1¡Ukhamat ukham kutsuyasir Tatay,
uñachayasikimaya!
2Jumaw akapachar taripirïtaxa,
jach'achasirinakarusti
lurataparjamay mutuyam.
3Tatay, ¿kunapachkamarak juchararanakast utjanisti?
¿kunapachkamarak ñanqha luririnakast kusisinisti?
4Ñanqha lurir jaqinakax
q'añu arunak parlirïpxiwa,
jach'a jach'a tukurïpxiwa.
5Tatay,
jupanakaw markamarux tukjapxi;
¡jumar iyawsirinakaruw jisk'achapxi!
6Ijma warminakaruw jiwayapxi,
qurpachayasir jaqinakaruw jiwayapxi,
wajchanakaruw jiwayapxi,
7Tatitux janis uñjkaspa ukham amuyapxi,
Jacobun Diosapax janis amuykaspa ukham lup'ipxi.
8¡Pisi amuyt'an jaqinaka!
¿Kunapacharak amuyt'asxapxätasti?
9Jinchu luriristi, ¿janit ist'kanisti?
nayranak utjayiristi, ¿janit uñjkanisti?
10Markanakar chiqachiristi, ¿janit mutuykanisti?
Jaqir yatichiristi, ¿janit yatkanisti?
11Tatitux yatiwa,
t'axmar amuyunakak jaqin lup'irïtapa.
12Tatay,
juman yatichat jaqix kusisiñaniwa,
kamachi arunakam yatichat jaqix kusisiñaniwa,
13t'aqhisiñ urunakan samarañ katuqani,
ñanqha lurir jaqitakisti, aynacht'añap wakicharapiski.
14Tatitux janiw markaparux apanukkaniti,
janirakiw jupankirinakarus jaytanukkaniti.
15Taripirinakax chiqa taripirinakäxaniwa,
aski jaqinakasti jupanakat yatiqasipxani.
16¿Khitirak jucharar jaqinakat arxatitanisti?,
¿khitirak ñanqha luririnakat jark'aqitanisti?
17Tatitutix jan yanapkitasapänxa,
niyaw jiwatanakampi chikäxiriskäyäta.
18Tatay, niy lanqtasiñampïskäyät ukapachaw,
khuyapayasiñamax yanapt'itu.
19Llakinakaxax walipun yapxataskän ukapachaw
chuymachäwimamp kusisiyista.
20Jan wali taripirinakampix janiw chikachaskasmati,
kamachinak p'akintirinakampi,
jan walinak amtirinakampi;
21aski jaqir ñanqha lurañ amtirinakampi,
jan juchan jaqir jiwayañatak juchañchirinakampi.
22Tatitusti nayan imantasiñaxawa;
imantasiñ qarqaxax Diosawa.
23Tatituw ñanqha luratanakapat mutuyani,
pachpa ñanqha luräwinakap laykuw t'unjatäpxani,
¡Diosasaw jupanakarux tukusiyani!
Who We AreWhat We EelieveWhat We Do
2025 by iamachristian.org,Inc All rights reserved.
