2 SAMUEL 10 - Qullan Arunaka DC

Davidax sirionakampiru, amonitanakampiruw atipji(1 Cr 19.1-19)

1Mä qawqha pachatsti, amonitanakan Nahas reyipax jiwxänwa, jupa lantisti Hanún sat yuqapaw reyit qunt'asxäna.

2Ukat Davidax amuyt'asïna Nahas jaqin Hanún sat yuqapar sum uñjaña, kamisatix awkipax jupar suma uñjkatayna ukhama, ukat jupax mayni yanapirinakap Hanún sat reyin ukar khithäna, awkipan jiwatapat chuymacht'apxañapataki. Ukampis kunapachatix Davidan yanapirinakapax amonitanakan uraqipar puripkän ukapachasti,

3amonitanakan jilïrinakapax Hanún sat reyipar sapxänwa: “¿Jumasti walikiw sistati Davidan yanapirinakapan awkiman jiwatapat jumar chuymacht'ir jutapxatapatsti? ¡Jupax markas t'unjañ amtampiw jupanakarux uñaqayir khithanpacha!” sasa.

4Ukat Hanún sat reyix Davidan yanapirinakapar katuntayäna, ukatsti sunkhanakapsa chikatpach mururayäna, isinakapsa qhipäxkamaw ch'iyaqayäna. Ukat jupanakar khithanukxäna.

5Uka jaqinakasti wali p'inqachataw kuttanxapxäna, Davidasti uk yatisin ukspachaw jupanakar jikxatayir jaqinak khithäna, akham sapxañapataki: “Jericó markar qhiparapxam, sunkhanakam jilantañapkama, ukat kuttanxapxäta” sasa.

6Amonita jaqinakasti Davidampi wali uñisiyasipxatap amuyasisinxa, qullqi layku nuwasir pä tunka waranqa sirio soldadonak anthapipxäna Rehob, Sobá chiqankirinakata; Maacá markan reyipat waranqa jaqinak achikapxäna; Tob sat reyitsti tunka payani waranqa jaqinak achikapxarakïna.

7Davidasti uk yatisin, Joab yanapiriparux ejerciton taqpach soldadonakapampiw khithäna.

8Amonita jaqinakasti jutantapxänwa, ukatsti nuwasiñatakiw wakichasipxäna pachpa markar mantañ punkuna, ukchañkamasti Sobá, Rehob chiqankir sirio soldadonakampi, Tob, Maacá reyinakan soldadonakapampixa, uka pampanakan nuwasiñatakiw wakichasipxarakïna.

9Kunapachatix Joab chachax nayräx tuqita, ukhamaraki qhipäx tuqita katuntatäñatak wakichasipxatap amuyasisinsti, israelitanakat wali nuwt'asir soldadonak ajllïna, ukatsti sirio jaqinakar katuntañatakiw wakichasirakïna.

10Ukatsti mayni soldadonakxa Abisai jilaparuw jaytawayäna, ukhamat jupan amonitanakar jarkt'añapataki,

11juparusti sänwa: “Sirio jaqinakatix nayar atipjirjamäni ukapachax mäkiw yanapt'ir jutäta; amonita jaqinakatix jumar atipjirjamäni ukapachasti, nayaw jumar yanapt'ir jutarakï.

12Ch'am katxatam, markasar arxatañ layku, Diosasan markanakap arxatañ layku jan axsaras nuwasiñäni. ¡Tatituy jupan amtataparjam lurpan!” sasa.

13Joab chachasti sirionakar katuntiriw soldadonakapamp sarantäna, ukampis uka sirio jaqinakax jupan nayraqatapat jaltxapxänwa.

14Amonita jaqinakasti, sirio jaqinakar ukham jaltxiri uñjasax, jupanakas Abisai nayraqatat jaltxapxarakïnwa, ukatsti markaruw mantxapxäna. Ukhamasti Joab chachax amonitanakampi nuwasiñ suyt'xänwa, ukat jupax Jerusalén markar kuttawayxäna.

15Sirio jaqinakasti israelitanakampi atipjat uñjasisinxa, wasitat tantacht'asipxäna.

16Hadad-ézer jaqisti Éufrates jawirat khurkatankir sirio jaqinakaruw jawsayanïna, uka jaqinakasti Helam chiqaruw purintanipxäna. Jupanakan jilïr irpiripasti Sobac chachänwa, Hadad-ézer jaqin ejercitopan jach'a jilïripa.

17Davidasti uk yatisax, jank'akiw taqpach israelita jaqinakar tantacht'asin, jupanakamp Jordán jawir makhatawayäna, ukatsti Elam chiqaruw purïna. Ukansti, sirio jaqinakax Davidamp jikintasisin nuwasipxäna,

18ukampis uka jaqinakax israelitanakan nayraqatapat jaltxapxakïnwa, Davidasti uka sirio jaqinakat pusi tunka waranq caballería soldadonak jiwarayatayna, ukhamarak nuwasiñ carronak apnaqir paqallq patak soldadonakampiru; ukhamarusa, Davidax Sobac sata, sirio ejerciton jach'a jilïriparuw chhuxriñchjatayna, uka jach'a jilïristi ukawjan jiwxäna.

19Ukanak uñjasasti Hadad-ézer reyimpi mayacht'asipkatayna uka reyinakax israelitanakamp atipjayasipxatap uñjasinxa, israelitanakamp sumaruw mantxapxäna, ukatsti jupanakar jaysasarakiw sarnaqapxäna. Uka urut uksarusti sirio jaqinakax amonita jaqinakar yanapañ axsarxapxänwa.