NEHEMÍAS 7 - Qullan Arunaka DC

Nehemiasax irpirinak ajlli

1Pirqa wasitat lurañ tukuyxasinxa, punkunakap uchantxapxta, ukatsti punku uñjirinaka, q'uchurinaka, sacerdotenakar yanapirinak ajllipxarakta.

2Jerusalén marka apnaqañapatakisti Hananí jilaxaruw uchta, Hananías chacharusti reyin jach'a utapan jilïripat ucharakta, jupax aski jaqïnwa, ukhamarus yaqha jaqinakat sipan Tatitur axsartirïnwa.

3Panpacharuw sarakta: “Intix sum jalsunxani ukkhaw Jerusalén markan punkunakapax jist'arasini, jayp'thapxani ukkharakiw jist'antasxani, janïra uñjirinakax sarxapkan ukkha” sasa. Ukhamarakiw Jerusalenan jakirinak taypit uñch'ukirinak ajllirakta, ukhamata mayninakax uchatäki ukkhana, mayninakasti utanakap nayräxan uñch'ukipxañapataki.

4Jerusalén markax wali jach'änwa, ukampis juk'a jaqinikirakïnwa, utanakan janïra wasitat askichatätap layku.

Babilonia markat kutt'anirinaka(Esd 2.1-70)

5Ukatsti Tatituw nayar ch'amañchitäna aytat jilïr jaqinakaru tantachañataki, marka apnaqirinakarusa, markachirinakarusa; ukhamat taqpach wila masinakan sutinakap qillqañataki. Ukatsti mä qillqata jikxatarakta, kawkïr wila masinakatix nayra purinipkäna ukan sutinakapan qillqata. Ukansti akïrinakaw qillqatäna:

6-7“Akanakawa Judá uraqin yurir israelitanakan sutinakapaxa, jupanakasti Babilonia markar Nabucodonosor reyin apataw uñjasipxäna, apatäsinsti Jerusalenaruw kutt'anxapxäna, ukhamarak Judänkir yaqha chiqanakaru, sapa maynisa markaparkama, jupanakarux aka jilïr irpirinakaw yanapapxäna: Zorobabel, Josué, Nehemías, Azarías, Raamías, Nahamaní, Mardoqueo, Bilsán, Mispéret, Bigvai, Nehúm, Baaná uka chachanaka.

8“Parós chachan wawanakapat pä waranqa patak paqallq tunk payani jaqinakaw kutt'anipxäna;

9Sefatías chachan wawanakapat kimsa patak paqallq tunk payani;

10Árah chachan wawanakapat suxta patak phisqa tunk payani;

11Pahat-moab chachan wawanakapat pä waranqa kimsaqallq patak tunka kimsaqallqun jaqinaka. Taqi jupanakasti Josué chachat saraqiripxänwa.

12Elam chachan wawanakapat waranqa pä patak phisqa tunk pusini.

13Zatú chachan wawanakapat kimsaqallq pataka pusi tunka phisqani;

14Zacai chachan wawanakapat paqallq patak suxta tunkani;

15Binuy chachan wawanakapat suxta patak pusi tunk kimsaqallquni;

16Bebai chachan wawanakapat suxta patak pä tunk kimsaqallquni;

17Azgad chachan wawanakapat pä waranqa kimsa patak pä tunk payani;

18Adonicam chachan wawanakapat suxta patak suxta tunk paqallquni;

19Bigvai chachan wawanakapat pä waranqa suxta tunk paqallquni;

20Adín chachan wawanakapat suxta patak phisqa tunk phisqani;

21Ater chachan wawanakapat llätunk tunk kimsaqallqun jaqinaka. Taqi jupanakasti Ezequías chachan wawanakapäpxänwa;

22Hasum chachan wawanakapat kimsa patak pä tunk kimsaqallquni;

23Besai chachan wawanakapat kimsa patak pä tunk pusini;

24Harif chachan wawanakapat patak tunka payani;

25Gabaón chachan wawanakapat llätunk tunk phisqani;

26Belenankiri, Netofankiristi patak kimsaqallq tunk kimsaqallquni;

27Anatot ukankirinakasti pataka pä tunk kimsaqallquni;

28Bet-azmávet ukankirinakasti pusi tunk payani;

29Quiriat-jearim, Quefirá, Beerot ukankirinakasti paqallq patak pusi tunk kimsani;

30Ramá, Gueba ukankirinakasti suxta patak pä tunk mayani;

31Micmás ukankirinakasti patak pä tunk payani;

32Betel, Ai ukankirinakasti patak pä tunk kimsani;

33Nebo ukankirinakasti phisqa tunk payani;

34Elam ukankirinakasti waranqa pä patak phisqa tunk pusini;

35Harim ukankirinakasti kimsa patak pä tunkani;

36Jericó ukankirinakasti kimsa patak pusi tunk phisqani;

37Lod, Hadid, Onó ukankirinakasti paqallq patak pä tunk mayani;

38Senaá ukankirinakasti kimsa waranqa llätunk patak kimsa tunkani;

39Sacerdotenakatsti akanakaw kutt'anipxarakïna: Josué chachan wila masipata, Jedaías chachan wawanakapat llätunk patak paqallq tunk kimsani sacerdotenaka;

40Imer chachan wawanakapat waranqa phisqa tunk payani;

41Pashur chachan wawanakapat waranqa pä patak pusi tunk paqallquni;

42Harim chachan wawanakapat waranqa tunka paqallquni.

43“Josué, Cadmiel chachanakat saraqir levitanakasti, paqallq tunka pusiniw kutt'anipxäna, jupanakax Hodaviasan wila masipäpxänwa.

44“Asaf chachan q'uchuri wawanakapat patak pusi tunk kimsaqallquni.

45“Punku uñjirinakasti, aka jaqinakan wawanakapäpxänwa: Salum, Ater, Talmón, Acub, Hatitá, Sobai ukampita; jupanakasti patak kimsa tunk kimsaqallquniw kutt'anipxäna.

46“Tatitun utapan luqtirïpkäna ukanakasti aka jaqinakan wawanakapäpxänwa: Sihá, Hasufá, Tabaot,

47Queros, Siahá, Padón,

48Lebaná, Hagabá, Salmai,

49Hanán, Guidel, Gáhar,

50Reaías, Resín, Necodá,

51Gazam, Uzá, Paséah,

52Besai, Meunim, Nefusim,

53Bacbuc, Hacufá, Harhur,

54Baslut, Mehidá, Harsá,

55Barcós, Sísara, Temá,

56Nesíah, Hatifá ukampita.

57“Salomonan luqtirinakapan wawanakapatsti Sotai, Soféret, Perudá,

58Jaalá, Darcón, Guidel,

59Sefatías, Hatil, Poquéret-hasebaím, Amón ukampita.

60Tatitun utapan irnaqirinaka, ukhamarak Salomonan luqtirinakapat wawanakapax kimsa patak llätunk tunka payanïnwa.

61“Tel-mélah, Tel-harsá, Querub, Adón, Imer uka markanakat purinirinakasti janiw khiti wila masi tuqit israelitäpxatapsa qhanañchirjamäpkänti, jupanakasti:

62Delaías, Tobías, Necodá uka chachanakan wawanakapänwa, taqpachanix suxta patak pusi tunka payanïnwa.

63Sacerdotenakan wila masinakapasti akïrinakan wawanakapäpxänwa: Hobaías, Cos, Barzilai uka chachanakata. Barzilai chachax awkch'ipan sutipat sutinïnwa, jupax Galaadankir Barzilai chachan mayni phuchhapampiw jaqichasitayna.

64Jupanakasti sutinakap qillqatan thaqtapxäna, ukampis janiw jikxatapkänti, ukat jupanakarux sacerdote irnaqäwinakat jark'apxäna.

65Ukhamarusa, marka apnaqirixa, jupanakarux luqtat manq'anakat jan manq'apxañapatakiw yatiyäna, mä sacerdoten uk yatxatañapkama, Urim, Tumim sat qalanak tuqi.

66“Babilonia markat kutt'anir jaqinakasti pusi tunka payan waranqa kimsa patak suxta tunkanipxänwa.

67Jupanakamp chikasti paqallq waranqa kimsa patak kimsa tunk paqallquni luqtirinakaw jutapxäna, ukhamarakiw pä patak pusi tunk phisqani q'uchurinaka.

68Jupanakansti, paqallq patak kimsa tunk suxtan caballonaka, pä pataka pusi tunk phisqani mulanaka,

69 69 (68b) pusi pataka kimsa tunk phisqan camellonaka, suxta waranqa paqallq pataka pä tunkani asnonakaw utjarakïna.

70 70 (69) “Wila masinakan yaqhip jilïrinakapasti, pirqa lurañatakix qullqi churapxäna; marka apnaqiristi qullqi katuriruw kimsaqallqu kilo quri, phisqa tunka jach'a qirunaka, ukatsti phisqa patak kimsa tunkan sacerdote isinak katuyäna.

71 71 (70) Wila masinakan jilïrinakapasti qullqi katuriruw patak suxta tunkan kilo quri churapxäna, ukhamarak waranqa pä patak tunkan kilo qullqimpi;

72 72 (71) ukxar utjir jaqinakasti patak suxta tunkan kilo quri, waranqa patakan kilo qullqi churapxäna, ukhamarak suxta tunka paqallqun sacerdote isinaka.

73 73 (72) “Ukatsti sacerdotenakasa, levitanakasa, punku uñjirinakasa, q'uchurinakasa, markachirinakasa, Tatitun utapan yanapirinakasa, taqi Israel markpachaw utjäwiparkam utt'ayatäxäna.”

II. KAMACHIN TAQINITAK ULLART'ATÄTAPA, MARKACHIRINAKAN PHUQHAÑATAK ARSUPXATAPA(7.73b[72b]—10.39)Kamachi arunak taqinitak ullart'atätapa

Paqallqu phaxsïri purinipansti, israelita jaqinakax markanakapar suma utjantatäxapxänwa.