JUECES 3 - Qullan Arunaka DC

Canaán uraqir qhiparapkän uka markanaka

1Tatitux aka markanak Canaán uraqiru qhiparayäna, kawkïr israelitanakatix Canaán uraq katuntasiñatak nuwasipkän ukkhax, janïr yuripkatayna ukanakar yant'añataki.

2Ukat Tatitux khitinakatix janipun nuwasïwinakankañ yatipkäna, ukanakan nuwasiñ yatiqapxañapatakiw jupanakar qhiparayäna.

3Filisteonakan phisqa jilïrinakapaw qhiparäna, taqpach cananeo jaqinaka, sidonio jaqinaka, Líbano qullunakan jakir heveo jaqinaka, Baal-hermón qullut qalltasa Hamat chiqakama.

4Tatitux uka markanakampiw israelitanakar yant'añ munäna, jupanakax Moisés tuqi nayra awkinakapar churata kamachi arunakar ist'apxaspati janicha uk yatiñataki.

5Ukhamawa, israelitanakax jakañ qalltapxäna cananeo, hitita, amorreo, ferezeo, heveo, jebuseo jaqinak taypina,

6israelitanakan yuqanakapasa, phuchhanakapasa, uka markanakankir jaqinakan yuqanakapampi, phuchhanakapampiw jaqichasipxäna, ukatsti diosanakaparuw yupaychapxarakïna.

II. TARIPIRINAKAN LURÄWINAKAPA(3.7—16.31)1. Otoniel(3.7-11a)Otoniel chachax Cusán-risataim reyin amparapat israelitanakar qhispiyi

7Israelitanakan luratanakapax Tatit nayraqatan janiw walïkänti, Tatitu Diosapat armasisin Baal, Astarté uka diosanakan uñtasitanakaparuw yupaychapxäna.

8Ukat Tatitux jupanakatak q'apisïna, ukatsti Cusán-risataim sat Mesopotamia markankir reyin amparaparuw katuyäna. Israelitanakax Cusán-risataim reyirux kimsaqallq maraw luqtapxañapäna,

9ukhamïpansti israelitanakax Tatituruw art'asipxäna, ukat Diosax arnaqasitanakap ist'asin jupanak taypit mä qhispiyiri sayt'ayäna. Uka qhispiyiristi Otoniel satänwa, Quenaz chachan yuqapa, Caleb chachan sullka jilaparaki:

10Tatitun ajayupaw Otoniel chachxaru jutäna, jupaw israelitanakarux irptäna; nuwasiriw mistüna, ukatsti Tatitux Cusán-risataim reyiruw atipt'ayäna.

11Uka qhipatsti pusi tunka maraw uka uraqin samarañax utjäna.

2. Ehud(3.11b-30)Ehud chachax Moabitanakan amparapat israelitanakar qhispiyi

12Otoniel chachan jiwxatapatsti, israelitanakax wasitatampiw Tatitun nayraqatapan jan walinak lurapxäna, ukhamïpan Tatitux Moab markankir Eglón reyiparux israelitanakat sipan wali ch'aman tukuyäna.

13Israel markar nuwantañatakisti, Eglón reyix amonitanakampi, amalecitanakampiw mayacht'asïna, ukatsti Jericó marka katuntasïna.

14Ukatsti israelitanakax Moab markan Eglón reyiparux tunka kimsaqallqun maraw luqtapxäna,

15ukhamïpan israelitanakax Tatitur art'asxapxäna, Tatitusti arnaqasitanakap ist'asin, mä qhispiyir jupanak taypit sayt'ayäna. Uka qhispiyirix Benjamín ayllunkiri, Guerá chachan Ehud yuqapänwa, jupasti ch'iqachünwa.

Mä urusti, israelitanakax Ehud chacha tuqiw Eglón reyirux qullqi apayapxäna.

16Ehud chachasti pä arini espada lurasitayna, ukasti niya chika metronïnwa, ukatsti isipa manqharuw kupi tuqi charaparu uchasiwayäna;

17ukat jupax Eglón reyir qullqi churiri saräna, uka reyisti wali lik'i jaqïnwa.

18Eglón reyir qullqi churasasti, Ehud chachax jupamp chika jutapkatayna ukanakampiw mistuwayxäna,

19Guilgal sat marka jak'ankki uka idolonak thiyaru purisasti, Ehud chachax kawkhankkäntix Eglón reyix ukkharuw kutt'awayäna, juparusti sänwa:

—Jach'a Munañan rey, mä yatiyäwiw jumatak utjitu, uksti juma saparukiw yatiyañ munsma —sasa.

Ukhamasti reyix jupan luqtirinakaparux amukt'ayasin, anqaruw mistuyäna.

20Ukatsti Ehud chachax, reyiruw jak'achasïna, jupax sapakiw junt'urt'asiñ utapankaskäna, ukat reyir säna:

—Juma reyitak apankta uka yatiyäwix Diosan yatiyäwipawa —sasa.

Uka arunak ist'asasti, Eglón reyix mäkiw qunuñapat saythapïna,

21Ehud chachan ch'iqachütapatsti, ch'iqa amparapampi kupïxat espada aysusisaw Eglón reyirux purakapat chhuqhuntäna.

22Wali ch'amampi chhuqhuntatapatsti, espadan katuñapamppachaw puraka manqhiru chhaqhantäna, Eglón reyin lik'ïtap layku, Ehud chachax janiw espadap apsuwaykxänti.

23Ukatsti Ehud chachax punkunak sum jist'antasin ventanat mistuwayxäna.

24Ehud chachan sarxatap qhipatsti, reyin luqtirinakapaw jutapxäna, punkunak suma jist'antat uñjasinsti sapxänwa: reyix junt'urt'asiñ utan jist'antasisaw yaq'art'askpacha, sasa.

25Ukampis wali jaya suyasinsti, reyin jan mistunxatapat llakisiñ qalltapxäna. Ukat punku jist'arasinsti, reyiparux uta pampan jiwata liwisiskir uñjapxäna.

26Jupanak ukham suykipansti, Ehud chachax jaltxänwa, Guilgal markan diosanakap jak'a sarakipawayasinsti, Seirat chiqaruw imantasxäna.

27Israelita uraqir purisinsti, Efraín qullun trompet phust'äna, israelitanakar jawsañataki, uk ist'asasti jupanakax taqpachaniw Ehud chachan qhipap qullunakat saraqanipxäna.

28Ehud chachasti sänwa: “Sarañäni, Tatituw moabita uñisirinakasarux atipjayistani” sasa. Israelitanakasti iyawsasaw jupar arkapxäna, Jordán jawir thiya pampanak katuntasipxäna, janirakiw khitirus uka chiqanjam sarakipayapkänti.

29Uka urusti, israelitanakax tunka waranqa wali ch'amani moabita soldadonakaruw jiwarayapxäna, janiw maynis qhispkänti taqinipuniw jiwarapxäna.

30Ukhamaw israelitanakax moabitanakar atipjapxäna. Ukatsti uka uraqin kimsaqallq tunka maraw sumankañax utjäna.

3. Samgar(3.31)Samgar chachax filisteonakan amparapat israelitanakar qhispiyi

31Uka qhipatsti israelitanakan jilïripax Samgar satänwa, jupasti Anat chachan yuqapänwa, jupax hierro k'achin lawampiw patak filisteonak jiwarayäna. Ukhamat Samgar chachax israelitanakar qhispiyäna.