1Jacobusti wawanakaparuw jawsäna, ukat jupanakar sarakïna: “Jak'achasinipxam, ukatsti kunäkanitix akat qhiparu uk sapxäma:
2“Wawanakaxay, jak'achasinipxam;
Israel awkimar ist'apxam.
3“Rubén, jumax jilïri yuqall wawaxätawa,
jumaw nayrïr wawaxätaxa,
jumätaw ch'amaxasa,
ch'amaxan nayrïr achupasa.
Jumaw taqi kunansa nayrankäta,
jumarakiw taqi kunxarus ch'amanïyäta.
4Ukampisa jumax jan walpun ñanqhachistaxa,
uñt'atanakaxat maynïrimpiw ikintastaxa.
Jichhasti janiw nayrankirïkxätati,
jumasti jan jark'kay jach'a qutar uñtatätawa.
5“Simeonampi, Levïmpix jila purawa;
nuwasiñ yänakapasti jan walt'añanak apaniriwa.
6¡Janipuniw kunäkipansa
jupanakamp chik sarnaqañ munkti!
Q'apisiñapan jaqinak jiwarayapxäna,
munañanakapampikiw vacanakan kayunakapsa p'akirawayapxäna.
7¡Q'apisiñapax ñanqhachatäpan!
¡Qhuruchasiñapas ñanqhachatäpan!
¡Nayaw jupanakarux
taqi Israel uraqpachar anatatä!
8“Judá, uñisirinakamarux kunkat waythapïta.
Jilanakamasti waqaychapxätamwa,
juman nayraqataman alt'asipxarakini.
9¡Jumasti Judá, wawaxa!
Mä león qallur uñtatätawa;
katuntatapar manq'antasaxa,
uraqir alintasaw liwnuqtaraki,
mä jach'a leonäkaspas ukhama.
¿Khitirak sartayaspasti?
10Janiw khitis Judá markarux
ch'amanïñ kankañap apaqkaniti,
janirakiw khitis jilïr kankañ thujrupsa amparapat apaqkaniti,
aka uraqpachar apnaqkani uka
chiqpach reyin jutañapkama.
11Khititix asnopa uva yapunakan chint'aski,
isipsa vinompi t'axsuskaraki,
¡uvat ch'iwrsut umapampi!
12Nayranakapax vinot sipan juk'amp ch'iyarawa;
laka ch'akhanakapasti
lechet sipan juk'amp janq'urakiwa.
13“Jumasti, Zabulón,
quta thiyan jakäta,
quta thiyanakamax barconakan puriñapatakïniwa
qurpanakamasti Sidón uraqkamaw purini.
14“Jumasti, Isacar,
mä ch'aman asnor uñtatätawa,
pä uyu taypirjam jipt'ata.
15Uyun sumäskatap uñjasaxa,
uraqin walikirakïtap uñjasasti,
q'ipinak khumuñatakiw jipt'äna,
jan kun arsusaw t'aqhisiyat jaqir tuküna.
16“Jumasti, Dan,
markamarux chiqaparuw uñjäta,
jumax Israelan ayllunakapankirïtawa.
17Dan chachasti mä katarir uñtatäniwa,
thakhi jak'anakan liwisiskir katariru,
caballon kayu wintup achjiri,
caballon lat'xatat jaqirusa qhipäxat liwiqtayiri.
18“¡Tatay, qhispiyasiñam suyaskaktwa!
19“Jumarusti, Gad,
mä tama lunthatanakaw jalxatätam,
ukampis jumaw jupanakarux
jan amuyasiskirir katuntäta.
20“Aser, jumansti
suma manq'añanakaw utjätam
reyitakjamaw munkay manq'anak wakicharakïta.
21“Jumasti, Neftalí, antutnukut sarnaqasiñ munirïtawa.
Suma qallunakan antutat tarujar uñtatarakïtawa.
22“Jumasti, José,
uma thiyan wali achuri alir uñtatätawa,
pirqa patanakaruw layminakapas alintaraki.
23Jan wali ñanqha jaqinakax nuwantapxtamwa,
mich'inakampiw jumar antutt'anipxtam,
24ukampis jumax wali ch'aman amparanakanïtawa,
mich'inak antutañsa sum katxäsiraktaxa.
¡Taqi ch'amani Diosax yuspagaratäpan!
¡Awatirin sutiparu, Israelar uñjiriru yuspagaratäpan!
25¡Awkiman Diosapax yuspagaratäpan,
jupaw yanapirimaxa!
¡Taqi ch'aman Diosax yuspagaratäpan
jupaw askinak churaskätam!
¡Alaxpacha askinakampi!
¡Jach'a quta manqhankir askinakampi!
¡Wawanak uywir taykanakan askinakapampi!
26Awkiman churat askinakaw juk'amp jach'axa,
jan tukuskir qullunakana
walja askinakat sipansa.
José, taqi aka askinakax jumankiwa,
jilanakam taypinsti jumaw aski jaqit uñt'atätaxa.
27“Jumasti, Benjamín,
mä qhuru qamaqir uñtatätawa,
willjtanakax katuntatamaruw manq'antta,
jayp'urusti jilt'anak lakinuqarakta.”
28Akanakaw Israelan tunka payan ayllunakapaxa, uka arunakarak awkipax sapa maynir askinak churas arsuwayi.
Jacobun jiwxatapa29Mä urusti, Jacobux aka arunak wawanakapar säna: “Jiwañaxax sinti jak'ankxiwa. Nayarusti nayra awkinakaxan jak'aparuw imt'xapxitäta, kawkïr pututix Efrón sata hitita jaqin uraqipankki ukaru,
30khaysa Canaán uraqina, Macpelá sat chiqankki uka puturu Mamré uñkatasina, kawkïrtix Abrahamax taqi wila masixan imatäñapatak Efronat alkatayna uka uraqiru.
31Ukaruw Abrahamarusa, Sara warmiparusa, Isaacarusa, jupan Rebeca warmiparus imxapxarakïna; ukarurakiw Lía warmirus imayxarakta.
32Uka uraqisa, uka putusa, hitita jaqinakat alatawa” sasa.
33Jacobux aka arunak arsuñ tukuyxasinsti, ikiñapar wasitat jipt'asin jiwawayxäna.
Who We AreWhat We EelieveWhat We Do
2025 by iamachristian.org,Inc All rights reserved.
