2 REYES 4 - Qullan Arunaka DC

Aceiten muspharkañ lurasitapa

1Mä warmiw utjäna, jupasti profetanakat maynïr profetan warmipänwa, jupax Eliseon ukaruw saräna akham sasa:

—Chachaxax jiwxiwa, jupax Tatitur axsartirïnwa, uksti jumax yattawa. Jichhasti qullqi mayt'apkitäna uka jaqiw juti, ukatsti pani wawaxaruw uywatapatak irpasxañ muni —sasa.

2Eliseosti juparux jiskt'änwa:

—¿Kuns jumar yanapt'añatak luriristxa? Sita, ¿kunas utaman utjtamxa? —sasa.

Warmisti ukxaruw säna:

—Janiw kunas utaxan utjkituti, mä juk'a aceitekiw jisk'a chatun utjitu —sasa.

3Ukat Eliseox säna:

—Ukhamasti uta jak'amankirinakat mä qawqha chatunak mayt'asir saram, ¡qawqhäpasa, ch'usa chatunak jikxatasinkakïtawa!

4Ukatsti wawanakamamp chikaw utamar mantäta, uta punku jist'antasinsti taqpach chatunakar aceite phuqharäta, phuqhanakäki uksti yaqha chiqaruw uchäta —sasa.

5Warmisti Eliseon nayraqatapat sarxäna, ukatsti wawanakapamp chikaw utapar jist'antasïna. Ukat kawkïr chatunaktix wawanakapax churapkäna ukanakaruw aceite phuqharañ qalltäna.

6Taqpach chatunak phuqharasinsti, warmix wawanakapat mayniruw säna:

—Yaqha chatumpi apanirapikita —sasa.

Ukxaruw wawapax säna:

—Janiw mä chatus utjkxiti —sasa.

Ukapachaw aceitex tukusxarakïna.

7Uka qhipatsti warmix profetan ukar sarasin uk yatiyäna, profetasti jupar sänwa:

—Jichhasti uka aceite aljir saram, ukat uka aljatampiw manum phuqhäta. Ukat jilt'äki ukasti jumana, wawanakamana jakapxañamatakïniwa —sasa.

Eliseo profetampi, Sunem chiqankir warmimpi

8Mä urusti, Eliseox Sunem markanjam saraskäna. Uka markansti mä wali aytat warmiw jakäna, jupasti wali achikt'asisaw Eliseor jawsi, utapar manq'asir mantañapataki. Eliseox sapa kuti uka markanjam sarkän ukkhaw uka warmin utapar manq'ir mantirïna.

9Ukat uka warmix chachapar säna:

—Uñjam, aka chachax sapa kutiw marka chiqa sarkasax jiwasar tumpt'awayistu, nayax yattwa, jupax Diosan qullan profetapawa.

10Jupatak uta patxar mä uta lurarapiñäni. Uka utarusti mä ikiñampi, mä mesampi, mä qunt'asiñampi, mä micha chuwampi ucharapiñäni. Jiwasar tumpt'ir jutkani ukapachasti, ukan qamarasiwaykani —sasa.

11Mä urusti, Eliseox uka utaru ikt'awayañatak purisinxa,

12Guehazí sat uywataparuw säna:

—Uka sunamita mamaruy jawsanim —sasa.

Guehazí uywatasti iyawsasaw warmir jawsanïna, warmix jupa nayraqatar uñstkän ukkhasti, Eliseox uywatapar sänwa:

13—Aka mamax jiwasar sum katuqt'istu, jupar jiskt'asma, kuns jupatak lurarapsna; inas reyimpi, jan ukax, ejerciton jilïripamp jupatak parlañas munchispa —sasa.

Eliseon uywatapax warmir jiskt'änwa, warmisti sänwa:

—Nayax aka marka masinakax taypin walikïsktwa —sasa.

14Eliseosti uywataparux sänwa:

—Ukhamasti, ¿kunarak jupatak lursnasti? —sasa.

Guehazí uywatapasti sänwa:

—Janiw siristti. Jupax janiw wawanïkiti, chachapasti awkïxarakiwa —sasa.

15Ukat Eliseox säna:

—Jawsanim —sasa.

Uywatasti jawsanïnwa, ukampis uka warmix uta punkurukiw sayt'asïna.

16Ukat Eliseox säna:

—Jutir maran aka pachpa urunakan, amparamar mä wawa ichxart'asïta —sasa.

Warmisti ukxaruw säna:

—Janikiy naya, luqtirimar sallqjistati —sasa.

17Ukampis kunjämtix Eliseox siskatayna ukhamarjamaw uka warmix usur jaqiptäna, ukat mararusti mä wawa wawachasïna.

18Wawasti jilsxänwa. Ukampis mä urux, jupax awkipar uñjiriw saraskäna, awkipasti yapu apthapirinakampïskänwa,

19wawax akatjamat awkipar jach'at säna:

—¡Ay p'iqixa! ¡P'iqiw usutu! —sasa.

Ukat awkipax mä uywatapar säna:

—Taykapan ukar irparapita —sasa.

20Uywatasti irptawayasinxa, taykapan ukaruw jaytanxäna, taykapasti jarphiparuw wawar qunt'ayasïna, chika urkama. Ukat wawax jiwxäna.

21Ukampis jupax profetan utapar ichkatasin, ikiñap patxaruw ichnuqäna, ukatsti jupax punku jist'antasin mistuwayxäna.

22Ukatsti chachapar jawsasinxa sänwa:

—Mä uywat khithanita, mä qachu asnompi kuna, profetar jikxatiriw jank'ak sarañ munta. Ukat kutt'anxakïwa —sasa.

23Chachasti warmiparux jiskt'änwa:

—¿Kunatarak jichhür jupan ukar sarätasti? Janiw machaq phaxsïkisa, janirakiw samarañ urükisa —sasa.

Warmisti ukxaruw säna:

—Janisay kunäkpan, jan llakisimti —sasa.

24Ukat warmix mä asno wakicht'ayasïna, uywataparusti sarakïnwa:

—Jina, sarañäni, nayax siskäma ukkhakamax janiw sayt'ätati —sasa.

25Ukhamaw uka warmix sarawayäna, ukatsti Carmelo sat qulluruw purïna, kawkinkkäntix profetax ukaru. Eliseosti jayat warmir jutir uñjasin, Guehazí uywataparux säna:

—Uñjam, sunamita warmirakisä.

26Katuqir jalam, ukatsti jiskt'am kunjamäskis jupaxa, chachapasa, wawapasa —sasa.

Uywatasti saränwa, warmisti uywatarux: “Walikïsipktwa” sänwa.

27Ukatsti Eliseon ukar purisinxa, warmix profetan kayupat qhumantasïna. Guehazí uywatasti warmir wayuqañatakiw jak'achasïna, ukampis Eliseox sänwa:

—Suyt'akim, jupax wali llakt'atawa, Tatitusti janïraw kuntix jupar kamachki uk yatiykituti —sasa.

28Ukat warmix jupar säna:

—Tata, ¿nayat jumarusti mä wawanïñ maysmasti? ¿Janit jumar mayksma nayaru jan sallqjañamataki? —sasa.

29Ukat Eliseox Guehazí uywatapar säna:

—Wakicht'asim, nayan thujrux apxarum, ukatsti kawkhankkitix wawax ukar saram. Thakhintix khitimpis jikisïta ukaxa, janiw aruntätati; jumar aruntirirusti janiw jaysätati. Purisasti, wawan ajanupxaruw nayan thujrux uchäta —sasa.

30Ukampis wawan taykapax Eliseor sänwa:

—Tatit layku, juma laykuw juramento lurta, janitix jumamp chika sarkä ukaxa, janiw utaxar kuttkäti —sasa.

Ukat Eliseox jupamp chik saräna.

31Ukchañkamasti, Guehazí uywatapax jupanakat nayra sarkatayna, ukatsti wawan ajanupxaruw thujru ayxatatayna, ukampis wawax janiw juk'sa unxtkänti, janirakiw jakirjamäkänsa; ukat Guehazí uywatax Eliseor jikxatir saräna, juparusti sarakïnwa:

—Wawax janiw unxtkisa —sasa.

32Kunapachatix Eliseox utar mantkäna ukkhaxa, wawax ikiñxan jiwatapunïxänwa.

33Utar mantasinxa uta punku jist'antasin Tatitur mayisïna. Uta manqhansti Eliseompi wawampikiw ukankapxäna.

34Ukatsti ikiñ patxar makhatasin wawxaruw winkxatäna, lakapsa, nayranakapsa, amparanakapsa wawankïrxaruw uchäna, wawxa jak'aparuw qhumthapïna. Wawasti juk'at juk'at junt'utatañ qalltäna.

35Ukatsti Eliseox sartasin maysat maysa uka utan sarnaqäna; ukxarusti ikiñ patar wasitat makhatasin wawar qhumthapïna. Ukatsti akatjamat wawax paqallq kuti jach'irasïna, nayranakapas uñatatxarakïnwa.

36Ukat Eliseox Guehazí uywatapar jawsasin säna:

—Sunamita warmir jawsanim —sasa.

Guehazí uywatapasti ukham luräna, warmix Eliseon ukar purinïna ukkhasti, Eliseox jupar sänwa:

—Akax wawamaxa —sasa.

37Warmisti jak'achasisin Eliseon kayup jak'ar killt'asïna; ukatsti wawap irpxarusin uka utat mistuwayxäna.Manq'ampi muspharkañ lurasitapa

38Uka qhipatsti, Eliseox Guilgal chiqaruw kutt'xäna. Khä urunakansti uka uraqin manq'at t'aqhisiñaw utjäna. Mä kutisti kunapachatix profetanakax Eliseor muyuntat qunt'atäsipkän ukkhaxa, Eliseox uywataparuw säna: “Ninar jach'a phukhu itxatam, profetanakatak manq'a phayt'am” sasa.

39Jupanakat mayniw pampar mistuwayatayna ch'uxñanak apthapisiri, ukansti ch'uminkir achunakani mä ali jikxatäna, uka alitsti calabazar uñtat achunak apaqasïna, ukatsti isiparuw uka achunak apanïna. Kutt'anxasinsti ukanak khucht'asin manq'ar uchantäna, kuna achütapsa jan yatkasina.

40Ukatsti profetanakaruw manq'apxañapatak churäna; ukampis manq'añ qalltasinxa, jupanakax jach'at sapxäna:

—¡Profeta, aka manq'ax jiwayir qullaniwa! —sasa.

Ukhamasti janiw uka manq'xa manq'xapxänti.

41Ukat Eliseox säna:

—Mä juk'a jak'u apanirapipxita —sasa.

Ukatsti phukhur jak'u jach'intasin säna:

—¡Jichhax jaqinakar manq'añ churapxam! —sasa. Jaqinakasti manq'apxänwa, janiw kuna jan walis phukhun utjkänti.

42Uka qhipatsti mä chachaw Baal-salisá chiqat purinïna, Eliseotaki cebada t'ant'anakat pä tunka apanirapïna, jichha lurt'at t'ant'anaka, ukhamaraki wayaqaparux chhuyu trigompi apanirapïna. Eliseosti uywataparux sänwa:

—Uka jaqinakan manq'apxañapatak churam —sasa.

43Uywatapasti ukxaruw säna:

—¿Kunjämarak aksti patak jaqinakar churästi? —sasa.

Eliseosti saskakïnwa:

—Jaqinakan manq'apxañapatakix churaskakim, Tatitux siwa: “Manq'apxaniwa, ukatsti jilt'askakiniwa” —sasa.

44Ukhamasti, uywatax jaqinakar churänwa, jupanakasti manq'apxänwa, manq'añasti jilt'askarakïnwa, kunjämtix Tatitux siskatayna ukhamarjama.