Ukchañkamasti jupax taykch'ipamp chikaw jakasïna.