2 CRÓNICAS 30 - Qullan Arunaka DC

Ezequías reyin Pascua uruyatapa

1Ezequías reyix Israel, Judá markanakaruw yatiyañatak khithäna, Efraín, Manasés ayllunkirinakarusti qillqatanak apayarakïna, jupanakan Jerusalén markan Tatitun utapan ukar jutapxañapataki, ukat Israelan Tatitu Diosapan Pascua urup uruyañataki.

2Reyisti, jilïr yanapirinakaparu, Jerusalenankir taqpach jaqinakar jiskt'asinxa, jupax payïr phaxsin Pascua uruyañ amtäna,

3janiw jupax kunürutix uruyañax wakiski ukarjam uruykataynati, walja jan q'umachata sacerdotenakan utjatap layku, janirakiw jaqinakas Jerusalén markan tantachaskataynati.

4Uka amtäwisti reyitakisa, jaqinakatakis wakiskirïnwa,

5ukat jupanakax Israel markpachar jawsayañ amtapxäna, Beerseba chiqat qalltasa Dan chiqakama, Israelan Tatit Diosan Pascuapa uruyañatak Jerusalén markar sarapxañapataki. Nayrasti janiw qillqatäkäna ukhamarjam walja jaqinakampi uruyapkataynati.

6Ukhamawa, yatiyirinakax reyina, jilïr yanapirinakapampin qillqatanakap apasin taqpach Israel, Judá markanakar sarapxäna, reyin amtäwipa yatiyaniñataki, akham sasa: “Israelitanaka: Tatitun ukar kutt'anxapxam, Abrahamana, Isaacana, Israelana Diosaparu, jupasti jumanakarux kutt'anxarakiniwa, Asiria reyinakan amparapat jaltanipktas ukanakaru.

7Janiy jumanakax nayra awkinakamjama, jilanakamjamas tukupxamti, jupanakax nayra awkinakaman Tatit Diosapar jan sum arkatap laykusti, Tatitux tukjatäñatakiw katuyäna, kunjämtix jichhax uñjasipkta ukhama.

8Jichhasti, janiy jumanakax nayra awkinakamjam jan ist'asiri tukupxamti; amparanakam Tatit tuqir luqtapxam, wasitat suma arust'äwir jupamp mantañataki, qullan utapar jutapxam, jupaw wiñayatak yaqhachasi. Tatit Diosamar yupaychapxam, jupasti janiw jumanakatak q'apisitäkxaniti.

9Jumanakatix Tatitur kutt'anxapxäta ukaxa, uñisirinakamax jilanakamaru, wawanakamaru katuntat apapki ukanakax, jupanakat khuyapt'ayasiniwa, ukatsti aka uraqir kuttaniñapatakiw antutanxapxani, jumanakan Tatit Diosamasti khuyapayasiriwa, munasirirakiwa, jumanakatix jupan ukar kutt'anipxäta ukax, janiw jupax apanukupkätamti” sasa.

10Yatiyirinakasti Efraín, Manasés uraqinak muytanipxäna, markat marka sarasa, Zabulón uraqir puriñkama. Ukampis jaqinakax jupanakat larusipxänwa, janiw yäqapkänti.

11Ukhamäkipansa, Aser, Manasés, Zabulón uka ayllunakankir yaqhip jaqinakax, Diosan nayraqatapan alt'at chuymaniw tukt'apxäna, ukat Jerusalenar sarapxäna.

12Diosax Judá uraqinkir jaqinakan chuymanakap unxtayäna, Tatitun arsutanakaparjam reyimpina, jilïr irpirinakapampin arunakapar phuqhañataki.

13Ukhamaw Jerusalén markan jaqinakax walt'atapun tantachasïna, payïr phaxsina, jan levadurani t'ant'anak uruyañ uru amtañataki.

14Ukatsti jupanakax Jerusalenan utjkän uka altaranaka, incienso nakhayañ chiqanak apaqañ qalltapxäna, ukanaksti Cedrón jawiraruw warantanipxäna.

15Payïr phaxsita, tunka pusin uru saraqataruw Pascuataki mä marani urqu oveja jiwayapxäna. Sacerdotenakampi, levitanakampisti, jupanak pachpat p'inqasisax q'umachasipxänwa, Tatitun utaparusti uywanak apapxäna, nakt'ata wilañchanak luqtañataki.

16Ukatsti jupanakax lurañanakaparuw utt'asipxäna, kunjämatix Tatitun luqtiripa Moisesan kamachipan jupanakatak wakt'ayatäki ukhamarjama. Sacerdotenakasti, levitanakan amparapat katuqapkän uka wilampiw ch'allsupxäna.

17Uka tantachäwi taypinkir jaqinakasti waljaniw jan q'umachasipkataynati, ukat levitanakax Pascua urutaki uywanak jiwayapxäna, khitinakatix jan q'umachasipkatayna ukanakan uywanakapa, ukhamat Tatitur luqtatäpxañapataki.

18Ukatakisti Efraín, Manasés, Isacar, Zabulón ayllunkirinakat waljaniw jan q'umachasipkataynati, ukhamäkasasa Pascua manq'äwinkapxänwa. Ukampis Ezequiasax jupanakatakiw Tatitut mayïna akham sasa: “Khuyapayasir Tatay, taqi khitinakatix jumaru chiqa chuymampi thaqhapktam ukanakarux pampachamaya,

19nayra awkinakapan Tatit Diosapa, janisa jupanakax qullana utan saräwiparjam q'umachasipkchi ukasa” sasa.

20Tatitusti Ezequiasan mayitaparux ist'änwa, ukat jaqinakan juchap pampachäna.

21Ukhamasti, Jerusalén markan jikxatasipkän uka israelitanakax paqallq uruw wali kusisiñampi jan levadurani t'ant'a amtasiñ uru uruyapxäna. Sacerdotenakampi, levitanakampisti, sapüruw uka wali jayar ist'asiyiri toct'añ yänakampi, qullana q'uchunakampi Tatitur yupaychapxäna.

22Uk uñjasasti, Ezequiasax levitanakar walpun jallallt'äna, jupanakan Tatitur yupaychañatak wali suma amtäwipa uñacht'ayapxatap layku.

Jupanakax paqallq uruw kusisiñ chuymampi uruyapxäna, uruyäwin manq'asa, sumankañ waxt'äwinak luqtasa, nayra awkinakapan Tatit Diosapar yupaychasa,

23jaqinakasti taqiniw yaqha paqallq urumpi uruyañatak amtapxäna, uksti jupanakax wali kusisiñampiw lurapxäna;

24Judá uraqin Ezequías reyipax, tantachasipkatayna uka jaqinakarux, waranqa vaca qallunaka, paqallq waranqa ovejanak waxt'äna, jilïrinakasti chuymapatjam jaqinakar churapxarakïna, waranqa vaca qallunaka, tunka waranqa ovejanaka. Walja sacerdotenakaw q'umachasipxäna.

25Judá uraqinkir taqpach jaqinakaw kusisipxäna, sacerdotenakasa, levitanakasa, Israelat jutapkatayna uka jaqinakasa, Israel uraqit purinipkatayna uka yaqha markankir jaqinakasa, Judá uraqin jakapkän uka jaqinakas taqiniw kusisipxäna.

26Jerusalén markansti wali kusisiñaw utjäna, janipuniw kunapachas ukhamax Israelan reyipa, David chachan Salomón yuqapan urunakapatpacha utjkänti.

27Ukatsti sacerdotenakampi, levitanakampix sayt'atkamaw markataki aski waxt'äwi arunak arsupxäna; Tatitusti jupanakarux ist'änwa, mayisitanakapasti alaxpachkamaw purïna, kawkhantix qullan Diosax jakki ukkhakama.