2 TIMOTEO QALLTA ARUNAKA - Qullan Arunaka DC
QALLTA ARUNAKAAka payïr qillqatax kunanaktix Pablox nayrïr qillqatapan Timoteor parlkän ukaruw phuqhachi. Pablox, niya jiwañapan jak'äxatap amuyasïna, ukat jupax Timoteon munasiñapata, iyawsañapat Diosarux yuspagaräna. Ukatsti Pablox t'aqhisiñanak taypinsa, arknaqat sarnaqañansa, jach'a yant'anakansa, “Jesucriston suma soldadopjam” ch'aman sayt'asiñapatakiw iwxt'äna (1.1—2.13). Mä tuqitsti, “luqhi ch'axwañanakar jan yäqañapatakiw” iwxt'äna, ukanakan jan akch'as walïtapata, ist'irinakarus mayjt'ayirïtapata, juk'amp ch'axwañanak utjayirïtapat iwxt'arakïna. Ukxarusti, pachpa jakäwip sum uñjasiñapataki, kuna chiqa yatichäwinaktix wawatpach Diosan Qillqatapan yatiqawaykän ukxan sum sayt'atäñapatakiw iwxt'arakïna (2.14—4.5).Aka qillqatax, Pablon jan walt'añan jikxatasitapat Timoteor yatiyatapampiw tukuyi: jupan ina ch'usat juchañchatäsin katuntatätapata, waljaninakan jaytanukut uñjasitätapata, mayninakan uñisitapat t'aqhisiyatätapata, Lucasak jupamp chikt'atäskatapata, ukatsti Timoteon jank'ak jupar uñjir sarañapatak achikt'asitapata. Taqi uka jan walt'añanakansti, Tatitux jupar yanapasin jupamp chikt'atäskänwa; ukat Tatiturux jach'achäna (4.6-22). Taqi ukanak tuqisti, Pablox mä suma uñtasïwi Timoteorux churawayäna; jakäwipampi, yatichäwipampi, suma amtäwipampi, llamp'u chuymanïtapampi, iyawsañanïtapampi, munasiñanïtapampi, ukatsti arknaqatäñan sayt'asiñatak ch'amanïtapampi.
