1-2 1-2 (2-3) Tatit Diosaxay,
taqi chuymampiw jumar alkatsma;
¡nayar arknaqirinakat qhispiyasita!
Janitix qhispiykität ukax
leonanakjamaw q'al tukjapxitani;
janirakiw khitis arxatkitaniti.
3 3 (4) Tatit Diosaxay,
¿kuna jan walsa jupanakar lurtxa?
¿Khitiruch jiwaytxa?
4 4 (5) ¿Uñt'at jaqi masixar ñanqha lurataxach utji?
¿Jan ukax uñisirixaruch jan kunat t'aqhisiytxa?
5 5 (6) Ukhamächi ukasti,
uñisirixax arktasin katjitpan;
katjasin uraqinjam qatatitpan,
jaqi kankañaxsti takisirakpan.
6 6 (7) ¡Tatay, q'apisiñampiy sartasim!
¡Uñisirinakaxan q'apisiñaparux jumay saykatam!
Jumax chiqapar uñjañatakiw arstaxa,
¡jichhax nayaruy arxatt'ita!
7 7 (8) Markanakampiy muyuntayasim,
qhapaq qunuñam jach'ar aptam,
markanak apnaqañatak qunt'asirakim.
8 8 (9) Tatay, jumaw markanakar tariptaxa:
aski kankañaxarjamay uñjita;
jan juchanirjamay taripita.
9 9 (10) Chiqapar uñjir Tatay,
jumaw amtäwinak uñakiptaxa,
chuyma manqha amtäwinaka,
¡juchararanakan ñanqha lurañanakap tukusiyam,
aski jaqirusti thuruñchat sayt'ayam!
10 10 (11) Alaxpachankir Tatituw imantasiñaxaxa,
q'uma chuymaninakaruw jupax qhispiyi.
11 11 (12) Tatitux chiqapar uñjir taripiriwa,
jucharar jaqirux mutuyapuniwa.
12 12 (13) Janitix jaqix Tatitur kutikipstkanixa,
Tatitux espadap wakicht'asini;
mich'ip antutt'añas niy jiyintatpachawa,
13 13 (14) nina aqtat mich'inakapax wakicht'atawa,
¡jiwayir yänakapax wakicht'atawa.
14 14 (15) Ñanqha jaqir uñtapxam:
wawachasir warmjamaw t'aqhisiski,
ñanqhampi wallq'iptatawa,
k'ari kankañ wawacharakini.
15 15 (16) Wali manqha p'iypun allisi,
pachpa allisitaparuw jalantani.
16 16 (17) ¡Ñanqha luratanakapatxa
jupa kipkaw t'aqhisiskani!
17 17 (18) Nayasti, Tatituruw chiqapar uñjatapat jach'añchä,
alaxpachankir Tatitun sutiparuw q'uchunak q'uchü.
Who We AreWhat We EelieveWhat We Do
2025 by iamachristian.org,Inc All rights reserved.
