JEREMÍAS 19 - Qullan Arunaka DC

Mä p'akit wayuchat amuyt'äwi

1Tatitux sarakituwa: “Saram, ukatsti ñiq'it lurat mä wayucha alanim, ukatsti markankir jilïrinakaru, yaqhip jilïr sacerdotenakar jawsarakim.

2Ukatsti Ben-hinom satäkis uka qhirwar saram, Jik'illita Punku sata uka uñkatasiru, ukansti kuna arunaktix nayax siskäma uka arunak yatiyam.

3Jupanakarusti sarakim: ‘Judá uraqinkir reyinaka, Jerusalén markan utjirinaka, Israelan taqi ch'amani Dios Tatitupan arunakap ist'apxam, jupasti siwa: Aka markarux mä jach'a t'aqhisiñ apayanï, taqi uka yatiyäwi ist'irinakasti wali mulljataw qhiparapxani.

4Israelitanakax nayarux apanukupxituwa, aka uraqsti yaqha uraqiruw tukuyapxaraki, aka chiqan yaqha diosanakar inciensonak luqtasipxaraki, uka diosanaksti janiw jupanakax uñt'apkänti; janirakiw nayra awkinakapasa, Judá uraqinkir reyinakas uñt'apkänti; aka chiqanarak jan juchan jaqinakarus jiwarayapxi.

5Ukhamarus Baal diosar wawanakap wilañcha luqtañatakiw altaranak lurarasipxaraki, janiw nayax ukham lurapxañap jupanakar siskäyätti, janirakiw ukham lurapxañapsa amtkäyätti.

6Ukat jichhax aka chiqax jan juk'ampi Tófet satäkxaniti, janirakiw Ben-hinom satäkxanisa, jan ukasti, Jiwarayañ Qhirwa satäxaniwa. Naya, Tatituw uk arsta.

7Aka chiqan Judá uraqimpina, Jerusalén markampin amtatanakapsa t'unjä. Uñisirinakapampi atipjayasaw jiwarayä, jiwat janchinakapasti siwiq'aranakana, monte animalanakan manq'apäniwa.

8Aka marksti mä ch'usa wasararuw tukuyarakï, wali mulljaskañäniwa. Taqi aka marka chiqa sarakipirinakasti, ukham q'ala t'unjat uñjasax wali mulljata, muspharataw uñjasipxani.

9Kunapachatix aka markax jach'a jan walt'añan jikxatasini, uñisirinakapansa muyuntat uñjaskani ukapachaxa, jaqinakarux pachpa wawanakap manq'asiyä, jupanakkamas maynit maynikamaw manq'asipxani’ sasa.

10“Ukanak sasinsti, kawkïr jilïr jaqinakatix jumampi chikäki ukanak nayraqatan uka ñiq'it lurat wayucha p'akjam, jisk'a jisk'a tukjarakim,

11ukatsti sarakim: ‘Taqi ch'aman Tatitux akham siwa: Aka markampiru, markachirinakapampirux jisk'a jisk'a tukjarakï, kunjämatix mä jaqix uma wayucha jisk'a jisk'a t'unjki ukhama, uka wayuchsti janiw khitis askichkxaspati. Jaqinakasti jiwatanakapxa Tófet sata chiqan imasipxani, jan juk'ampi yaqha chiqax imañatak utjkxatap layku.

12Aka markampiru, jaqinakapampirux ukham lurä. Kunjämäkitix Tófet chiqax ukham jaytarakï. Naya, Tatituw uk arsta.

13Jerusalenankir utanakasa, Judá uraqinkir reyinakan utanakapasa, kawkhantix yaqha diosanakar inciensonak luqtasipkäna, vino waxt'äwinak warapkäna uka uta patanakasa, q'añu chiqanakat uñt'atäniwa, kunjämäkitix Tófet chiqax ukhama’ ” sasa.

14Ukanak qhipatsti, Jeremiasax Tófet chiqat kuttanxänwa, kawkharutix Tatitux jupan sutipxar parlañatak khitkatayna uka chiqaru, ukatsti Tatitun utap anqäxapar sayt'asisin taqi jaqinakaruw parlarakïna:

15“Israelan taqi ch'aman Dios Tatitupax akham siwa: ‘Aka markampiru, jak'ankir yaqha markanakampirusa, kuna mutuyäwtix jupanakatak arskta uk apayanï, kuna arunaktix nayax arskäyäta uka arunakar k'ullusipxatapata, janirak uka arunakar jaysapxatap layku.’ ”