ISAÍAS 51 - Qullan Arunaka DC

Jerusalén markatak chuymachäwi arunaka

1Tatitux siwa:

—Ist'apxita taqi khitinakatix chiqa chuymampi thaqapkista,

chiqa kankañsa munapkarakta ukanaka.

Jumanakax Abraham awkita

Sara taykat saraqirinakäpxtawa.

2Jupanakan suma luräwinakap uñtapxam.

Kunapachatix Abrahamar jawskäyäta ukkhaxa,

jupax sapa jaqikïnwa,

ukampis nayax askinak churta,

ukatsti walja wawanak churarakta.

3Jerusalén markasti q'ala tukjatawa,

ukat juparux chuymachä.

Wasar uraqinakapsti

panqaran phuqhantat uraq tukuyä,

nayan uskt'ata Edén chiqjama

panqaran phuqhantat markäniwa.

Ukan k'uchikïñas utjani,

kusisiñ q'uchunak q'uchupxani

Tatituruw yuspagarapxani —sasa.

4“Markanaka, ist'apxita,

jach'a markanaka sum ist'apxita:

Nayaw yatichäwinakax qhanañchä,

kamachinakaxasti markanakatakix mä irpäniwa.

5Atipjäwix jak'ankiwa

nayan qhispiyasiñaxasti niyaw jutaski,

markanakarux ch'amaxampiw apnaqä.

Quta tuqinkir markanakasti nayaruw suyt'apxitani,

ch'amaxarurakiw alkatasipxani.

6“Alaxpach tuqi uñtapxam,

aka uraq tuqirus uñtapxarakim:

alaxpachax jiwq'ir uñtatakiw chhaqtxani,

uraqisti mä isir uñtatakirakiw mirq'stxani,

ukan jakir jaqinakasti chhichhillankhanakar uñtataw jiwarapxani.

Ukampis nayax wiñayatakiw qhispiyä,

chiqa kankañaxasti janiw tukuskaniti.

7“Kunatix chiqäki uk yatirinaka, ist'apxita,

nayan yatichäwinakax sum katuqir marka.

Jaqin jan wali arusitanakap jan axsarapxamti,

janiraki jaqin jisk'achatanakapampis ch'am laq'ayasipxamti,

8thuthan tukjata isjamaw tukusipxani,

laq'un tukjat ch'ankhar uñtataw tukusipxani.

Ukampisa nayan atipjañaxax wiñayatakïniwa,

qhispiyasiñaxasti wiñayan wiñayapatakïniwa”.

9Israelitanakasti akham sasaw arnaqasipxäna:

¡Tatitu, sartasimaya!

¡Sartasimaya, ch'amañcht'asimaya!

Kunjämtix nayrapachanakan sartasirïkta ukhama,

egipcio jaqinakar tukjkta ukhama.

10Jach'a lamar qutsa jumaw wañt'ayta,

uka qutanjam mä thakhi jist'arta,

uka chiqaw markamax makhatawayi.

11Ukhamarakiw juman qhispiyatanakax kuttanipxani,

Jerusalén markarusti kusisiñat arnaqt'asisaw mantanipxani;

ajanunakapasti wiñayatakiw k'uchikïni;

Kusisiñampi phuqt'atäpxatapatsti,

t'aqhisiñasa, jachañasa tukusxaniwa.

12Tatitusti siwa:

Naya, naya kipkaw jumarux ch'amachsma.

¿Jaqinakaruti axsarta?

Uka jiwir jaqinakax qurar uñtataw tukusipxani.

13Janiw armasipxätati,

naya, Tatituw juman irnuqirimätxa,

khititix alaxpachsa janatatki,

uraqsa utt'aykaraki uka Tatituxa.

Uñisirimarux jan axsarapxamti,

jumar tukjañatak wakichasiskchi ukasa.

Nayan ch'amax nayraqatansti,

uka phiñasiñapax jan kunatakiw tukusini.

14Khititix t'aqhisiyatäkän ukax jank'akiw qhispiyatäxani;

janiw katuntatäkasinsa jiwkaniti,

janirakiw jupatakix t'ant'as pist'kaniti.

15“Nayätwa Tatit Diosamaxa,

sutixasti Taqi Ch'amani Tatitu satawa;

nayaw jach'a qutxa unxtayta,

uka mathapinaksa jach'aruw sartayta,

16nayaw alaxpach uskta,

aka uraqsa sum sayt'ayta.

Nayarakiw lakamarus arunakax uchtxa,

ch'amaxampiw imsma.

Nayaw Jerusalén markarux ‘Jumax markaxätawa’ ” sarakta.

17Jerusalén marka, sartasim,

Jerusalén marka, sayt'asim,

jumaw Tatitun phiñasitapat t'aqhistaxa,

walpin t'aqhistaxa,

jan sayt'kiriw uñjasiraktaxa.

18Taqi wawanakam taypinsti,

janiw maynis jumar irpirix utjkiti;

taqi wawanak uywaskta ukanakatsti,

janiw maynis jumar amparat irpirix utjkiti.

19Aka pä jan walt'añaw jumxarux juti,

markamax tukjata, lunthatjataw uñjasi,

ukatsti jaqinakamax nuwasïwin manq'atjam jiwarapxi.

¿Khitirak jumat khuyapt'ayasïtamsti?

¿Khitirak chuymachätamsti?

20Wawanakamasti marka thakhi muyt'anakan liwinukutaw uñjasipxi,

tarujar qänampi katuntatjamaw jan ch'amani uñjasipxi,

Tatitun phiñasiñapampi chhuxriñchjata,

Diosan chiqachäwipampi t'aqhisiyataw uñjasipxi.

21Ukatpï, Jerusalén markankirinaka, akanak ist'apxam,

jumax machjatätawa,

ukampis janiw vinompi machjatäktati;

22Tatitu Diosama, khititix markaparu arxatki ukax siwa:

“Phiñasiñaxanxa, walpin jumanakarux mutuyapxsma,

uraqiruw q'al liwnuqapxsma;

ukampis jichhax janiw mayampsa mutuykxapxämati.

23Jan ukasti, uñisirinakamaruw mutuyä,

khitinakatix jumanakarux sapkäyätam:

‘Uraqir liwnuqtapxam, ukat taqxatapxäma’ sasa,

jumanakasti iyaw sasaw liwitattapxtaxa,

ukatsti jupanakax q'al taksuwayapxtam.”