2 CORINTIOS MARKANKIR IYAWSIRINAKAR PAYÏR QILLQATAPA - Qullan Arunaka DC
MARKANKIR IYAWSIRINAKAR PAYÏR QILLQATAPAQALLTA ARUNAKAAka qillqatax Pablo apostolun suma chuymapampi, qhana arunakapamp qillqatawa. Corinto iglesiax juk'ampiw Pablorux jan walt'añanakampi p'iqip usuyaskakïna. Uka iglesiankirit mä qawqhanix Pablor kunayman tuqit jisk'achayañatakiw p'iqichapxäna, k'ari apostolükaspasa, munañan kankañanïkaspas ukham uñt'ayasina. Ukarusti Pablox ch'amampi, qhuru arunakampiw arusxatäna. Ukampis jupax Corintonkirinakar munasiñap uñacht'ayaskakïnwa, jupanakampi sumankthapxañatakis jank'akïskänwa; jupasti corintonakan jupar taqi kunat sipan munaskatap amuyasirakïna.Qallta arunakapansti (1.1-11), Pablox Corinto iglesiampi suma parlt'äwinkaskatap qhanañchäna, kunattix qhuru arunakamp qillqkän ukxat jupanakar amuyt'ayarakïna. Ukatsti jupan qhuru kankañapax jan wali luratat jupanakar amthapisiyatapata, sumankañ utjayatapat kusisïna (1.12—7.16). Jupanakax jan walt'añanakan jikxatasipkchïn ukasa, Pablox amtayaskakïnwa Judeankir jilatanakar yanapt'anak apayapxañapataki (caps. 8, 9). Ukxarusti Pablox munañanïñ kankañapat ch'amampiw arsusïna, khitinakatix k'ari apostolükaspas ukham jupxat arsupkän ukanakataki; ukatsti jupanak pachpa k'ari apostolunakäskatap qhanancharakïna, Corintonkir iyawsirinakarux kunayman tuqit mayjt'ayañ munasipkäna (10.1—13.10). Aka qillqatan tukuyäwipax jisk'akiwa, ukampis suma arunakaniwa (13.11-14).
