1 REYES 4 - Qullan Arunaka DC

Salomonan yanapirinakapa

1Salomonax Israel markpachan reyipänwa.

2Jupan yanapirinakapasti akanakänwa: Sadoc sacerdoten Azarías yuqapa;

3Elihóref, Ahías, Sisá chachan qillqiri yuqanakapa; Ahihud chachan Josafat yuqapa, reyin qillqiripa.

4Joiadá chachan Benaías yuqapa, ejerciton jilïripa; Sadoc, Abiatar, sacerdotenaka;

5Natán chachan Azarías yuqapa, marka apnaqirinakan jilïripa; Natán sacerdoten Zabud yuqapa, reyin amuyt'ayiripa;

6Ahisar, reyin jach'a utap apnaqiripa; Abdá chachan Adoniram yuqapa, ch'ama lurañanak uñjiritak uchata.

7Salomonax taqpach Israel markan tunka payan apnaqirinak utt'ayäna, jupanakan lurañanakapaxa, reyimpiru wila masinakapampir taqi kunatix wakiski ukanak churañänwa. Jupanakat sapa maynirux maran mä phaxsiw manq'añanak churañax wakt'äna.

8Uka tunka payan apnaqirinakasti akanakänwa:

Ben-Hur, jupasti Efraín qullunakankir jaqinak apnaqäna;

9Ben-déquer, jupasti Macás, Saalbim, Bet-semes, Elón, Bet-hanán uka chiqanakankir jaqinak apnaqäna;

10Ben-hésed, jupasti Arubot, Socó, Héfer taqi uka chiqanakankir jaqinak apnaqarakïna;

11Ben-abinadab, jupasti Dor sat taqi uka suyunkir jaqinak apnaqäna; jupan warmipasti Salomonan Tafat sat phuchhapänwa;

12Ahilud chachan Baaná yuqapasti, Taanac, Meguido, uka chiqanakankir jaqinak apnaqäna, taqpach Bet-seán chiqa apnaqarakïna. Uka uraqisti Saretán sat thiyankiwa, Jezreel chiqat juk'amp aynachana, uraqisti Bet-seán ukawjata, Abel-meholá ukakamawa, Jocmeam ukatsa juk'amp khurina;

13Ben-guéber, jupasti Ramot marka apnaqäna, Galaad chiqan utjir markanakampi, uka markanakasti Manasés chachan Jaír yuqapankänwa. Jupasti Argob marka apnaqarakïna, Basán uraqina. Ukansti suxta tunka jach'a markanakaw utjäna, jach'a pirqanakan muyuntat markanaka, jach'a punkunakapax broncet lurat jist'katañanakanïnwa.

14Idó chachan Ahinadab yuqapasti Mahanaim uraqinkir jaqinak apnaqäna;

15Ahimaas, jupasti Neftalí uraqinkir jaqinak apnaqäna. Ahimaasax Salomonan Basemat sutini phuchhapan chachapänwa;

16Husai chachan Baaná yuqapax Aser, Zabulón chiqankir jaqinak apnaqäna;

17Parúah chachan Josafat yuqapasti, Isacar uraqinkir jaqinak apnaqäna;

18Elá chachan Simí yuqapasti, Benjamín uraqinkir jaqinak apnaqäna;

19Urí chachan Guéber yuqapasti, Gad uraqinkir jaqinak apnaqäna, uka uraqin Sihón sat reyin markapax jikxatasïna, uka reyisti amorreonakan reyipänwa, Basán uraqin Og sat reyin uraqip apnaqarakïna.

Ukhamarusa, taqpach marka apnaqirix, mä sapa jilïrikiw utjäna.

Salomón reyin yatiñ kankañapampi, qamiriptatapampi

20Judá markankiri, Israel markankir jaqinakax jan jakt'kayänwa, quta lakan utjir ch'allar uñtata. Manq'añasa, umañasa, jilarkiriw utjäna, jupanakasti kusisitäpxarakïnwa.

21 21 (22) Salomón reyix taqpach markanak apnaqäna, Éufrates jawirata, filisteonakan uraqipkama, Egipto uraqimpi qurpäki ukkhakama. Salomón reyin jakañapkamasti, taqi uka markanakax qullqi juparux churapxäna, juparurakiw jaysapxäna.

22 22 (2) Salomón reyimpina, jupan yanapirinakapampin manq'añapatakisti sapüruw wakisïna: suxta waranqa suxta patakan kilo sumïr jak'u, tunka kimsan waranqa pä patakan kilo yaqha jak'u,

23 23 (3) wali lik'intayat tunka urqu vacanaka, chhuxllamp uywat pä tunka urqu vacanaka, patak ovejanaka, ukhamaraki tarujanaka, gacelanaka, gamos ukanakat sipana, lik'i wallpanakat sipana.

24 24 (4) Salomonax Éufrates jawirata inti jalanta tuqin utjir taqpach markanak apnaqäna, Tífsah chiqawjata Gaza chiqakama, ukhamaraki uka uraqinkir reyinakarusa, jupasti uka muytpach uraqinkirinakarux sumankañ utjayarakitayna.

25 25 (5) Salomón reyin jakañapkamax Judá markankir jaqinakampi, Israel markankir jaqinakampix sumakiw jakasipxäna, Dan uraqit qalltasina Beerseba uraqkama. Jupanakax uva yapunaka, higo yapunak yapuchasipxäna.

26 26 (6) Salomonan nuwasiñ carronakapa imaña utanakapax pusi waranqaw utjäna, ukhamaraki tunka payan waranqa caballería soldadonakapa.

27 27 (7) Ukatsti uka apnaqirinakapaw kunanakatix wakiski ukanak reyimpiru, jawsatanakapampir churapxirïna jan kun pist'ayasa, kuna phaxsitix wakt'ki ukana.

28 28 (8) Sapa mayniw wakt'ki ukhamarjam aparapïna cebadampi, jichhumpi, caballonakatakisa, khumuñ uywanakatakisa kawkharutix satäki ukkharu.

29 29 (9) Diosasti Salomonarux yatiñ kankañampi, ch'ikhi kankañamp churäna, taqi kun amuyt'añ chuyma churarakïna.

30 30 (10) Salomonan yatiñ kankañapax jilt'atänwa, Egiptonkir yatiñan jaqinakat sipana, inti jalsu tuqinkir jaqinakat sipana.

31 31 (11) Jupax taqi jaqit sipan juk'amp yatiñanïnwa: Etán ezraíta jaqit sipana; Mahol chachan Hemán, Calcol, Dardá wawanakapat sipansa juk'amp yatiñanïnwa. Jupan aytat kankañapasti taqi uksa markanakan yatisirakïna.

32 32 (12) Jupasti kimsa waranqa säwi arunakampi, waranq phisqan q'uchunakamp qillqäna.

33 33 (13) Jupax quqanakxampita, alinakxampit parläna, Líbano chiqan alir cedro quqampita, pirqanakan alir ch'uxña quranakampita; ukatsti jamach'inakata, uraqinjam qatatnaqtir animalanakata, chawllanakat parlarakïna.

34 34 (14) Kawkhantix Salomonan yatiñ kankañapat ist'apkatayna taqi uka markanakat jaqinakax jutapxäna.