1 JUAN 3 - Qullan Arunaka DC

1Uñjapxam, Dios Awkix walpun munasistu, Diosan wawanakapaw satäñasatakixa, jïsa, wawanakapapunïsktanwa. Ukatpï Diosar jan iyawsirinakax jan uñt'kistutixa, jupanakan Diosar jan uñt'apxatap layku.

2Munat jilatanaka, jichhax Diosan wawanakapäxtanwa. Ukampis tukuy urunakan kunäkañänitix ukax janïraw qhanstkiti, kunapachatix Jesucristox uñstankan ukapachax jupjam tukkañän uk yattanwa, kunjämäkitix jupax ukhampach uñkatatas layku.

3Khitinakatix Jesucriston suyt'äwinïki ukax jupa pachpaw q'umachasi, kamisatix Jesucristox q'umäki ukhama.

4Ukampis khititix juch lurki ukax Diosan kamachi arup p'akinti, ukhamasti jucha lurañax Diosan arup p'akintañawa.

5Jumanakax niyaw yatipxta, Jesucristox juchanak q'umachiriw akapacharux juti, jupansti janiw kuna juchas utjkiti.

6Ukhamasti taqi khitinakatix jupampi mayak jakapki ukanakax janiw juchan sarnaqkxiti; ukampis juchan sarnaqirix janiw jupar uñjkiti, janirakiw uñt'kisa.

7Munat wawanakaxa, janiy khitis jumanakar k'arintpati: khititix chiqapar uñjki ukax askiwa, kamisatix jupax askïki ukhama,

8ukampis juch luririx supayankiwa, supayasti qalltatpach juch luri. Ukatakiw Diosan Yuqapax juti: supayan luräwip t'unjañataki.

9Khititix Diosan wawapäki ukax janiw juch lurkiti, Diosat yuritätap layku; Diosan wawapätap laykusti janiw juch lurkaspati.

10Ukhamat yatisi khitinakas Diosan wawanakapaxa, khitinakarakis supayan wawanakapaxa. Kawkïritix jan aski lurki, janiraki jilaparus munaski ukaxa, janiw Diosankkiti.

2. Munasiñan kamachipa

11Jumanakax qalltatpach ist'apkta uka arunakax akham siwa: “Maynit maynikam munasipxañasawa” sasa.

12Janiw Caín chachjamäñasäkiti, jupax supayankatap laykux jilaparuw jiwayi. ¿Kunatsa jiwayänxa? Cainan luratanakapax janiw walïkänti, jilapan luratapasti askïnwa.

13Munat jilatanaka, akapachankirinakatix uñisipxstam ukaxa, jan mayjt'asipxamti.

14Jiwasax jiwañat jakañaruw sarakipxtan, uksti jilanakasar munatas laykuw yattan. Khititix jan munki ukax jiwatäskiwa.

15Taqi khititix jilapar uñiski ukax jaqi jiwayiriwa. Jumanakax niyaw yatxapxta, jaqi jiwayirix janiw wiñay jakañanïkiti.

16Jiwasax kunäkitix munasiñax uk yatxtanwa, Jesucristox jiwas laykuw jakañap apt'asiwayi; jiwasanakasti uka pachparakiw jilanakas layku jakañas apt'asiñasa.

17Ukampis mayni qamiritix jilapan pist'ayasitap yatkasin jan khuyapt'ayaskchi ukaxa, ¿kunjämarak Diosan munasiñapasti chuymapan utjaspasti?

18Munat wawanakaxa, jiwasan munasiñasax janiw lakakïñapäkiti; jan ukasti luräwinak tuqiw uñacht'ayasiñapa.

19Jiwasax ukhamat chiqankatas yatisiñäni, ukatsti Diosan nayraqatapan chuymas chuymaw jikxatasiñäni;

20chuymasatix kuna tuqinsa juchañchistan ukaxa, Diosax chuymasat sipansa juk'ampi jach'awa, ukatsti jupax taqi kun yatiraki.

21Munat jilatanaka, chuymasatix jan juchañchkistan ukaxa, Diosan nayraqatapan iyawsañaw utjistu;

22kuntix maykañän uk jupax churistani, arunakaparjam phuqhatas layku, munataparjam luratas laykuraki.

23Jupan kamachipax Jesucristo Yuqapar iyawsañawa, maynit maynikam munasiñawa, kunjämtix jupax munkistu ukhama.

24Khitinakatix kamachiparjam phuqhapki ukanakax Tatitumpiw jakapxi, Tatitusti jupanakampiw jakaraki. Qullan Ajayup churkistu uka tuqiw jiwasampi jakatap yattan.