2 REYES 10 - Qullan Arunaka DC

Jehú reyix Ahab chachan wila masinakaparuw q'al tukji

1Ahab reyix paqallq tunka wawanïnwa, jupanakasti Samaria markan jakapxäna; ukhamasti Jehú reyix marka apnaqirinakaru, jilïrinakaru, Ahab reyin wawanakapan yatichirinakaparux qillqatanak apayäna, uka qillqatanakansti akham jupanakar säna:

2“Samaria markax pirqanakani, nuwasiñ yänakani, caballonakani, nuwasïwir sarañ carronakani suma sayt'at markawa. Nayax Ahab reyin wawanakapan jumanakampi jakatap yatta, ukhamasti, aka qillqata katuqasinxa,

3jumanakax Ahab reyin wawanakapat maynir ajllipxam, sumäki, wali ch'ikhïki ukaru, awkip lanti reyit qunt'asiñapataki, ukatsti reyiman wila masinakapar arxatañatak wakichasipxam” sasa.

4Uka qillqat katuqasinsti jupanakax walpun axsarayasipxäna, ukat sapxarakïna: “Pä reyisa janiw Jehú reyirux atipirjamäkänti, ¿kunjämarak jiwasasti jupar atipañänisti?” sasa.

5Ukatsti reyi uta apnaqir jilïrimpi, marka apnaqirimpi, jilïrinakampi, Ahab reyin wawanakap yatichirinakampix, Jehú reyir aka yatiyäwi apayapxäna: “Nanakax juman luqtirimäpxtwa, kuntix sapkitäta uk lurapxä, ukampis janiw khitirus reyit utt'ayapkäti. Jumax kunjämarutix munkta ukhamar luraskakim” sasa.

6Jehú reyisti payïr kutiw qillqat jupanakar apayäna, akham sasa: “Jumanakatix nayampïpxsta ukaxa, ukatsti nayar jaysañ munapxarakchista ukaxa, Ahab reyin wawanakapar katuntasin p'iqinakap apaqapxam, ukatsti qharüru akapacharu uka p'iqinak apt'ata Jezreel markar jutapxam” sasa.

Ahab reyin paqallq tunka yuqanakaparusti markankir aytat jilïr jaqinakaw uywapxatayna,

7ukhamasti uka qillqatanak katuqasinxa, uka paqallq tunka waynanak katusin jiwarayapxäna; p'iqinakapsti apaqasin canastanakaruw uchapxäna, ukatsti Jezreel markaruw apayapxäna.

8Ukatsti mä yatiyiriw Jehú reyir yatiyäna, akham sasa:

—Reyin yuqanakapan p'iqinakap apanipxatayna —sasa.

Jehú reyisti sänwa:

—Uka p'iqinak marka mantañawjar payar qutucht'apxam, ukatsti ukawjar qharürkam jaytawayapxam —sasa.

9Qhipürusti, Jehú reyix mistusinxa, taqpach markachirinak nayraqatan säna:

—Jumanakax janiw juchanïpktati. Nayaw reyixarux jupatak jan wali amtasin jiwayta; ukampisa, ¿khitirak taqi akanakar jiwarayisti?

10Jumanakax sum yatipxam, kuntix Tatitux Ahab reyin wila masinakapatak arskäna taqi ukax phuqhasiniwa. Tatit pachparakiw luri kuntix Elías luqtirip tuqi arskatayna ukxa —sasa.

11Jehú reyisti Jezreel markanxa, Ahab reyin wila masinakapat jilt'irirux jiwarayänwa, ukhamaraki taqi wali aytata jaqinakaparu, wali suma masinakaparu, sacerdotenakaparusa. Janipuniw maynirus jaltaykänti.

12Ukatsti Jehú reyix Samariaruw sarxäna, sarkasinsti Bet-equed sat chiqaruw purïna, kawkhantix awatirinakax tantachasipxirïkän uka chiqaru.

13Ukansti Judá markankir Ocozías reyin jilanakapampiw jikisïna. Jehú reyisti jupanakaruw jiskt'i:

—¿Khitïpxtas jumanakaxa? —sasa.

Jupanakasti sapxänwa:

—Nanakax Ocozías reyin jilanakapäpxtwa, Ahab reyina, Jezabel reinan wawanakapar aruntiriw jutapxta —sasa.

14Ukat Jehú reyix arkirinakapar säna:

—¡Jupanakar jakaskirpach katuntapxam! —sasa.

Arkirinakapasti jakaskirpach uka jaqinakar katuntapxäna, ukatsti Bet-equed sat chiqankir uma phuch'u jak'an jupanakar kharirapxäna. Uka jaqinakasti pusi tunka payanïnwa, janiw maynirus jaltayapkänti.

15Ukawjat sarxasinsti, Jehú reyix Recab chachan Jonadab yuqapampiw jikisïna, Jonadabax jupamp jikisiriw jutaskatayna. Jehú reyisti jupar aruntasin säna:

—¿Jumax chiqpach chuymampit nayar uñjista, kamisatix nayax chiqpach chuymampi jumar uñjksma ukhama? —sasa.

Jonadab chachasti sänwa:

—Jïsa, chiqawa —sasa.

Ukxaruw Jehú reyix säna:

—Ukhamächi ukax, amparam luqtanim —sasa.

Jonadab chachasti amparap luqtäna, ukatsti Jehú reyix carroparuw makhatayäna,

16akham sasa:

—Nayamp chik sarañäni, ukatsti Tatitur nayan taqi chuymampi munatax yatïta —sasa.

Ukhamaw Jehú reyix carropat Jonadabar irpäna.

17Samaria markaru mantasinsti, Jehú reyix Ahab reyin saraqirinakapat khitinakatix ukan qhiparapkatayna ukanakarux taqiniruw jiwarayäna. Jan maynin tukjäna, kunjämtix Tatitux Elías tuqi arskatayna ukhamarjama.

Jehú reyix Baal diosar yupaychañanak tukji

18Uka qhipatsti Jehú reyix taqpach markaruw tantacht'äna, ukat jupanakar säna:

—Ahab reyix Baal diosar juk'aki yupaychäna, ukampis nayax ukat juk'ampi yupaychä.

19Ukhamasti jichhax Baal diosan taqi profetanakaparu, yupaychirinakaparu, sacerdotenakapar jawsanipxam, jan maynin jutapxpan, nayax mä jach'a wilañcha Baal diosar luqtañatak wakichta. Jan jutirinakasti juchañchataw uñjasini —sasa.

Chiqpachansa, Jehú reyix Baal diosar yupaychir jaqinakar jiwarayañatakiw ukham sallqjäna;

20ukat jupax yatiyapxañapatak säna, Baal diosar mä jach'a phunchhäwimpi uruyañataki; ukasti ukhamaw lurasïna.

21Ukatsti jupax Israel uraqpacharuw yatiyirinak khithäna, ukatxa Baal diosar yupaychirinakax jan mayniniw uka utar purinipxäna, Baal diosan utapasti mä thiyata, mä thiyakam phuqhänwa.

22Ukapachaw Jehú reyix isinak uñjir chachar säna: “Baal diosar yupaychirinakatak uruyañ isinak apsunim” sasa. Isinak uñjiristi ukham luräna.

23Ukxarusti Jehú reyimpi, Jonadab chachampix, Baal diosan temploparuw mantapxäna, Jehú reyisti Baal diosan yupaychirinakaparux sänwa:

—Sum amuyapxam, jan jumanak taypin Israelan Tatitupar yupaychirinakax utjkpanti, jan ukasti, Baal diosar yupaychirinakakiw akankañapa —sasa.

24Baal diosar yupaychirinakasti wilañchanaka, nakt'at waxt'äwinak luqtiriw templor mantapxäna. Ukchañkamasti, Jehú reyix anqäxan kimsaqallq tunka jaqinak uchäna, jupanakarusti suma iwxäna, akham sasa:

—Jumanakat khititix aka jaqinakat maynirus jaltayanixa, jakañapampiw phuqhani —sasa.

25Nakt'at waxt'äwi luqtañ tukuyxasinsti, Jehú chachax uñjirinakampiru, yanapirinakampiruw säna:

—¡Mantanipxam, taqinir jiwarayapxam! ¡Jan khitis jaltpati! —sasa.

Jehú reyin jaqinakapax espadampkamaw uka jaqinakar jiwarayäna, ukatsti templot jaqsunipxäna. Ukat Baal diosan yupaychañ utaparuw mantapxäna,

26yupaychañ lawanak apsunisinxa, ninampiw nakhantayapxäna.

27Ukxarusti Baal diosan altarapampi, utapampi t'unjapxi, qhillapataruw tukuyapxarakïna, ukasti jichhürkamaw ukhamäski.

28Jehú reyix ukham lurasaw Israel markat Baal diosar yupaychañ tukjäna.

29Ukampisa, Jehú reyix jucha luraskakïnwa, kunjämtix Nabat chachan Jeroboam yuqapax lurkatayna ukhama. Jehú reyix israelitanakar jucha lurayäna, Dan, Betel chiqanakan utjir qurit lurat vaca qallunakar yupaychaskakitap layku.

30Tatitusti Jehú reyirux sänwa: “Jumax nayraqataxan walik lurasktaxa. Ahab reyin wila masinakaparux nayan amtataxarjamaw t'unjtaxa. Ukat juman wawanakaman wawanakapasa, allchhinakapasa, Israelan reyi qunuñapan qunt'asipxani” sasa.

31Ukham yatkasinsa, Jehú reyix janiw Israelan Tatit Diosapan kamachinakap taqi chuymampi phuqhañat llakiskänti, jupasti janiw apanukkänti kawkïr juchanakampitix Jeroboam chachax israelitanakar jucha luraykän ukanaka.

32Khä urunakansti, Tatitux Israel markan uraqip jisk'aptayañ qalltäna. Hazael reyix israelitanakarux taqi tuqi qurpanakat atipjäna:

33Jordán jawirat inti jalsu tuqinkir Galaad, Basán chiqanakat qalltasa, ukatsti Arnón sat jawir jak'ankiri, Aroer chiqat alay tuqinkir uraqinaka. Uka uraqinakasti Gad, Rubén, Manasés uka ayllunkirinakan uraqipänwa.

34Ukat uksar Jehú reyin sarnaqäwipasa, taqi luräwinakapasa, atipjäwinakapasa, Israelankir reyinakan luräwinakapa qillqatankiwa.

35Jehú reyix jiwxän ukkhasti, Samaria markan imt'xapxäna, jupa lantisti Joacaz yuqapaw reyïxäna.

36Jehú reyix Samaria markan, pä tunka kimsaqallqun maraw Israel marka apnaqäna.