EZEQUIEL 17 - Qullan Arunaka DC

Uva alimpi, pakanakampi

1Tatitux sarakituwa:

2“Ezequiel, Israel markarux mä uñtasïwi tuqi amuyt'ayam.

3Jupanakarusti sarakim:

‘Tatitux akham siwa:

Mä jach'a pakaw Líbano qullurux puri,

chhiqhanakapasti sinti jach'anakawa,

kunayman sami phuyunakaniwa.

Cedro quqan alay laymip katxaru,

4wali amstankir laymi khuchhuqi,

alakipa lurir jaqinakan markapar ayruntiriw sari,

alakipa lurañax walt'atäki uka markaru.

5Ukatsti uraqit mä jatha apti,

mä wakichat uraqiruw satanti,

walja umani jawir thiyaru.

6Uka jathasti jank'akiw mistuni,

mä jach'a uva aliw tukuraki;

janis wali jach'akchïnxa,

layminakapax uka jach'a paka tuqiruw jilanti,

saphinakapasti uraqiruw jilantaraki.

Wali alintata uva yapuruw tuku,

külltasinsti, walja layminakaniw tukuwayaraki.

7Ukampis yaqha jach'a pakaw utjarakïna,

wali jach'a chhiqhanakani, walja phuyunakani.

Uka uva alisti saphinakapampi,

layminakapampi uka jach'a paka tuqiruw jilantayi,

juk'ampi uma churañapataki,

kawki chiqar ayruntatäkäntix ukat jayana.

8Ukampis mä suma uraqiru,

walja umanak jak'ar ayruntatänwa,

ukan wal laymintasapäna,

suma achunak churarakisapäna,

mä suma uva alir tukurakisapäna.’

9“Jichhasti nayan sutixar jupanakarux sarakim:

‘Tatitux akham siwa:

Aka uva alix janiw jiltkaniti.

Nayrïr pakaw ukarux saphinakap jik'irani,

achunakapsa willirtayarakini;

juk'a ch'amampi, mä juk'a jaqinakampikiw

saphinakap jik'irani,

machaq külltatanakapasti wañsxakirakiniwa.

10Wasitat ayruntapkani ukasa,

janiw ch'uxñatatkaniti;

inti jalsu tuqit thayt'anir thayaw wañsuyani;

kawkhantix ayruntatäkäna

uka pachpan wañsxarakini.’ ”

11Tatitusti sarakituwa:

12“Jichhax nayatak sayt'asir markar jiskt'am, kuna amuyt'äwtix churktan uk amuyt'apxpachati janicha uka tuqita. Jupanakarusti sarakim: ‘Babilonia uraqinkir reyiw Jerusalén markar jutasin Judá uraqinkir reyimpiru, jilïrinakapampir katuntayasin Babilonia markarux apasxi.

13Ukatsti reyin wila masipankirinakat jilïr yuqaparuw katunti, jupampisti mä arust'äwi luri, jupar taqi chuymampi luqtañapatakiw juramento lurayi, ukatsti aka markat wali aytat jaqinak apasxaraki,

14ukhamat Judá uraqin mä jan ch'aman markäñapataki, jan sayt'kir tukuñapataki, kawkïr arust'äwtix lurki uk phuqkchini ukasa.

15Ukampis uka reyin jilïr yuqapax Babiloniankir reyitakix sayt'asïnwa, ukatsti Egiptoruw yatiyirinak khithäna, caballonaka, walja soldadonak mayiniñapataki. ¿Jumanakasti amuyapxtati ukanak lurasin atipjañapa, jiwañatsa jaltxañapxa? ¿Uka arust'äwir jan phuqhiristi jiwañat qhispispati?

16Naya, Tatituw juramentompi arsta, khititix uka juramento luratapat phiskaskani, janirak reyit qunt'askasinsa uka arust'äwi lurataparus phuqkarakiniti, ukax pachpa Babilonia uraqin jiwani.

17Babiloniankir reyix uka markar nuwantkani, ukatsti nuwantañataki marka muytpacharu suma sayt'asiñ chiqanaka wakichaskani, jach'a pirqanaksa pirqantkarakini, walja jaqinakarus jiwaraykarakini ukapachax, faraón reyix janiw ch'aman ejercitop khithankaniti, janirakiw walja jaqinaksa khithankaniti,

18jupax juramento luratapat phiskasïnwa, janirakiw arust'äwirus phuqkänti; jupasti phuqhañatakiw arsutayna, ukampis janiw uka arsutaparux phuqkxiti, ukat jichhax jiwayatäni.

19“ ‘Naya, Tatituw jakañax layku juramentompi arsta: Jupax nayaru juramentompi arsutanakapat phiskasiwa, janirakiw nayampi lurata arust'äwirus phuqkiti, ukatpï jichhax juparux luratapat wayt'äxa.

20Jupxarusti jichhax qänaxa jaqxatanï, ukampirakiw katuntä, ukatsti Babilonia uraqiruw aparakï, ukan juparux luratapat wayt'ä nayar jan taqi chuyma arkatapata.

21Suma soldadonakapas nuwasiñan jiwarapxani, ukat jilt'irinakasti taqi tuqir ananukutäpxaniwa. Ukapachaw jumanakax yatipxäta, naya, Tatitun parlaskataxa.

22“ ‘Naya, Tatituw arsta: Jichhasti nayax cedro quqan alay laymip katurakï; suma wawa alïkis uk apaqarakï, ukatsti naya kipkaw mä jach'a qullu patar ayruntä,

23Israelan wali jach'a qullüki ukaru. Layminakapax wal jilantani, achunakapas wal phuqhantani, ukatsti mä suma cedro quqaw tukuni. Uka quqan ch'iwipan jamach'inakax tapachasipxani.

24Pampankir taqi quqanakasti nayan Tatitütax yatipxani. Nayaw jach'a jach'a tukuri quqanakarux liwinukta, jisk'a quqanakarusti jiltayaraktwa. Nayaw ch'uxña quqanakarux wañsuyta, waña quqanakarusti ch'uxñatatayaraktwa. Naya, Tatituw uk arsta, arsutaxarusti phuqhapuntwa.’ ”