ÉXODO 5 - Qullan Arunaka DC

Moisesampi, Aaronampix faraonampiw parlapxi

1Israelitanakamp parlasinsti, Moisesampi, Aaronampix faraonan ukar sarasin jupar sapxäna:

—Israelan Tatit Diosapax akham siwa: “Israel markaxar antutxam wasarar sarapxañapataki, ukan nayar jach'añchas kusisita yupaychapxañapataki” —sasa.

2Ukampis faraonax sänwa:

—¿Khitirak Tatitusti, nayan jupar ist'añaxataki, israelitanakarus antutaskañaxatakixa? Janiw nayax Tatiturux uñt'kti, janirakiw israelitanakarus sarañapatak antutkäti —sasa.

3Moisesampi, Aaronampisti juparux sapxänwa:

—Hebreonakan Diosapaw nanakar jikxatapxitu, ukhamasti wasararuw sarapxä, kimsür sararu, ukan Tatit Diosaxar wilañchanak luqtanipxä, jan sarapkirista ukasti, jupax kuna usumpisa, jan ukax espadampkamas jiwarayapxakitaspawa —sasa.

4Egiptonkir reyisti sänwa:

—Moisés, Aarón, ¿kunatsa jumanakax jaqinakan irnaqasipkipan arxayapxta? ¡Irnaqañanak phuqhir sarapxam! —sasa.

5Faraonasti saskakïnwa:

Amuyapxam, israelitanakax aka markan wal mirantxipanti ¿jumanakax irnaqäwinakapat suyt'ayapxäta? —sasa.

6Faraonasti ukürpachaw lurayir jilïrinakaru, tamanakar apnaqir jilïrinakarus sarakïna:

7—Janiw jumanakax israelitanakar ñiq'i tikanak lurapxañapatak jichhunak nayrjam churkxapxätati; ¡jupanak sarapxpan jichhunak aptasiri!

8Ukampis qawqha ñiq'i tikanaktix lurapxirïki ukkharak mayipxäta. ¡Jan mayas pist'pati! Uka jaqinakax jayranakäpxiwa ukat jach'at arsusipxi: “¡Nanakax Diosaxar wilañchanak luqtir sarxapxä!” sasa.

9Jumanakax juk'amp wali ch'amamp uka jaqinakar irnaqayapxam, jan inakt'ayapxamti, uka k'ari arunak jan ist'asipkañapataki —sasa.

10Ukatsti lurañanak sarayir jilïrinakampi, tamanak apnaqir jilïrinakampix sarasin israelitanakarux sapxäna:

—Faraonan arsutaparjamax janiw nanakax jichhunak churkxapxämati.

11Jumanakaw kawkhatsa jichhunak apthapisir sarapxäta. Ukampis qawqha ñiq'i tikanaktix lurapxirïkta uka pachpak lurasipkäta janiw juk'äñapäkiti —sasa.

12Israelitanakasti Egipto uraqpachan taqi tuqiruw sarapxäna waña ch'allpha t'unanak thaqhiri, ukanak jichhu lanti uchañataki.

13-14Sapüruw faraonan lurañanak sarayir munañan jilïrinakapax jupanakar qawqtix jichhu churatax ñiq'i tikanak lurapxirïki ukkharak wayt'apxäna, ukhamarus israelita tamanakan jilïrinakapax jawq'ataw uñjasipxäna, jupanakarusti sapxänwa:

—¿Kunatsa jumanakax masürusa, jichhürus qawqha tikanaktix nayrax lurapxirïkta ukham jan phuqhapkta? —sasa.

15Ukat israelita tamanakan jilïrinakapax faraonar yatiyasir sarapxäna, juparusti sapxarakïnwa:

—¿Kunatsa munañan rey, nanakar ukham lurapxista?

16Jaqinakamax janiw ñiq'i tikanak lurañakti wayt'apkitu, jan ukasti jichhunaksa janiw churkxapxituti, ukhamarus jawq'ataw uñjasipxta. Juman jaqinakamaw juchani nanakan qawqha ñiq'i tikanaktix katuyapxirïkta uka pachpa jan katuyañataki —sasa.

17Ukat faraonax säna:

—¡Jayranaka! ¡Jumanakax wali jayranakäpxtawa! Ukat sapxtaxa: “Tatitur wilañchanak luqtir sarxapxä” sasaxa.

18¡Irnaqir sarapxam! Janis jichhunak churapkätam ukasa, qawqha ñiq'i tikanaktix nayrax katuyapxirïkta uka pachpakirak jichhas katuyasipkäta —sasa.

19Reyin ukham satapatsti, israelita tamanakan jilïrinakapax wal llakthapisipxäna.

20Faraonampi parlasinsti, Moisesampi, Aaronampiw jikisipxäna, jupanakasti anqan suyasipkatayna,

21jupanakarusti sapxänwa:

—¡Tatitux jumanakar mutuypan nanakar jan wali luratanakamata! Reyimpi, jaqinakapampix nayrat sipan juk'amp jichhax nanakar uñisipxitu. ¡Jumanakaw nanakar jiwarayañapatak amtayapxtaxa! —sasa.

Moisesan Tatitur mayisitapa

22Moisesasti Tatituruw mayïna:

—¡Dios Tatay! ¿Kunatarak aka markamar t'aqhisiytasti? ¿Kunatakirak nayar khithanistasti?

23Nayax faraonamp juman sutimxar parlir jutkta uka urutpach jupax markamar juk'amp t'aqhisiyi; jumasti markamar qhispiyañatakix janiw kuns lurktati —sasa.