DEUTERONOMIO 6 - Qullan Arunaka DC

Diosan jach'a kamachi arunakapa

1“Aka kamachi arunaka, kamachinaka, arsutanakap Tatit Diosamax nayar churitu jumanakar yatichañataki, ukhamarjam jumanakan sarnaqapxañamataki, kawkïr uraqinaktix jupax churapkätam uka uraqina.

2Ukhamat jumanakax Tatit Diosamar jach'añchapxäta, ukatsti taqi jakañaman phuqhapxarakïta, jichhürun jumanakaru, wawanakamaru, allchhinakamar churapksma uka kamachinakampi, kamachi arunakampi, ukhamat walja maranak jakapxarakïta.

3Ukhamasti israelit jaqinaka, ukhamarjam sarnaqapxam, uka arunak phuqhañatak ch'amañchasipxam. Ukhamat kusisita sarnaqapxäta, ukatsti mä jach'a markaw uka uraqin tukupxarakïta, kawkhantix lechesa, misk'is umjam jalaski uka uraqina, kunjämatix nayra awkinakaman Tatit Diosapax arupampi arsuwaykän ukhama.

4“Ist'am Israel marka: Jiwasan Tatit Diosasax mä sapakiwa.

5“Tatit Diosamarux taqi chuymamampi, taqi jakañamampi, taqi ch'amamampi munam.

6“Jichhürun sisksma uka arunak chuymamaruw katuqasïta,

7ukatsti wawanakamaruw uka arunakxat yaticharakïta; utamankkasina, thakhinjam sarkasina, ukhamarak ikintañatakisa, sartañatakis parläta.

8Uka kamachi arunaksti amparamaruw ñach'antasïta, paramaruw mä chimpur uñtat uchasirakïta,

9uta punkumaruw qillqantäta, markaman jach'a punkunakaparuw qillqantarakïta.

Moisesax jaysañxat israelitanakar iwxt'äna

10“Jumanakan Tatit Diosamax kuna uraqtix Abraham, Isaac, Jacob awkinakamar churä siskatayna ukaruw puriyapxätam. Uka uraqisti wali jach'awa, suma markanakaniwa, uka markanakasti janiw jumanakan luratäkiti.

11Suma yänakan phuqhantat utanakan jakapxäta, ukanakasti janiw jumanakan ch'amamäkiti, phuch'unakat uma umt'asipxäta, uka phuch'unaksti janiw jumanak allisipktati; ukatsti uva, olivo yapunakat sist'asiñkam manq'asipxäta, uka yapunaksti janiw jumanak satapktati.

12Taqi ukanakax ukhamäxani ukapachaxa, janipun jumanakax Tatitut armasipxamti, jupaw Egipto markat irpsunipxtam, t'aqhisiyat sarnaqapkäyäta uka markata.

13Ukhamasti, jumanakan Tatit Diosamar yupaychapxam, jupa saparukirak luqtapxam, ukatsti kunapachatix juramento lurapkäta ukkhaxa, Tatitun sutipxaruk lurapxam.

14Janipuni yaqha markanakan diosanakaparux yupaychapxamti.

15Jumanakampïki uka Tatitu Diosamasti janiw yaqhampïpxañam munkiti, jupasti jumanakatakiw q'apisispa, ukatsti q'alpun jumanakar t'unjapxiristam.

16“Janirak jumanakan Tatit Diosamarux yant'apxamti, kunjämtix Masá chiqan lurapkta ukhama.

17Taqi chuymampirak Tatit Diosaman kamachi arunakap phuqhapxam, churapktam uka iwxanakapsa, kamachinakapsa phuqhapxarakim.

18Ukatsti Diosan nayraqatapan chiqäki, askïki ukanak lurapxam, kusisit jakapxañamataki, kawkïr uraqtix Diosax arupampi awkinakamar churañ arskäna uka uraqir mantapxañamataki.

19Tatituw taqi uñisirinakamar jumanak nayräxat ananukuni, kunjämtix arsuwaykän ukhamarjama.

20“Kunapachatix wawanakamax mä uru jiskt'apxätam: ‘¿Kun sañarak muni uka kamachi arunakampi, arsutanakampi, Tatit Diosasax churawaykistu ukanakasti?’ sasa,

21jumanakasti jupanakarux sapxätawa: ‘Nanakax Egipto markan faraón reyin t'aqhisiyat uywatapäpxayätwa, ukampis Tatituw wali ch'amapampi ukat irpsunipxitu.

22Nanakax Diosan jach'a uñacht'äwinakapampi, jach'a muspharkañ luräwinakapamp uñjapxta, Egipto markan faraón reyipar mutuyki, taqi utapankirinakarus mutuykaraki ukanaka.

23Ukampis Tatitux uka markat nanakarux irpsunipxitu, ukatsti kawkïr uraqtix nayra awkinakaxar churañ arskatayna ukaruw irpanipxarakitu.

24Ukatsti Tatit Diosasax taqi uka kamachi arunakarjama, axsartañ chuymampi sarnaqañ iwxapxitu, jiwasanakan wiñay kusisit jakañasataki, kamisatix jichhürkam jakayaskistu ukhama.

25Chiqapar uñjatäñäniwa, jiwasatix uka kamachi arunakap axsartañ chuymampi Tatit Diosan nayraqatapan phuqkañäni ukapacha, kunjämtix iwxawaykistu ukhamarjama’ sasa.