2 CRÓNICAS 8 - Qullan Arunaka DC

Salomonan yaqha luräwinakapa(1 R 9.10-28)

1Salomonax pä tunka marana, Tatitun utapampi, jupan reyi utapamp luräna,

2uka qhipatsti, kawkïr markanaktix Hiram chachax jupar katuykatayna uka markanak wasitat askichäna, ukatsti israelita jaqinak uka markanakar uchäna.

3Ukatsti Sobá chiqankir Hamat sat markar nuwantiriw saräna, ukat uka marka katuntasïna.

4Ukatsti wasarankki uka Tadmor marka askichäna, Hamat uraqin manq'añanak imañ markanak luraykatayna uka markanak askicharakïna.

5Ukxarusti alayankir Bet-horón sat marka, aynachankir Bet-horón marka askichäna, uka markanakasti nuwasiñatak lurat jach'a pirqanakani, thuru jist'añan punkunakanïnwa,

6ukatsti Baalat marka askichäna, ukhamaraki manq'añanak imañ maynïr markanaka, nuwasiñ carronakan cuartelanakapa, caballería cuartelanaka, taqi kunanaktix Jerusalén markana, Líbano chiqansa, jupan apnaqat uraqinakansa lurañ munkäna ukanaka.

7Uka uraqinakan qhiparir hititanaka, amorreonaka, heveonaka, ferezeonaka, jebuseonakax khitinakatix jan israelitanakäki,

8jupanakat saraqir wawanakaparusti israelitanakax janiw tukjapkänti, Salomonasti jupanakarux ch'ama lurañanakaruw uchäna; jupanakax jichhürkamaw uka lurañanakan sarnaqasipki.

9Ukampis Salomonax janiw israelita jaqinakat maynirusa, luräwinakapan mä uywatar tukuyas luqtayaskänti, jan ukasti, jupanakax soldadonakänwa, jilïrinaka, nuwasiñ carronakampina, caballeriampin jilïrinakapänwa.

10Salomón reyix lurañanak irnaqayir jaqinakanïnwa, jupanakasti pä pataka phisqa tunkanïnwa.

11Salomonasti faraonan phuchhaparuxa, Davidan Markapat irptayanxänwa, jupataki luraykatayna uka jach'a utaru, jupax chuymapan sänwa: “Warmixax janiw Israelankir David reyin utapan jakkaspati, kawkha chiqanakantix Tatitun arcapax uchatäkäna uka chiqanakax qullanawa” sasa.

12Salomonax Tatitun utap mantañawja nayräxan Tatitun altarap luraykatayna uka patxaruw nakt'at wilañchanak Tatitur luqtirïna,

13kuna urunakantix Moisesan kamachiparjama luqtañax wakiskäna ukhamaru: samarañ uruna, wawa phaxsi phunchhäwi urunakana, ukhamaraki marpachan kimsa phunchhäwi urunak utjki ukana: jan levaduran t'ant'anak manq'asiñ phunchhäwina, semananaka sat phunchhäwina, Chhujllanaka sat phunchhäwi urunakana.

14Ukhamarakiw sapüru luräwinak utt'ayäna, kunjämatix David awkipax wakt'äwaykatayna ukhamarjama, ukhamat sacerdotenakax lurañanakap lurapxañapataki, levitanakas Tatitur yupaychapxañapataki, sacerdotenakaru kunatix sapür wakiski ukanakan yanapt'asa. Ukhamarakiw punku uñjirinakarux sapa punku uñjañapatak utt'ayäna, kamisatix Diosan luqtiripa Davidax wakt'äwaykatayna ukhamarjama.

15Ukhamasti janipuniw kunapachas jupanakax kuntix Davidax sacerdotenakataki, levitanakataki, imat yänak uñjirinakatak arskäna ukanakat saraqtapkänti.

16Taqi kuntix Salomonax lurañapäkän ukanakasti lurasipunïnwa, kunüruttix Tatitun utapatak qalltap uchapkän ukürut qalltasa, tukuyatäñapkama. Tatitun utapasti mä suma tukt'ayatänwa.

17Ukatsti Salomonax quta lakankir Esión-guéber markaruw saräna, ukasti Elat marka jak'ana, Edom uraqin jikxatasi.

18Hiram chachasti jilïri yanapirinakap tuqix barconaka, jaqinaka jupar yanapañapataki apayäna, jupanakasti qutan sarnaqañxa sum yatipxäna, ukatsti jupanakax Salomonan jilïrinakapamp chikaw Ofir chiqar puriñkam sarapxäna, uka chiqatsti qurinak niya tunka phisqan waranqa kilo aptaniwayapxäna, ukatsti Salomón reyin ukaruw apapxäna.