LEVÍTICO 10 - Qullan Arunaka DC

Nadab, Abihú chachanakan juchanakapa

1Nadab, Abihú chachanakax Aaronan yuqanakapänwa, jupanakasti nina sank'a uchañ katusinxa, ukaru ninampi, inciensompi apxatasin Tatit nayaraqatan luqtapxäna, uka ninasti mayjänwa, janiw kunjämtix Tatitux siskatayna ukhamar lurapkänti.

2Ukat mä ninax Tatitun nayraqatapat mistunïna, jupanakarusti q'al nakhantasin jiwarayäna.

3Moisesasti Aaronarux sarakïnwa:

—Tatitux akpï sañ munänxa kunapachatix siskäna:

“Nayar jak'achasirinakarux

q'uma kankañax uñacht'ayä,

taqi israelitanakarusti

k'ajkir qhanax uñacht'ayarakï” —sasa.

Aaronasti uka arunak ist'asax janiw kunsa siskxänti.

4Ukat Moisesax Misael, Elsafán uka jaqinakaruw jawsäna, jupanakasti Aaronan tiopa Uziel sat jaqin yuqanakapänwa, jupanakarusti sänwa:

—Jutapxam, wila masinakaman jiwat janchinakap qullan chiqawjat apsusinxapxam, ukatsti campamentot anqäxar apasxapxam —sasa.

5Jupanakasti iyaw sasaw jutapxäna, ukatsti pachpa isinakapar llawt'asaw campamentot anqäxar apasxapxarakïna, kunjämtix Moisesax siskatayna ukhamarjama.

Sacerdotenakan phuqhañanakapa

6Ukat Moisesax Aaronampiru, Eleazar, Itamar uka yuqanakapampiruw sarakïna:

—Jichhax jan ñik'utanakamsa jararasipxamti, janirak llakisiñatsa isinakam ch'iyanuqasipxamti, ukatarak jumanakamppach jiwarasipkasma, Tatitus aka markxar phiñasiñap wartasinkaspa. Wila masinakapax jachasipkpan, ukhamarak israelita jaqinakasa, Tatitux uka jaqinakar ukham nakhantayatapata.

7Tatitump Jikisiñ Carpatsa janiraki jayarux sarapxamti, jan jiwarapxañamataki, jumanakasti Tatitun aceitepampi jupar katuyatäpxtawa —sasa.

Ukatsti, kunjämtix Moisesax siskäna ukhamarjamaw phuqhapxäna.

8Ukampis Tatitux Aaronampiw parläna; akham sarakïnwa:

9“Kunapachatix jumasa, yuqanakamasa Tatitump Jikisiñ Carpar mantañatakïpxäta ukapachax, janiw vinsa, kuna p'usqtat umañanaksa umapxätati, jan jiwapxañamataki. Aka arsüwisti, wawanakaman wawanakapatak mä kamachiwa,

10ukhamat kunatix qullanäki, ñanqhäki, kunatix q'añüki, kunatix q'umäki ukanak sum amuyapxañamataki,

11ukatsti kuna kamachinaktix Tatitux Moisés tuqi jumanakar churapktam ukanak israelitanakar yatichapxañamataki” sasa.

12Ukxarusti Moisesax Aaronampiru, ukatsti Eleazar, Itamar uka pani yuqapampiruw säna:

—Tatitutak nakt'ayas luqtatäki uka granonakat jilt'ki ukanak apsunipxam, uksti jan levaduranik altar jak'an manq'apxam, ukan aski qullanätap layku.

13Mä qullan chiqawjan manq'apxam, kawkïr waxt'anakatix Tatitutak nakt'ayatäki ukanakatxa, ukawa jumampiru, wawanakamampirux wakt'apxtam. Tatitux nayar ukham situ.

14Ukatsti jaraphi aycha, kawkïritix mä suma waxt'äwïki, ukhamarak chara aycha kawkïritix mä suma churäwïkaraki ukanaksti, jumampi, yuqalla, imill wawanakamampiw mä q'uma chiqawjan manq'apxäta, ukaw jumanakarux wakt'apxtam, kuntix israelita jaqinakax sumankthapiñataki waxt'a luqtapki taqi ukanakata.

15Chara aychax mä churäwïkaspas ukhamawa, jaraphi aychasti mä suma waxt'äkaspas ukhamarakiwa, ukanaksti Tatitun nayraqatapar apatäniwa, mä suma waxt'äkaspas ukham luqtatäniwa, kawkïri lik'inakatix nakhantayañatak luqtatäki ukanakamp chika. Ukanakasti jumampina, wawanakamampinkaniwa, kunjämtix Tatitux arsuwayki ukhamarjama.

16Ukatsti Moisesax kawkïri chivotix jucha luratata wilañcha luqtañatakïki uk tumpäna, ukatsti uka chivon nakhantayatäxatap yatisinxa, Moisesax Eleazar, ukhamarak Itamar jupanakatakiw phiñasïna, jupanakasti Aaronan pani yuqanakapänwa, ukat jupanakarux sarakïna:

17—¿Kunatsa uka juchat luqtata chivo qullan utan jan manq'apxta? Jumanakax askiw yatipxta uka waxt'an qullanätapa, Tatitux jumanakaruw churapxtam, ukhamat jumanakan aka jaqinakan juchanakap apapxañamataki, ukhamarak Tatitut juchat pampachatäñ mayipxañamataki.

18Uka chivon wilapas janirakiw qullan uta manqhar apatäkataynati, jumanakasti uka wilañchat luqtat aychxa uka qullan utan manq'apxañamänwa kunjämtix nayax sapkäyäsma ukhamarjama —sasa.

19Aaronasti ukxaruw säna:

—Uñjam, jichhüruw yuqanakaxax jucha luratat wilañchanaksa, nakt'ayat luqtäwinaksa Tatitur luqtasipki, nayatakisti uka jan walinakax jichhapuniw utjarapitu. Nayatix jichhürux uka jucha luratata wilañcha luqtat uywan aychap manq'antiriskäyät ukaxa, ¿Tatitutakix walikïsapänti? —sasa.

20Moisesasti ukanak ist'asax amukïxarakïnwa.