JOB 23 - Qullan Arunaka DC

Ukxarusti Job chachaw arsuraki:Job

1-2Nayan arsusitaxax chuyma ust'kayakïskiwa,

Tatitux nayar mutuyaskakituwa.

3¡Nayax yatikirista kunjämat jupar jikxatañsa,

kawkhantix utjaski ukar kunjämat puriñsa!

4Jupa nayraqatan arsusirista,

arsusiñaxasti walipuniw utji.

5¡Nayasti yatxiristwa

kunjäm jupan arsutapar arusxatañsa!

6Jupasti janiw ch'amani kankañapampik atipjkitaspati,

jan ukasti ist'itaspawa;

7nayan arsusitaxan chiqapätap yatispa;

nayarusti chiqaparuw uñjitaspa,

¡jan mayampitakiw antutnukxarakitaspa!

8Ukampis nayax inti jalsu tuqin Diosarux thaqta,

janiw jupax ukankkiti;

inti jalanta tuqin thaqta, janiw jupar jikxatkti.

9Amsta tuqiruw sarta, janiw jupar uñjkti;

aynach tuqiruw kuttanta, janiw jupar uñjkaraktti.

10Jupaw sarnaqäwixa yati;

yant'atasti suma qurir uñtat q'umaw mistü.

11Nayax jan maysar saranukusapuniw arkta

jupax uñacht'aykitu uka thakhinjama.

12Kamachinakapsa, kamachi arunakapsa phuqhapuntwa,

janiw nayan munañaxak luraskti.

13Jupax kuna lurañsa amtasi ukapachasti,

uka amtatapxa phuqhapuniwa.

Kuntix jupax lurañ munki uk luri.

14Kuntix jupax nayampi lurañ amtki uk lurani,

yaqha amtatanakapsa nayampix luraskakiniwa.

15Ukanak lup'ista ukapachasti,

jupan nayraqatapar uñstañ axsarayastwa.

16¡Taqi ch'aman Diosax

axsarañat khathatiyitu!

17¡Arum ch'amakas nayar chhaqtayxitaspa,

laxa ch'amakas nayar muyuntxitaspa!