SALMOS 140 - Qullan Arunaka DC

SALMO 140Diosamp arxatayasiñatak mayisiña 1 Davidan q'uchupa.

1 1 (2) Tatay,

ñanqha lurir jaqit qhispiyita,

qhuru jaqit imita,

2 2 (3) jan wali lurañanak chuymapan amtapxi,

sapüruw nuwasiñanak utjayapxi.

3 3 (4) Laxrapax asirun laxrapjam wakichatawa;

arunakapasti katarin jiwayir mich'ipjamawa.

4 4 (5) Tatay, ñanqha lurir jaqit arxatita,

qhuru jaqinakat imita,

tinkuñaxatak sipitanak wakichirinakat jark'aqita.

5 5 (6) Khä jach'a jach'a tukur jaqinakax

sipitanak wakicharapipxitu;

ñanqha luririnakax qänanak jant'akt'arapipxitu,

sarañaxarusti sipitanak uchantarapipxitu.

6 6 (7) Nayasti Tatiturux sistwa: “Jumaw Diosaxätaxa;

¡Tatay, jach'at mayisitaxarux ist'akimaya!

7 7 (8) Tatay, taqi ch'aman qhispiyirixay,

jumaw nuwasïwin p'iqixar imasktaxa” sasa.

8-9 8-9 (9-10) Tatay,

janikiy ñanqha luririn munataparux jaysamti;

janikiy amtäwinakapan sum sarantañap munamti.

Nayar uñisirinakax p'iqinakap waytapxi;

¡ñanqhachatanakapax jupanak kipkar kutxatpan!

10 10 (11) Nina sank'a k'illiminak jupanakxarux jalxatpan;

phuch'u p'iyanakar wiñayatak jaquntatäpxpan.

11 11 (12) K'ari jaqix uraqin jan jakpati,

qhuru jaqirusti chijix arktasin jiwaypan.

12 12 (13) Llakit jaqir Tatitun chiqapar uñjatap yatta,

t'aqhisiyat jaqir arxatatap yatirakta.

13 13 (14) Aski jaqinakax sutim jach'ar aptapxani;

¡chiqap jakir jaqinakasti nayraqataman jakapxani!