SALMOS 91 - Qullan Arunaka DC

SALMO 91Tatituw imantasiñasaxa

1Alaxpachankir Taqi ch'amanin imat sarnaqir jaqixa,

2Tatiturux siwa:

“Jumätaw imantasiñaxaxa, jark'aqasiñaxasa,

Diosaxay, jumaruw taqpach chuymamp alkatsma” sasa.

3Jupakiw sipit qänat qhispiyätam,

jupakiw jiwayir usut jark'aqätam,

4chhiqhanakapampiw imxatätam,

chhiqhanakap manqhäxan imantasïta.

¡Amparapax jark'aqasiñar uñtataw imätam!

5Axsarkay arum ch'amakarux jan axsarkamti,

urun antutat mich'inakarus jan axsarkamti,

6ch'amakampi chik purinir usunakarux jan axsarkamti,

uru qhanan jiwarayir usunakarus janirak axsarkamti;

7ch'iqäxamarux waranqanakaw jiwarat liwirtapxani,

kupïxamarusti tunka waranqaw tukusipxani,

jumarusti janiw kunas kamachkätamti.

8Nayranakamamp uñjañatakikiw ukankäta,

ñanqha lurir jaqinakan katuqäwip uñjäta.

9Jumax Tatitumpiw imayastaxa,

Alaxpachankiriruw arxatirimat uchastaxa,

10chijix janiw jak'achaskätamti,

usus janirakiw utamar purinkaniti,

11Diosax angelanakaparuw khithanini,

sarnaqäwim imañataki.

12Amparapxaruw apapxätam,

kayuman qalar jan lanqtasiñapataki.

13Katarinakarusa, asirunakarus takxataskakïtawa,

leonanak taypinsa, sarnaqaskakïtawa.

14“Nayar munasitap laykusti, juparux qhispiyäwa,

nayar uñt'atap laykusti, juparux imarakïwa.

15Nayar art'asitan ukapachaxa,

mayisitaparux jaysäwa.

Jupamp chikaw t'aqhisiñankä,

llakisiñat irpsü, jach'aruw aptä;

16walja maranakaw jakayä:

¡qhispiyäwixampiw jupar kusisiyä!”