ÉXODO 10 - Qullan Arunaka DC

Diosan Egipto markar t'iju t'ijunakamp mutuyatapa

1Tatitux Moisesaruw säna:

—Faraonan ukar saram, nayaw jupampiru, yanapirinakapampirux chuymanakap qalarayta, ukhamat jupanakar nayan jach'a muspharkañ chimpunakax uñacht'ayañaxataki,

2ukhamarak jumax wawanakamaru, allchhinakamar kuna muspharkañanaktix nayax egipcionak taypin lurkta, kunjämtix jupanakat laruskta ukanaksa jupanakar yatiyañamataki. Ukhamat jumanakax yatipxäta nayan Tatitütaxa.

3Moisesampi, Aaronampisti faraonan ukar sarasin jupar sapxäna:

—Hebreonakan Tatit Diosapax akham siwa: “¿Kunapachkamarak nayatak jach'a jach'a tukuskakïtasti? Markaxar khithanukxam, nayar yupaychir sarañapataki,

4janitix markaxar khithanukuñ munkäta ukaxa, qharürux t'iju t'ijunak markamxar apayanï,

5uka t'iju t'ijunakax uraqi chhaqtayañkamaw phuqhantani. Ukatsti kunanakatix chhijchhita jilt'ki ukanak manq'antani, pampankir quqanaksa taqpach manq'antarakini.

6Reyi utanakamaruw phuqhantani, yanapirinakaman utanakaparu, egipcio jaqinakan utanakaparuw phuqhantani. ¡Janiw awkinakamasa, achachilanakamas ukataq t'iju t'ijunak uñjapxirïkänti, jakapki ukürut jichhürkamaxa!” —sasa.

Uk yatiyasinsti, Moisesax faraonan reyi utapat jank'akiw kutstawayxäna.

7Ukatsti faraonan yanapirinakapax sapxänwa:

—¿Kunapachkamarak aka jaqist jiwasatak jan walt'añanak apaninisti? Uka jaqinakar khithanukxam, Tatit Diosapar yupaychir sarxapxpan. ¿Janit Egipto markan wali tukjatätap amuyktasti? —sasa.

8Ukatsti faraonax wasitat Moisesampiru, Aaronampiru jawsayanïna, jupanakarusti sänwa:

—Tatit Diosamar yupaychir sarapxam; janïr sarkasin sapxita, ¿khitinakas sarapxäta? —sasa.

9Moisesasti sänwa:

—Nanakax taqpachani sarapxañaxawa, jisk'a wawanakaxampi, chuyman awkinakampi, yuqanakaxampi, phuchhanakaxampi, ovejanakaxampi, vacanakaxampi, akasti nanakatakix Tatit Diosaxan jach'a urupäniwa —sasa.

10Faraonasti jupanakar sarakïnwa:

—¡Jan wali amtäwinakamax qhanäskiwa! Tatitux jumanakamp chikäskpasa, ¿kamisarak nayasti jumanakar wawanakamampi, warminakamamp khithanukupxämasti?

11Janiw ukhamäkaspati; chachakamak Tatitumar yupaychir sarapxam, ukxay munapxstaxa —sasa.

Ukatsti faraonax Moisesampiru Aaronampirux alisnukuyänwa.

12Ukampis Tatitux Moisesarux sänwa:

—Egipto uraqxar amparam luqtam, ukat t'iju t'ijunakax jutasin chhijchhi qhipat jilt'ir quqanak taqi manq'antani —sasa.

13Moisesasti thujrup ayxarusin Egipto uraqxaruw amparap luqtäna, ukatsti Tatitux inti jalsu tuqit mä thaya thayt'ayanïna, ukasti uruy arumaw thayäna. Qhipärmanthisti uka thayax t'iju t'ijunak purintayanïna.

14Uka t'iju t'ijunakax Egipto uraqpachar walpun phuqhantäna, taqi chiqanakan utjantasïna. ¡Janipuniw kunapachas ukataq t'iju t'ijunakax uñjañäkänti, janirakiw uka qhipatsa ukürjamax utjkaniti!

15T'iju t'ijunakax sintipunïnwa, uraqirus chhaqtayänwa, pampankir quqanak manq'antäna, chhijchhi qhipat jilt'ir quqanakan achunakap manq'antarakïna. Janiw Egipto uraqpachan kuna ch'uxñanakasa, quqanakasa, pampankir alinakas jilt'känti.

16Faraonasti jank'akiw Moisesampiru, Aaronampir jawsayanïna, jupanakarusti akham säna:

—Nayax jumanakan Tatit Diosamatakiw juchachasta, jumanakatakis juchachasiraktwa,

17ukampis nayax jumanakar achikt'asipxsmawa, jichha kutimpik juchaxat pampachapxita, Tatit Diosamar nayatak mayirapipxita, aka jiwayir mutuyäwi nayat apaqañapataki —sasa.

18Moisesasti, faraonan ukat mistuwayasin Tatitur mayïna.

19Ukatsti Tatitux inti jalanta tuqit wali thayt'ayanirakïna, uka thayaw t'iju t'ijunakar apasxasin Mar Rojo sat qutar jaquntxäna. Janiw mä t'iju t'ijus taqpach Egipto uraqin utjkxänti.

20Ukampis Tatitux faraonan chuymap qalarayänwa, janiw israelitanakarux antutañ munkänti.

Diosan Egipto markar ch'amakampi mutuyatapa

21Tatitusti Moisesarux sänwa:

—Amparam alaxpach tuqir luqtam, ukatsti Egipto uraqpachan laxa ch'amakax niyas llamkt'añpach utjani —sasa.

22Moisesasti iyawsasaw amparap alaxpach tuqir luqtäna, ukatsti kimsa uruw laxa ch'amakax Egipto uraqpachan utjäna.

23Uka urunakasti egipcionakax janiw purapat uñjasipkänti, janirakiw kawkhankapkäntix ukkhat unxtapkänti. Ukampis israelitanakan utanakapan qhanax utjaskänwa.

24Ukat faraonax Moisesar jawsayanïna, juparusti akham säna:

—Tatitumar yupaychir sarapxam, wawanakamarus irpasipxarakim; ukampis ovejanakama, vacanakam akar jaytawayapxam —sasa.

25Moisesasti sarakïnwa:

—Juma pachpaw uywanak churawayapxitäta nanakan Tatit Diosaxar wilañcha nakt'ayasin luqtapxañaxataki.

26Ukhamarusa, uywanakaxsa nanakamp chikaw anakisxapxä, janiw mä uywas akan qhiparkaniti, nanakax uka uywanakat ajllisin Tatituruw luqtapxä. Khayar puriñkamax kunanakay Tatitur yupaychañatak wakischini uk janiw yatisipkiti —sasa.

27Ukampis Tatitux faraonan chuymap qalarayäna israelitanakar jan khithanukuñapataki.

28Faraonasti jach'at Moisesar sarakïna:

—Saram akata, sum amuyasim, janiw mayampis akar jutätati, kunürutix nayan nayraqataxar wasitat uñstitätaxa, jiwätawa —sasa.

29Moisesasti ukxaruw sarakïna:

—Walik sistaxa, janiw nayraqatamar mayampis uñstkämati —sasa.