2 REYES 15 - Qullan Arunaka DC

Azarías reyin Judá marka apnaqatapa(2 Cr 26.3-5,16-23)

1Israel markankir Jeroboam reyix pä tunka paqallqun mara marka apnaqkän ukkhaw, Amasías chachan Azarías yuqapax Judá uraqin marka apnaqañ qalltäna.

2Marka apnaqañ qalltkän ukapachasti Azariasax tunka suxtan maranïnwa, jupasti Jerusalén markan phisqa tunka payan maraw marka apnaqäna. Jupan taykapax Jecolías satänwa, Jerusalén markankirïnwa.

3Azarías reyin luratanakapasti Tatitun nayraqatapan chiqapänwa, kunjämtix Amasías awkipan luratanakapax chiqapäkäna ukhama.

4Ukampis qullu patanakan yupaychañ chiqanakax janiw apaqatäkänti, markachirinakax uka altaranakan wilañchanak luqtasipkakïnwa, inciensonaksa nakhayasipkakïnwa.

5Tatitux lepra usumpiw Azarías reyirux jiwañap urukam mutuyäna, ukhamaw reyix utapan yaqhachat jakäna, lurañanakap jaytasa, ukatsti Jotam sat yuqapaw lurañanak sarayäna, markarus apnaqarakïna.

6Azarías reyin ukat ukxar sarnaqäwipasa, taqi luratanakapasa Judá markankir reyinakan luräwinakapa qillqatankiwa.

7Azarías reyix jiwxän ukapachasti, Davidan Markapan jupar imt'xapxäna, nayra awkinakapan amay imäwip thiyaru. Jupa lantisti Jotam sat yuqapaw marka apnaqxäna.

Zacarías reyin Israel marka apnaqatapa

8Kunapachatix Judá uraqinkir Azarías reyix kimsa tunka kimsaqallqu mara markar apnaqkän ukkhaw, Jeroboam chachan Zacarías yuqapax Israel marka apnaqañ qalltäna. Jupasti Samaria markan suxta phaxsikiw marka apnaqawayäna.

9Jupan luratanakapax Tatit nayraqatan jan walinakänwa, nayra awkinakapan luratanakapjamarakïnwa, jupasti kuna juchanakampitix Nabat chachan Jeroboam yuqapax Israel markar juch luraykatayna ukanakat janiw jithiqtkänti.

10Ukatsti Jabés chachan Salum yuqapaw Zacarías reyitaki sayt'äna, ukat jupar Ibleam chiqan nuwantasin jiwayäna, ukhamat Zacarías lanti reyïxañataki.

11Zacarías reyin ukat uksar sarnaqäwipax Israelankir reyinakan luräwinakapa qillqatankiwa.

12Ukhamat phuqhasïna kuntix Tatitux Jehú reyir yatiykatayna ukaxa: “Yuqanakama, allchhinakama, allchhinakaman allchhipaw Israel markan reyi qunuñapan qunt'asini” sasa.

Salum reyin Israel marka apnaqatapa

13Jabés chachan Salum yuqapasti marka apnaqañ qalltäna, kunapachatix Ozías reyix kimsa tunka llätunkan mara Judá marka apnaqkän ukapacha. Jupasti mä phaxsikiw Samaria markan marka apnaqawayäna,

14Gadí chachan Menahem yuqapaw Tirsá markat Samaria markar purinisin Salum reyir usuchjäna, ukatsti jiwayasinxa, jupaw Israel marka apnaqäna.

15Salum reyin ukat ukxar sarnaqäwipasa, luratanakapasa, Zacarías reyitak jan wali amtatapasa, Israelankir reyinakan luräwinakapa qillqatankiwa.

16Uka urunakasti Menahem reyix, Tífsah sat marka q'al tukjäna, ukatsti kunanakatix uka markampina, uka thiya uraqinakapampin utjkatayna ukanak taqpun katuntasïna, Tirsá chiqat qalltasa, ukatsti markachirinakarux taqpachaniruw jiwarayäna, usur jaqi warminakarus purakanakap jist'jäna, markan punkunakap jupatak jan jist'arapxatap layku.

Menahem reyin Israel marka apnaqatapa

17Azarías reyix kimsa tunka llätunkan mara Judá marka apnaqkän ukkhaw, Gadí chachan Menahem yuqapax Israel marka apnaqañ qalltäna, jupasti Samaria markan tunka maraw marka apnaqäna.

18Ukampis luratanakapax Tatitun nayraqatapan jan walinakänwa; jupasti kuna juchanakampitix Nabat chachan Jeroboam yuqapax Israel markar jucha luraykäna ukanakat janiw saraqtkänti.

Uka urunakansti,

19Asiria markan Tiglat-piléser sat reyipax Israel uraqiruw mantantäna. Menahem reyisti, juparux kimsa tunka kimsan waranqa kilo qullqi churäna, Israel marka apnaqäwiparu ch'amañchasin yanapt'ayasiñataki.

20Menahem reyix Asiriankir reyir ukataq qullqi churañatakisti, Israelankir taqi qamir jaqinakaruw chikat kilo qullqit jila churapxañapatak wayt'äna. Ukhamat Asiriankir Tiglat-piléser reyix uraqipar kutt'xäna.

21Menahem reyin ukat ukxar sarnaqäwipasa, taqi luratanakapasa Israelankir reyinakan luräwinakapa qillqatankiwa.

22Jupan jiwxatapatsti, Pecahías yuqapaw jupa lantix marka apnaqxäna.

Pecahías reyin Israel marka apnaqatapa

23Azarías reyix Judá marka tunka phisqan mara apnaqkäna ukkhaw, Menahem chachan Pecahías yuqapax, Israel marka apnaqañ qalltäna, jupasti Samaria markan pä maraw markar apnaqäna.

24Ukampis jupan luratanakapax Tatitun nayraqatapan jan walinakänwa, jupasti kuna juchanakampitix Nabat chachan Jeroboam yuqapax Israel markar juch luraykäna ukanakat janiw saraqtkänti.

25Ukatsti, ejerciton jilïrinakapat mayniw Pecahiasatak jan wali amtäna, uka jilïristi Remalías chachan Pécah sat yuqapänwa. Ukatsti Galaad chiqankir phisqa tunka jaqinakampi yanapayasisaw reyin utapar saräna, ukan Pecahías reyir jiwayäna, Argob, Arie sat pani chachanakampiru, ukhamat Pécah sat chachax Israel marka apnaqäna.

26Pecahías reyin ukat uksar sarnaqäwipasa, taqi luratanakapasa, Israelankir reyinakan luräwinakapa qillqatankiwa.

Pécah reyin Israel markan reyïtapa

27Azarías reyix phisqa tunka payan mara Judá marka apnaqkän ukkhaw, Remalías chachan Pécah yuqapax Israel marka apnaqañ qalltäna, jupasti Samaria markan pä tunka maraw Israel marka apnaqäna.

28Ukampis jupan luratanakapax Tatitun nayraqatapan jan walinakänwa, jupasti kuna juchanakampitix Nabat chachan Jeroboam yuqapax Israel markar juch luraykäna ukanakat janiw saraqtkänti.

29Uka urunakansti, Asiriankir Tiglat-piléser reyiw purintasin Iión, Abel-bet-maacá, Janóah, Quedes, Hasor, Galaad, Galilea markanak katuntasïna, Neftalí taqi uka uraqinak katuntasirakïna, markachirinakaparusti Asiria markaruw katuntat apxäna.

30Ukat Elá chachan Oseas yuqapax Remalías chachan Pécah yuqapatak jan walinak amtäna, juparusti nuwjasin jiwayäna. Ukhamat Oseasax Israel markan reyipar tuküna, kunapachatix Ozías chachan Jotam yuqapax pä tunka mara Judá marka apnaqkäna ukapacha.

31Pécah reyin ukat ukxar sarnaqäwipasa, taqi luratanakapasa, Israelankir reyinakan luräwinakapa qillqatankiwa.

Jotam reyin Judá markan reyïtapa(2 Cr 27.1-9)

32Remalías chachan Pécah yuqapax, payïr mara Israel marka apnaqkän ukkhaw, Ozías chachan Jotam yuqapax Judá marka apnaqañ qalltäna.

33Jupasti ukapachax pä tunka phisqan maranïnwa, jupasti Jerusalén markan tunka suxtan maraw marka apnaqäna. Jupan taykapasti Jerusá sutinïnwa, Sadoc chachan phuchhapa.

34Jotam reyin luratanakapasti Tatitun nayraqatapan askïnwa, kunjämtix Ozías awkipan luratanakapax askïkäna ukhama,

35jupasti Tatitun utapana amsta tuqinkir punkup luräna. Ukampisa, qullu patanakan yupaychañ chiqanak janiw apaqkänti, ukansti jaqinakax wilañchanak luqtasipkakïnwa, inciensonaksa nakhayasipkakïnwa.

36Jotam reyin ukat uksar sarnaqäwipasa, taqi luratanakapasa, Judá markankir reyinakan luräwinakapa qillqatankiwa.

37Uka urunakansti, Tatitux Judá markar nuwantañatakiw Resín sat Siria markan reyipampiru, Pécah sat Israelan reyipampiru khithañ qalltäna.

38Jotam reyix jiwxän ukkhasti, juparux Davidan Markapan imt'xapxäna, nayra awkinakapan amay imäwip thiyaru. Ukatsti Ahaz yuqapaw jupa lantix marka apnaqxäna.