JOSUÉ 17 - Qullan Arunaka DC

Manasés ayllun uraqinakapa

1Kawkïr uraqinaktix Josean jilïr yuqapa Manasés ayllux katuqkäna uka uraqinakax akham jaljatänwa: Maquir chachan wila masi tamanakaparux, Moisesax niyaw Jordán jawirat inti jalsu tuqinkir Galaad, Basán uraqinak jupanakar churxatayna. Maquir chachax jan axsaras nuwasir jaqïnwa, jupasti Manasés chachan jilïr yuqapänwa, Galaadankirinakan awkiparakïnwa.

2Manasés chachan maynïr wawanakaparusti wila masi tamanakaparjamaw uraqix wakt'äna: Abiézer, Helec, Asriel, Siquem, Héfer, Semidá uka chachanakaru, jupanakax Manasés chachan wawanakapänwa, Josean allchhinakaparakïnwa.

3Ukampis Maquir chachan Selofhad sat allchhiparux janiw uraqix churatäkataynati, jupan jan yuqall wawanakanïtap layku. Jan ukasti phisqa imill wawapakiw utjäna: Mahlá, Noá, Hoglá, Milcá, Tirsá satäpxänwa.

4Uka imill wawanakasti Eleazar profetan ukaru, Josué chachan ukaru, markan jilïri jaqinakapan ukaruw sarapxäna, jupanakarusti sapxänwa: “Tatitux Moisesaruw sawayäna wila masinakaxaru, ukhamarak nanakar uraq churañapataki” sasa. Josué chachasti jupanakan mayitaparux uraqinak churäna, wila masinakap taypina, kunjämtix Tatitux siskatayna ukhamarjam phuqhasa.

5Ukhamat Manasés ayllux tunka chiqanakan uraqinak katuqäna, ukhamarak Jordán jawirat inti jalsu tuqinkki uka Galaad, Basán uraqinaka,

6Manasés chachan imill wawanakapax, yuqall wawanakjamarakiw uraqinak katuqapxäna. Galaad uraqisti Manasés chachan maynïr wawanakapatakïnwa.

7Manasés ayllun uraqinakapax Aser ayllumpi qurpäki uka chiqata, Micmetat chiqakamänwa, Siquem markat inti jalsu tuqina, uka chiqatsti aynach tuqiruw saraskakïna, Tapúah sat uma jalsukama.

8Tapúah uraqix Manasés aylluru wakt'kchïna ukasa, ukampis qurpa jak'ankki uka Tapúah markax Efraín ayllur churatänwa.

9Uka chiqatsti aynach qurpax inti jalanta tuqiruw saraskakïna Caná uma jalsu chiqanjama, Mediterráneo jach'a qutakama. Manasesan uraqinakapat jilpachax Caná uma jalsut amsta tuqinkänwa, ukampis uka uma jalsut aynach tuqir wakt'käna uka uraqinakan utjir mä qawqha markanakax Efraín ayllunkänwa.

10Efraín ayllun uraqipax uma jalsut aynach tuqinkänwa, Manasés ayllux amsta tuqinkarakïnwa, qurpasti amsta tuqirux Mediterráneo jach'a qutampi, Aser ayllun uraqinakapampi, inti jalsu tuqirusti Isacar ayllumpiraki.

11Uka ayllunakan uraqinakapan taypinxa walja markanaka jisk'a markanakamp kunaw utjarakïna, ukanakasti Manasés ayllunkirïnwa. Uka markanakasti: Bet-seán, Ibleam, Dor, Endor, Taanac, Meguido ukanakänwa. Dor markax quta iranankir markawa.

12Ukampis Manasés ayllun wawanakapax janiw uka markanak katuntirjamäpkänti, cananeo jaqinakan jan mistuñ munapxatap layku, ukat uka pachpan jakasipki.

13Uka qhipatsti, kunapachatix israelitanakax wali ch'amani tukxapxän ukkhaxa, cananeo jaqinakarux qullqi churasin phuqhapxañapatakiw wayt'äna, ukampis janiw uka uraqit jaqunukupkänti.

Joseat saraqir wawanakapax ch'umi uraqinak katuntapxi

14Josean wawanakapax Josué chacharux sapxänwa:

—¿Kunatarak nanakarusti mä jisk'a uraqik suertet churapxistasti? Nanakax waljanïpxtwa, Tatitusti nanakarux askinak churapxitu —sasa.

15Josué chachasti jupanakarux sänwa:

—Niyakixay jumanakax waljanïpxstaxa, Efraín qullunakapas jumanakatakix jisk'akirakïchixa, ukhamax ch'umi uraqir sarapxam, ukatsti ferezeo jaqinakana, refaita jaqinakan uraqinakap pampachjapxam —sasa.

16Jupanakasti sapxänwa:

—Chiqpachansa uka qullunakax nanakatakix wali pisiwa. Ukampis pampan jakapki uka cananeo jaqinakan carronakapax hierrot luratawa, Bet-seán markana, jisk'a markanakapampin jakir jaqinakanjama, ukhamarak Jezreel qhirwan jakapki ukanakansa —sasa.

17Josué chachasti Joseat saraqir wawanakapa Efraín, Manasés ayllunkirinakarux sänwa:

—Jumanakax waljanïpxtawa, wali ch'amanïpxaraktawa, janiw jumanakarux mä t'aqa uraqiki wakt'apkätamti,

18jan ukasti, uka ch'umintat qullunakax jumanakankarakiniwa, jumanakax uka ch'uminak katuntasipxäta. Cananeo jaqinakarusti jumanakax uka chiqat jaqunukupxäta, qawqha ch'amanïsipkpansa, hierrot lurat carronakanïsipkpansa —sasa.