EZEQUIEL 33 - Qullan Arunaka DC

IV. QHISPIYASIÑ ARUNAKA(33—39)Marka uñjirin luräwinakapa(Ez 3.16-21)

1Tatitux sarakituwa:

2“Jumax Ezequiel, marka masinakamar parlam, jupanakarusti sarakim: ‘Kunapachatix nayax nuwasiñ mä markar apayankta ukapachax uka markankir jaqinakax mayniruw uñch'ukirïñapatak ajllipxi.

3Uka uñch'ukiristi uñisir ejercitor jutantaskir uñjasinxa, trompetap phust'asaw jaqinakarux yatiyañapa.

4Ukampis maynitix trompetan phust'asitap ist'kasa ukar jan yäqkani, ukat uñisirinakax purintanisin jupar jiwayapxani ukkhasti, jupa pachpaw juchanïskani,

5trompetan phust'asitaparutix ist'asapänxa, jupax qhispitaw uñjasisapäna.

6Ukampis uñch'ukiritix uñisir ejercitor jutaskir uñjasin, markankir jaqinakar yatiyañatak trompetap jan phust'kaspa, uñisir soldadonakasti maynir jiwayaspa ukaxa, uka jiwirix juchap laykuw jiwaskani; ukampis nayax uñch'ukiriruw ukan jiwatapat wayt'arakï.’

7“Jichhasti Ezequiel, nayax jumaruw Israel markan uñch'ukiripat uchsma. Jumasti nayan arunakax katuqäta, ukatsti nayan iwxanakax jupanakar churarakïta.

8Inampis nayax mä jucharar jaqitaki juchañchäwi aru arsurista jupan jiwañapataki, ukatsti jumatix jupampi jan parlkäta uka jan wali jakäwip apanukuñapataki, ukat janirak amuyt'askani, uka jucharar jaqix juchap laykuw jiwaskani, ukampis nayax jumaruw jupan jiwatapat wayt'äma.

9Ukampis jumatix uka ñanqha jucharar jaqir amuyt'asiñapatak parläta, uka ñanqha jakañapsa apanukuñapataki, jupasti janirak ist'kätamti, ukapachax jupax juchap laykuw jiwaskani, jumasti jakañam qhispiyasïtawa.

Sapa maynin luräwinakapa(Ez 18.21-32)

10“Jumasti Ezequiel, Israel markarux sarakim: ‘Jumanakax sapxtawa: Juchanakampi jan wali lurañanakampi phuqhantatätanwa. Ukatpï jichhax jakkirpach ñusantasktanxa. ¿Kunjämarak jiwasasti jaksnasti? sasa.

11Jichhasti jupanakarux sarakim: Naya, Tatituw juramentompi arsta, janiw nayax qhuru jaqin jiwañap munkti, jan ukasti uka qhuru jakañap apanukusin jakañap munta. Israelitanaka, ¡jumanakax uka jan wali sarnaqäwinakam apanukupxam! ¡Kunatix jan walïki uk jan lurapxamti, ukhamat jan jiwapkätati!’ sasa.

12“Jumasti Ezequiel, marka masinakamarux sarakim: ‘Mä aski jaqitix jucha luranixa, nayra suma luräwinakapax janiw qhispiykaniti, mä jan wali jaqitix uka jan wali jakañap apanukxanixa, nayra jan wali sarnaqäwipax janiw juparux jiwañar puriykaniti. Mä aski jaqitix jucha luranixa, nayra aski luräwinakapax janiw jakaskañapataki askïkaniti.

13Nayatix mä aski jaqir jakañ churañatak arsüxa, ukatsti uka aski jaqitix aski luräwipar alkatasisin jan wali lurarakini ukaxa, janiw nayatakix uka aski luratanakapax kunatakis askïkaniti, jan ukasti jucha luratapatxa jiwakipuniniwa.

14Nayatix mä jan wali jaqir jiwañapatak juchañchäxa, ukat uka jaqix juchap apanukuni, ukatsti askiru, chiqaparu taqi kunsa lurarakini,

15kuntix katuqkatayna, jan ukax lunthatkatayna ukanaksa kuttayxani, jakañ churiri kamachinaksa phuqharakini, jan wali lurañanakapsa apanukurakinixa, uka jaqix chiqpachaw jakani, janiw jiwkaniti.

16Niyakixay jichhax askinaka, taqi kunsa chiqaparurak lurxchixa, ukhamächi ukax jakaskaniwa, janirakiw nayax mayampsa jucha luratanakapat amtaskxäti.’

17Marka masinakamax sapxaniwa, nayan jan chiqapar uñjataxa, ukampis jupanakaw jan chiqapar uñjapkiti.

18Mä aski jaqitix aski luräwip apanukusin jan wali lurañar katuyasini, ukapachasti uka jaqix juchap laykuw jiwani.

19Ukampis mä jan wali jaqitix jan wali lurañanakap apanukuni, ukatsti kunatix askïki chiqapäki ukanak lurxani, ukapachasti, uka aski luratanakap laykuw jakarakini.

20Jumanakasti sapa kutiw parlapxtaxa: ‘Tatitux janiw kunsa chiqapar uñjkiti’ sasa. Ukampis nayaw sapa mayni jumanak israelitanakarux luräwinakamatjam uñjapxäma.”Jerusalén markan aynacht'atapa

21Niya tunka payan maraw saraqxatayna Babilonia markar katuntat purinipkta ukkhatxa, ukat tunka phaxsina, phisqa uru saraqatarusti, mä jaqiw Jerusalén markat jaltanxatayna, jupasti Jerusalén markan uñisirin amparaparu jalt'atap yatiyitu.

22Uka jaltanir jaqina janïr purinkipan nayräx arumasti, Tatituw nayxar amparap luqxatasin amutu tukuyitu; qhipärmanthi willjtasti, kunapachatix uka jaqix purinkän ukkhasti, Tatitux wasitat parlayxitu.

Jaqinakan juchanakapa

23Tatitusti sarakituwa:

24“Kawkïr jaqinakatix Israel uraqin t'unjat markanakapan jakapki ukanakax, akham sasaw sarnaqapxi: ‘Abraham chachax sapakïnwa, ukampis jupax taqi aka uraqpach katuntasïna; jiwasasti waljanïtanwa, ukatpï aka uraqi katuntasiñänixa” sasa.

25-26Jichhax jupanakarux sarakim: ‘Tatitux akham siwa: Jumanakax wilan aycha manq'apxtaxa, idolonakaruw yupaychapxtaxa, jaqinak jiwarayapxtaxa, nuwasiñanakaruw uskusipxtaxa, kuntix nayax uñiskta ukanak lurapxtaxa, taqiniw jila masiman warmipampis wachuqa jucha lurapxaraktaxa, jichhasti ¿aka uraqix jiwasankaniw sapxtati?” sasa.

27“Jupanakar sarakim: ‘Tatitux akham siwa: Naya, Tatituw sutix layku arsta, t'unjata markanakan jakirinakax jiwarayataw uñjasipxani, pampan utjirinakarusti montenkir animalanakaw manq'antani, qarqanakana, qarqa p'iyanakan jakirinakasti kunayman usumpiw jiwarapxani.

28Aka uraqirusti ch'usa wasara, q'ala tukjat tukuyä, ch'amapampi, wali jach'a jach'a tukutapampsti tukjarakïwa. Israel markan qullunakapasti ch'usa wasararuw tukuni, janirakiw khitis uka chiqa sarakipkxaniti.

29Kunapachatix nayax uka axtaskañ juchanak lurapxatapat aka marka ch'usa wasar tukuykä, q'ala t'unjat jaytkarakï, ukapachaw yatipxani, nayan Tatitütaxa.’

30“Ezequiel, marka masinakamax pirqa jak'anakana, uta punkunakan jupanakkamaw jumxat parlasipki akham sasa: ‘Jutapxam, Tatitun arunakap ist'apxañäni, Ezequiel tuqi yatiykistu uka arunaka’ sasa.

31Ukhamaw markaxax jutasin juman nayraqataman qunt'asipxi, kunjämtix arunakam ist'añatakix lurapxirïkäna ukhama. Ukampis janiw uka arunakarjam sarnaqapkiti. Munasiña q'uchunakäkaspas ukhamak q'uchupxi, jupanakan chuymanakapasti qullqin qhipap sarañankiwa.

32Jupanakasti jumax munasiñ q'uchunak q'uchurïkasmas ukhamak amuyapxtamxa, suma q'ucht'irïkasmasa, arpsa sum toct'kasma ukhama. Arunakam ist'apxiwa, ukampis janiw uka arunakarjam sarnaqapkiti.

33Ukampis taqi uka arunakax phuqhasiniwa, phuqhaskani ukkhaw jupanakax yatipxani, jupanak taypin mä profetan utjatapa.”