JOB 34 - Qullan Arunaka DC

Elihú chachan payïr kuti arsutapaUkxarusti Elihú chachax sarakiwa:

1-2Jumanaka, yatiñan ch'ikhi jaqinaka,

arunakax ist'apxita.

3Jinchux arunak ist'asin amuyiwa,

kunjämtix lakax manq'a mallt'ki ukhama.

4Ukhamarakiy jiwasax aka luräwi purapat amuykipapxañäni,

ukatsti kunjämarus uñjañäspa uk amtarakiñäni.

5Job chachax sistuwa: “Nayax janiw juchanïkti,

ukampis Diosax janiw chiqapar uñjañ munkituti;

6nayax aski jaqïtwa,

ukampis k'arisir jaqjamätwa;

janiw kuna juchsa lurkti,

ukampis Diosax walpun janchixar chhuxriñchjitu” sasa.

7¡Janiw khitis Job chachjamax utjkiti!

Umsa umt'kaspa ukham Diosat sawkasi;

8jupatakix ñanqha jaqinakamp chikachasiñasa,

jan wali jaqinakamp chik sarnaqañas sumawa.

9Jupax siwa: “Janiw jaqitakix kuna askis utjkiti,

Diosar axsartas sarnaqasaxa” sasa.

10Wali amuyt'an jaqinaka, ist'apxita:

¡Taqi ch'aman Diosax janiw kuna jan walsa lurkaspati,

janirakiw kunatix jan chiqapäki uksa lurkaspati!

11Jupax sapaqat jaqirus irnaqatapatjam churi;

jaqin sarnaqataparjamaw uñjaraki.

12Chiqpachansa taqi ch'amani Diosaxa,

janiw kuna ñanqhsa lurkiti,

janirakiw jan chiqapäki uksa lurkiti,

13taqi aka uraqpacha apnaqañatakix

janiw khititsa ch'ama katuqkarakiti.

14-15Jupatix jaqinakat jakañ samanap apaqaspaxa,

taqiniw jupanakax jiwarapxaspa,

taqiniw laq'ar kuttapxarakispa.

16Job, jumatix amuyt'asirïsta ukaxa, ist'ita;

arsutanakaxar amuyump ist'am.

17Diosatix chiqa kankañar uñisispaxa,

janiw akapach apnaqkaspati.

¿Kunjämaraki juchañchasmasti

khititix q'umansa q'umapäki ukarusti?

18Reyinakampi, jilïrinakampitix qhurüpxchixa,

Diosax janiw ajanupar irkatañ axsarkiti.

19Jupax janiw marka apnaqirinakat arxataskiti,

janirakiw qamirinakarus jan kunaninakat sipan juk'amp khuyapayaskiti,

jupaw taqpachanir irnuqasistu.

20Jaqinakax akatjamatak mä arum jiwt'awayxapxi;

jaqix uxtiwa ukatsti chhaqtawayxarakiwa;

munañan jaqisti jan kunaki jaqunukutawa.

21Diosax jaqin luräwip uñch'ukiski;

taqi sarnaqäwip yatiskaraki.

22Ñanqha lurir jaqinakax

janiw sinti ch'amak arumansa imantasipkaspati.

23Diosax jaqitak janiw mä uru wakt'aykiti

jupa nayraqatapar uñstañapatakixa.

24Janiw kuna yatxatañanakarus uchaskiti

ch'aman jaqinakar jaquqañatakixa,

ukat yaqhanakar jupa lanti uchañatakisa.

25Diosax jupanakan luräwip yatiwa,

mä arumakiw jupanakar t'unji.

26Jaqi jiwayir jaqinakarjamaw

taqinin uñjkat jupanakar mutuyi,

27jupar jaysañ jan munapxatap layku,

arunakaparjam sarnaqañsa jan munapxatap layku.

28Jupanakax jan yäqat jaqinakaruw t'aqhisiyapxäna,

wararitanakapax Diosan nayraqatapkamaw purïna,

ukat jupax jupanakar ist'äna.

29Diosatix amukïspa ukasti,

¿khitirak juchañchaspasti?

Jupatix ajanup imantasispa ukasti,

¿khitirak uñjaspasti?

Jupaw markanakarusa, jaqinakarus uñch'ukiski,

30ñanqha lurir jaqinakan markar jan apnaqañapataki,

markar jan sallqjañapataki.

31Juchanïtamsa uñt'askäta ukasa,

32ukatsti jan juk'ampi jucha lurañatak arsuskäta ukasa,

33Diosax janiw jumarux walikiw siskätamti.

Jumaw juparux apanuktaxa,

janiw nayati jumat arskäxa,

ukhamasti, kuntix jumax lup'kta uk sapxita.

34Yatiñan jaqinakax sapxitpan,

jumanaka, amuyt'an jaqinakasti ist'apxitpan:

35“Job chachax jan amuyt'asisakiw parli;

arunakapax jan amuyumpi arsut arunakawa.

36¡Job chachat suma yatxataspan,

arsusitanakapax qhuru jaqin arunakapjamawa!

37Job chachax janiw juchakti lurkixa,

jan ukasti Diosaruw saykati;

jiwasan nayraqatasanpach Diosat sawkasi,

Diosampis jaychasirakiwa” sasa.