SALMOS 56 - Qullan Arunaka DC

SALMO 56Diosaruw taqi chuymamp iyawsta, arup jach'añcharakta 1 Davidan q'uchupa, kunapachatix filisteonakax Gat markan jupar katuntapkäna ukapacha.

1 1 (2) Diosaxay,

nayat khuyapt'ayasita,

nayar arknaqir jaqinakaw utji;

uruy arumaw t'aqhisiyapxitu.

2 2 (3) Jan qarjasisaw timasirinakax arknaqapxitu,

waljaniw jach'achasiñampi jalxatapxitu.

3 3 (4) Axsarayaskta ukapachax

jumarukiw alkatsma.

4 4 (5) Diosaruw taqpach chuymamp iyawsta,

arunakap jach'ar aptarakta;

Diosaruw taqpach chuymamp alkatta,

janiw kunarus axsarkti:

¿Kamacharakitan jaqisti?

5 5 (6) Sapüruw arsutanakapampix chuym usuchjapxitu;

nayar ñanqha lurañak amtasipki.

6 6 (7) Ukkhar akkhar imantasisaw sarnaqapxi,

sartataxampi, qunt'ataxampi uñch'ukipxi,

akatjamat jalxatasin nayar jiwayañataki.

7 7 (8) ¿Ñanqha luräwinakapat jaltapxpachäniti?

Diosay, q'apisiñamampiy markanakarux t'unjam.

8 8 (9) Diosaxay, jaltatanakaxax juman jakhutawa;

jumaw jachatanakaxsa yattaxa.

¿Janit ukanakast qillqataman qhanäkisti?

9 9 (10) Jumat yanap maykäm ukapachaxa,

nayampi timasirinakax jayaruw jaltxapxani.

Nayax yattwa, Diosan nayar arxatirïtapa.

10 10 (11) Diosaruw taqpach chuymamp iyawsta;

arunakap jach'ar aptarakta;

Tatituruw taqpach chuymamp alkatta,

arunakap jach'ar aptarakta;

11 11 (12) Diosaruw taqi chuyma katuyasta,

janiw kunarus axsarkti:

¿Kamacharakitan jaqisti?

12 12 (13) Diosaxay, jumar arsutanakaxsti,

yuspagarañ chuymampiw phuqhäma,

13 13 (14) jiwañat nayar qhispiyatam layku,

tinkuñat nayar jark'aqatam layku,

Diosan nayraqatapansti

jakañ qhanan sarnaqañaxataki.