1Judá markankir Josafat reyisti, jan kuna kamacht'ataw Jerusalenankir reyi utapar kutt'anxäna.
2Ukampis Hananí chachan Jehú profeta yuqapaw jupar jikxatasin jiskt'äna: “¿Kunatarak jumasti, jan wali jaqir yanaptasti, ukatsti Tatitur uñisipki ukanakampi sumankaraktasti? Tatitux jumatak wali q'apisitawa.
3Ukampisa, juman yaqha suma luratanakamax utjiwa, jumax aka markpachan utjkäna uka Astarté diosan uñtasitanakaparuw tukjtaxa, ukatsti chuymaman Diosar thaqhañ amtasiraktaxa” sasa.
Josafat reyix taripirinak utt'ayi4Josafat reyix Jerusalén markan jakäna, ukampis markapar uñjt'irix sarapunirïnwa, Beerseba chiqat qalltasa Efraín qullunakkama, jupanakar nayra awkinakapan Tatit Diosapar kutt'ayaniñataki.
5Ukhamarus Judá uraqinkir pirqanakampi muyuntayat markanakanxa, taripirinak utt'ayäna, markat markana.
6Ukatsti uka taripirinakarux sänwa: “Kuntix lurapkäta ukanakxa sum amuyasipxäta, janiw jaqinakan sutipxaru taripapxätati, jan ukasti Tatitun sutipxaruw taripapxäta, taripapkäta ukkhasti jupax jumanakampïskaniwa.
7Ukhamasti Tatiturux axsarapxam, luratanakam wal amuyasipxarakim, Tatit Diosasax janiw aliqak uñkatkiti jan chiqapar uñjirinakaru, maynitak arxatasirinakaru, qullqi chilltayasirinakarusa” sasa.
8Ukatsti Josafat reyix, Jerusalén markanxa levitanaka, sacerdotenaka, Israelan wila masi tamanakapan jilïrinakap utt'ayäna, taripirit sayt'apxañapataki, Jerusalenankir jaqinakan ch'axwanakap uñjapxañapatakiraki.
9Jupanakarusti akham iwxt'arakïna: “Jumanakasti Tatitur axsart'asaw lurañanakam lurapxäta, chiqa kañkañampi suma chuymampi lurasa.
10Markanakan jakapki uka masinakamatix ch'axwanakap yatiyasipxätam, jumanakan chiqapar uñjapxañamataki, jaqi jiwayañ tuqita, kamachinak phuqhañ tuqita, arsutanakarjam sarnaqañ tuqitsa, jupanakarux iwxt'apxam, Tatit nayraqatan jan pantjasipxañapataki, ukhamat Tatitun jan jumanakatakisa, jupanakatakis q'apisiskañapataki. Jumanakax ukanak phuqhapxam, chiqaparutix uñjasipkäta ukaxa, juchax janiw jumanakxankkaniti.
11Amarías jach'a jilïri sacerdotew jumanakarux kunatix Tatit tuqit yatiñax wakiski ukanakan yatiyapxätam; ukxarusti Ismael chachan Zebadías yuqapa, Judá ayllun jilïripasti, kunatix markanak tuqit lurañax wakiski ukanak phuqharakini; levitanakasti jumanakan yanapirimäniwa. ¡Ukhamasti ch'amañchasipxam, ukatsti irnaqapxarakim! ¡Tatitux aski lurir jaqimpi chikäpan!” sasa.
Who We AreWhat We EelieveWhat We Do
2025 by iamachristian.org,Inc All rights reserved.
